ବାଲିଆ,୨୭ା୮(ସ୍ବ.ପ୍ର.): ବିରିଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କିଛି ଦିନ ହେବ ଅଣସଂକ୍ରମିତ ରୋଗର ଔଷଧ ମିଳୁନାହିଁ। ବିଶେଷ କରି ଡାଇବେଟିସ, ବ୍ଲଡ ପ୍ରେସର, ଶ୍ୱାସ ଭଳି ରୋଗର ଔଷଧ ମିଳୁନାହିଁ। ରୋଗୀମାନେ ଔଷଧ ପାଇଁ ପ୍ରତିଦିନ ସ୍ବାସ୍ଥ୍ୟକେନ୍ଦ୍ରକୁ ଯାଇ ନିରାଶ ହୋଇ ଫେରୁଛନ୍ତି। ଏସବୁ ଔଷଧ ଆସିବା ବର୍ତ୍ତମାନ ସମୟରେ ବନ୍ଦ ରହିଥିବା ସ୍ବାସ୍ଥ୍ୟକେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବର୍ତ୍ତମାନ ସମୟରେ ଏହି ରୋଗ ମାରାତ୍ମକ ରୂପ ଧାରଣ କରିବାରେ ଲାଗିଛି। ଅଧିକାଂଶ ଲୋକ ଏଭଳି ରୋଗର ଶିକାର ହେଉଥିବା ବେଳେ ଏହା ମଧ୍ୟ ବ୍ୟୟବହୁଳ। ପୂର୍ବରୁ ଗରିବ ଲୋକେ ସ୍ବାସ୍ଥ୍ୟକେନ୍ଦ୍ରରୁ ନିରାମୟ ଯୋଜନାରେ ମାଗଣାରେ ଔଷଧ ନେଉଥିଲେ। ମାତ୍ର ଏହା ଏବେ ମିଳୁ ନଥିବାରୁ ସେମାନଙ୍କୁ ହନ୍ତସନ୍ତ ହେବାକୁ ପଡ଼ୁଛି। ଥରେ ଏସବୁ ରୋଗରେ ଆକ୍ରାନ୍ତ ହେଲେ ପ୍ରତିଦିନ ଔଷଧ ଖାଇବାକୁ ପଡ଼େ। ବହୁ ସମୟରେ ରୋଗୀ ଔଷଧ କିଣି ନ ପାରି ଗୁରୁତର ହୋଇଯାଉଥିବା ନଜୀର ରହିଛି। ତୁରନ୍ତ ଏସବୁ ଅଣସଂକ୍ରମିତ ଔଷଧ ସ୍ବାସ୍ଥ୍ୟକେନ୍ଦ୍ରରେ ଯୋଗାଇଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
ଏ ସମ୍ପର୍କରେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିକାରୀ ଡାକ୍ତର ରାକେଶ ମହାନ୍ତି କୁହନ୍ତି, ପ୍ରକୃତ ପକ୍ଷେ ଏହା ନ ମିଳିବାରୁ ଲୋକମାନଙ୍କ ପାଇଁ ସମସ୍ୟା ଉପୁଜିଛି। ଏନେଇ ଉପରିସ୍ଥ ଅଧିକାରୀଙ୍କ ନିକଟରେ ଲିଖିତଭାବେ ଅଭିଯୋଗ କରାଯାଇଛି। ଏବେ ଜିଲା ସାରା କୌଣସି ସ୍ବାସ୍ଥ୍ୟକେନ୍ଦ୍ରରେ ଏହି ଔଷଧ ମିଳୁନାହିଁ। ଔଷଧ ଆମ ପାଖରେ ପହଞ୍ଚତ୍ଲେ ଆମେ ରୋଗୀଙ୍କୁ ଦେବୁ। ଏନେଇ ସେମାନଙ୍କୁ ଆଉ ୩ରୁ ୪ ଦିନ ଅପେକ୍ଷା କରିବାକୁ ପଡ଼ିିବ।
