ନଭେମ୍ବର ୧୧ରେ ଆମେରିକାର ଡଲାର ତୁଳନାରେ ଭାରତୀୟ ମୁଦ୍ରାର ମୂଲ୍ୟ ୬୨ ପଇସା ବୃଦ୍ଧି ପାଇ ୮୦ ଟଙ୍କା ୭୮ ପଇସାରେ ରହିଥିଲା। ଏହା ପରେ କେନ୍ଦ୍ର ସରକାରଙ୍କ ବିତ୍ତୀୟ ସଂସ୍ଥାରେ କାର୍ଯ୍ୟ କରୁଥିବା ବ୍ୟକ୍ତିମାନେ କହିବା ଆରମ୍ଭ କରିଦେଲେ ଯେ, ଭାରତୀୟ ମୁଦ୍ରାର ମୂଲ୍ୟ ସୁଧୁରିବା ଆରମ୍ଭ କଲା। କେବଳ ସେତିକି ନୁହେଁ, ସେମାନେ ଏହା ମଧ୍ୟ ଦାବି କଲେ ଯେ ଆମେରିକୀୟ ଡଲାର ବ୍ୟତୀତ ବ୍ରିଟେନ୍ର ପାଉଣ୍ଡ ଷ୍ଟର୍ଲିଂ, ୟୁରୋପୀୟ ସଂଘର ୟୁରୋ, ଜାପାନର ୟେନ୍ ଭଳି ଅନ୍ୟାନ୍ୟ ଶକ୍ତିଶାଳୀ ମୁଦ୍ରା ତୁଳନାରେ ଭାରତୀୟ ଟଙ୍କାର ମୂଲ୍ୟବୃଦ୍ଧି ହେଉଛି। କିନ୍ତୁ ବାସ୍ତବତା ସମ୍ପୂର୍ଣ୍ଣ ଭିନ୍ନ। ଏଥିସହିତ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ ମଧ୍ୟ ଏକ କାର୍ଯ୍ୟକ୍ରମରେ ଯୋଗ ଦେଇଥିବା ବେଳେ କହିପକାଇଲେ କୌଣସି ସଙ୍କଟ ସମୟର ମୁକାବିଲା ଲାଗି ଫୋରେକ୍ସ ରିଜର୍ଭ ବା ବୈଦେଶିକ ମୁଦ୍ରା ଭଣ୍ଡାର ରହିଛି। ଯେତେବେଳେ ଆବଶ୍ୟକ ହେଉଛି ଏହି ମୁଦ୍ରା ଭଣ୍ଡାରକୁ ବ୍ୟବହାର କରାଯାଉଛି। ଏହା କହିବା ବେଳେ ଆର୍ବିଆଇ ଗଭର୍ନର କହିଥିଲେ ଯେ, ଏତେ ଅସୁବିଧା ସତ୍ତ୍ୱେ ଭାରତର ଆର୍ଥିକ ସ୍ଥିତି ବେଶ୍ ସୁଦୃଢ଼ ରହିଛି। ଶକ୍ତିକାନ୍ତଙ୍କ ଏହି ଦୁଇ ପ୍ରକାର କଥା ଭିତରେ ସେ କିଭଳି ନିଜକୁ ଭୁଲ ପ୍ରମାଣିତ କରୁଛନ୍ତି ତାହା ସ୍ପଷ୍ଟ ଅନୁମେୟ। ଗୋଟିଏ ପଟେ ସେ କହୁଛନ୍ତି ସଙ୍କଟ ସମୟରେ ଗଚ୍ଛିତ ବୈଦେଶିକ ମୁଦ୍ରା ଭଣ୍ଡାରକୁ ବ୍ୟବହାର କରାଯାଉଛି। ଅର୍ଥାତ୍ ଭାରତୀୟ ଅର୍ଥନୀତି ନିଶ୍ଚିତ ଭାବେ ଦୁଃସ୍ଥିତି ଦେଇ ଗତି କରୁଛି। ଯଦି ଦେଶର ଆର୍ଥିକ ଅବସ୍ଥା ଦୁର୍ବଳ ହୋଇଯାଇଥିବାରୁ ସେ ରିଜର୍ଭକୁ ଉପଯୋଗ କଲେଣି, ସେହି ସମୟରେ ଭାରତର ଅର୍ଥବ୍ୟବସ୍ଥା ସୁଦୃଢ଼ ରହିଛି ବୋଲି କହିବା ହାସ୍ୟାସ୍ପଦ ମନେହେଉଛି। ୧୪ ନଭେମ୍ବର ଅପରାହ୍ନ ୪ଟା ସୁଦ୍ଧା ଭାରତୀୟ ମୁଦ୍ରାର ମୂଲ୍ୟ ୪୮ ପଇସା କମି ଡଲାର ତୁଳନାରେ ବିନିମୟ ମୂଲ୍ୟ ୮୧ ଟଙ୍କା ୨୬ ପଇସାରେ ପହଞ୍ଚତ୍ଛି। ଅର୍ଥାତ୍ ପୁଣି ଭାରତୀୟ ମୁଦ୍ରାର ମାନ ହ୍ରାସ ପାଇବାରେ ଲାଗିଛି। ଏଥିସହିତ ପରିସଂଖ୍ୟାନକୁ ଦେଖିଲେ ନଭେମ୍ବର ୪ ସୁଦ୍ଧା ଭାରତର ବୈଦେଶିକ ମୁଦ୍ରା ଭଣ୍ଡାର ୫୨୯.୯୯୪ ବିଲିୟନ ଡଲାର ରହିଥିଲା। ଗତବର୍ଷ ଅକ୍ଟୋବରରେ ଏହାର ପରିମାଣ ୬୪୫ ବିଲିୟନ ଡଲାର ଥିଲା। ଅର୍ଥାତ୍ ଏହି ସମୟ ମଧ୍ୟରେ ୧୧୫.୦୦୬ ବିଲିୟନ ଡଲାର ହ୍ରାସ ପାଇଛି। ତେଣୁ ଭାରତର ଆର୍ଥିକ ସ୍ଥିତି ଭଲ ରହିଛି ବୋଲି କହିବା ଅପରିପକ୍ୱତାର ପରିଚୟ ହୋଇଥାଇପାରେ କିମ୍ବା ଜାଣିଶୁଣି ନାଗରିକଙ୍କୁ ଅସତ୍ୟ ତଥ୍ୟ ଦିଆଯାଉଛି। କରଦାତାଙ୍କ ଅର୍ଥରେ ସରକାରଙ୍କ ଦ୍ୱାରା ଅବସ୍ଥାପିତ ହୋଇଥିବା ଦେଶର କେନ୍ଦ୍ରୀୟ ବ୍ୟାଙ୍କର ମୁଖ୍ୟ ନିଶ୍ଚିତ ଭାବେ ଜାଣିଛନ୍ତି ଯେ ରେପୋ ରେଟ୍ ଗତ ୬ ମାସ ମଧ୍ୟରେ ତାଙ୍କରି ଦ୍ୱାରା ୪ ଥର ବୃଦ୍ଧି କରାଯାଇଛି। ଫଳରେ ଋଣ କରିଥିବା ମଧ୍ୟବିତ୍ତ ବର୍ଗ ସୁଧ ଦେଇ ନୟାନ୍ତ ହେଉଥିବା ବେଳେ ଅତ୍ୟାବଶ୍ୟକ ସାମଗ୍ରୀର ଦର ଅତ୍ୟଧିକ ବୃଦ୍ଧି ପାଇବା ଯୋଗୁ ସାଧାରଣ ନାଗରିକଙ୍କ ପକ୍ଷେ ଦୈନିକ ଚଳିବା କଷ୍ଟକର ହୋଇପଡ଼ିଛି।
ମୋଟର ସାଇକେଲର ତେଲ ମିଟରରେ ଏକ ନାଲି ରଙ୍ଗର ଅଂଶ ଦେଖିବାକୁ ମିଳିଥାଏ। ତାହା ହେଉଛି ଗାଡ଼ିର ତେଲ ଟାଙ୍କିରେ ରିଜର୍ଭ ପହଞ୍ଚତ୍ବାର ସୂଚନା। ସାଧାରଣ ବୁଦ୍ଧି ଥିବା ଚାଳକ କଣ୍ଟା ନାଲି ଛୁଇଁବା ମାତ୍ରକେ ଟାଙ୍କିକୁ ଯାଇ ତେଲ ଭରିଥାଏ। କଷ୍ଟ କିମ୍ବା ଅନିବାର୍ଯ୍ୟ କାରଣ ଉପୁଜିଲେ ରିଜର୍ଭ ତେଲରେ ଗାଡ଼ି ଚଳାଯାଏ। କିନ୍ତୁ ସବୁବେଳେ ମୁଣ୍ଡରେ ତେଲ ପକାଇବାର ଚିନ୍ତା ରହିଥାଏ। ଆଜିର ଭାରତୀୟ ଅର୍ଥନୀତି ନାଲି ରିଜର୍ଭରୁ ତେଲ ପୋଡ଼ିଲାଣି। ଅର୍ଥାତ୍ ଅତିଶୀଘ୍ର ବିରାଟକାୟ ସମସ୍ୟା ଆସିଯିବ। ସେଭଳି ସ୍ଥିତିରେ ଜନସାଧାରଣଙ୍କୁ ସତ୍ୟ କହି ସତର୍କ କରାଯିବା ପରିବର୍ତ୍ତେ ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ ରାଜନୈତିକ ଉଦ୍ଦେଶ୍ୟ ରଖି ଦେଶବାସୀଙ୍କୁ ଭୁଆଁ ବୁଲାଇବାକୁ ଉଦ୍ୟମ କରୁଥିବା ଭଳି ମନେହେଉଛି। ଏଠାରେ ଦୋହରାଇ ଦିଆଯାଇପାରେ ଯେ, ଶକ୍ତିକାନ୍ତ ଯେତେବେଳେ ଆର୍ଥିକ ବ୍ୟାପାର ସଚିବ ଥିବା ବେଳେ ବିମୁଦ୍ରୀକରଣ କରାଯାଇଥିଲା। ସେହି ଗୋଟିଏ ବିରାଟକାୟ ତ୍ରୁଟି ଯୋଗୁ ଦେଶ ଆଜିପର୍ଯ୍ୟନ୍ତ ଆଣ୍ଠେଇ କରି ରହିଛି। ତଥାପି ଡିଜିଟାଲ ଅର୍ଥନୀତି ଭଳି ବ୍ୟବସ୍ଥାକୁ ଜବରଦସ୍ତ ଚଳାଇବାର ଉଦ୍ୟମ କରୁଥିବା ହେତୁ ରିଜର୍ଭ ବ୍ୟାଙ୍କ ଦ୍ୱାରା ଦେଶର କ୍ଷତି ଏବେ ମଧ୍ୟ କରାଯାଉଛି। ରିଜର୍ଭ ବ୍ୟାଙ୍କର ପରିଚାଳନା ଦାୟିତ୍ୱରେ ଥିବା ବ୍ୟକ୍ତିମାନଙ୍କର ଅସତ୍ୟ ଉଚ୍ଚାରଣ ଅଜ୍ଞାନ ଲକ୍ଷଣ ଦର୍ଶାଉଛି।
କଷ୍ଟ କିମ୍ବା ଅନିବାର୍ଯ୍ୟ କାରଣ ଉପୁଜିଲେ ରିଜର୍ଭ ତେଲରେ ଗାଡ଼ି ଚଳାଯାଏ। କିନ୍ତୁ ସବୁବେଳେ ମୁଣ୍ଡରେ ତେଲ ପକାଇବାର ଚିନ୍ତା ରହିଥାଏ। ଆଜିର ଭାରତୀୟ ଅର୍ଥନୀତି ନାଲି ରିଜର୍ଭରୁ ତେଲ ପୋଡ଼ିଲାଣି। ଅର୍ଥାତ୍ ଅତିଶୀଘ୍ର ବିରାଟକାୟ ସମସ୍ୟା ଆସିଯିବ ।
