କୁଆଁରମୁଣ୍ଡା,୧୧।୮(ମହେନ୍ଦ୍ର କୁମାର ସାହୁ): ଏବେ ବିନା ଆନ୍ଦୋଳନ କିମ୍ବା ଧର୍ମଘଟରେ ଆଉ କୌଣସି କାର୍ଯ୍ୟ ହେଉନାହିଁ। ପ୍ରଶାସନ କେବଳ ପୂର୍ବରୁ ସବୁ ଦେଖି ଚୁପ୍ ବସୁଛି ଏବଂ ଯେତେ ଦୁର୍ଘଟଣା କିମ୍ବା ଧନଜୀବନ କ୍ଷତି ହେଲେ ବି ବେପରୁଆ ହୋଇ ରହୁଛି। ଏହାର ଏକ ଜ୍ୱଳନ୍ତ ଉଦାହରଣ ବୀରମିତ୍ରପୁର ଦେଇ ଯାଇଥିବା ୧୪୩ ନମ୍ବର ଜାତୀୟ ରାଜପଥରେ ଦେଖିବାକୁ ମିଳିଛି। ଏହି ରାଜପଥର ଦୂରାବସ୍ଥା ଯୋଗୁ ପ୍ରତ୍ୟେକ ଦିନ ଦୁର୍ଘଟଣା ଘଟି ଧନଜୀବନ ନଷ୍ଟ ହେଉଥିଲେ ଏବଂ ଗଣମାଧ୍ୟମରେ ଖବର ପ୍ରସାରଣ ହେଉଥିଲେ ମଧ୍ୟ ପ୍ରଶାସନ ସବୁ ଜାଣି ଚୁପ୍ ବସିରହିଥାଏ। ସାଧାରଣ ଲୋକ କିମ୍ବା ଜନପ୍ରତିନିଧିମାନେ ରାଜରାସ୍ତାକୁ ଓହ୍ଲାଇ ଅବରୋଧ କରିବା ପରେ ଯାଇ ପ୍ରଶାସନର ଚେତା ପଶୁଛି।
ମଙ୍ଗଳବାର ବୀରମିତ୍ରପୁରର ୧୪୩ ନମ୍ବର ଜାତୀୟ ରାଜପଥ ମରାମତି ନେଇ ରାଜପଥ ଅବରୋଧ ସମୟରେ ଏହି ଚିତ୍ର ସ୍ପଷ୍ଟ ହୋଇଛି। ସକାଳ ୬ଟାରୁ ଆରମ୍ଭ ହୋଇଥିବା ଏହି ଅବରୋଧ ସମୟରେ ଜାତୀୟ ରାଜପଥ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ। ଯେପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ଉତ୍ତମ ମାନର ମରାମତି କାର୍ଯ୍ୟ ଶେଷ ହୋଇନାହିଁ, ସେପର୍ଯ୍ୟନ୍ତ ରାସ୍ତା କାମରେ ନିୟୋଜିତ ଗାଡ଼ିଗୁଡ଼ିକ ଅନ୍ୟତ୍ର ନ ଯାଇ ବୀରମିତ୍ରପୁରରେ ରହିବ ବୋଲି କର୍ତ୍ତୃପକ୍ଷ ଉତ୍ୟକ୍ତ ଲୋକଙ୍କୁ ଲିଖିତ ପ୍ରତିଶ୍ରୁତି ଦେଇଥିଲେ। କର୍ତ୍ତୃପକ୍ଷଙ୍କ ଏହି ପ୍ରତିଶ୍ରୁତି ପରେ ଅପରାହ୍ନ ସାଢ଼େ ୨ଟାରେ ଅବରୋଧ ହଟିଥିଲା ଏବଂ ସଙ୍ଗେ ସଙ୍ଗେ ରାସ୍ତା ମରାମତି କାର୍ଯ୍ୟ ଆରମ୍ଭ ହୋଇଥିଲା।
ଏହି ଅବରୋଧ ଆନ୍ଦୋଳନରେ ବୀରମିତ୍ରପୁର ବିଧାୟକ ରୋହିତ ଜୋସେଫ ତିର୍କୀ, ବିଜେଡି ନେତା ଶଶି ସାଗର, କୁନା ଦେଓ, ଭାଜପା ନେତା ବଲ୍ଲୁ ତିୱାରୀ, କଂଗେସ ନେତା ବିକ୍ରମ ପଟ୍ଟନାୟକଙ୍କ ସମେତ ବୀରମିତ୍ରପୁର ଉପନଗରପାଳ ନିବେଦିତା ବାଗେ, ବରିଷ୍ଠ ନେତା ଜଗଦୀଶ ପ୍ରସାଦ ଅଗ୍ରୱାଲ, ଏମଡ଼ି ଅଜାଜ ଆଲାମ ପ୍ରମୁଖ ଶତାଧିକ ବ୍ୟକ୍ତି ଉପସ୍ଥିତ ଥିଲେ। ବନ୍ଦକୁ ସମର୍ଥନ ଜଣାଇ ବୀରମିତ୍ରପୁର ମର୍ଚେଣ୍ଟ ଆସୋସିଏସନ୍ ପକ୍ଷରୁ ସମସ୍ତ ଦୋକାନ ବଜାର ମଧ୍ୟ ବନ୍ଦ ରଖାଯାଇଥିଲା। ବିନା ଆନ୍ଦୋଳନରେ ରାସ୍ତା ମରାମତି କାର୍ଯ୍ୟ ହେବ ନାହିଁ ଜାଣି ସ୍ଥାନୀୟ ଲୋକେ ଏହି ଆନ୍ଦୋଳନକୁ ବହୁ ସଂଖ୍ୟାରେ ସମର୍ଥନ କରି ସାମିଲ ହୋଇଥିଲେ।