ଡେରାବିଶ, ୨୮।୨ (ବେବର୍ତ୍ତା ଅଜୟ ଦାସ): କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକ ଅଧୀନ ମଙ୍ଗଳପୁର ପଞ୍ଚାୟତ ତ୍ରିପୁରାରୀପୁର (ଘଣ୍ଟପଦା) ଦେଇ ବହିଯାଇଥିବା ବିରୂପା ନଦୀପଠାରେ ଶାଗୁଣାଘାଇଠାରେ ୨୦୨୩ ଡିସେମ୍ବର ୨ ସନ୍ଧ୍ୟାରେ ୧୦୦ ଫୁଟରୁ ଊର୍ଦ୍ଧ୍ୱ ଲମ୍ବର ନଦୀପଠା ୧୫ ଫୁଟ ଗଭୀରକୁ ଦବିଯାଇଥିଲା। ଏ ନେଇ ଅଞ୍ଚଳବାସୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଏହା କ୍ରମଶଃ ବୃଦ୍ଧି ପାଇବାରେ ଲାଗିଥିଲା। ଏହି ନଦୀ ବନ୍ଧଟି କେନ୍ଦ୍ରାପଡ଼ା ଓ ଯାଜପୁର ଜିଲା ପାଇଁ ଏକ ମୁଖ୍ୟ ରାସ୍ତା। ଗୋଟିଏ ପାର୍ଶ୍ୱରେ ବିରୂପା ନଦୀ ବନ୍ଧ ଥିବା ବେଳେ ଅପରପାର୍ଶ୍ୱରେ ପଟ୍ଟାମୁଣ୍ଡାଇ ମୁଖ୍ୟ କେନାଲ ବହିଯାଇଛି। ତେବେ ନଦୀପଠାରେ ଏଭଳି ମାଟି ଅତଡ଼ା ଧସି ଫାଟ ସୃଷ୍ଟି ହେବା ଯୋଗୁ ଘାଇହେବା ସମ୍ଭାବନା ପାଇଁ ନଦୀ ପାର୍ଶ୍ୱସ୍ଥ ଗ୍ରାମବାସୀ ଭୟଭୀତ ଅବସ୍ଥାକୁ ଚାଲି ଆସିଥିଲେ। ଖବରପାଇ ସେହିଦିନ ବିଳମ୍ବିତ ରାତିରେ ଜଳ ସମ୍ପଦ ବିଭାଗର ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀ ଓ ସହକାରୀ ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ରାୟ ଘଟଣାସ୍ଥଳକୁ ଆସି ପରିଦର୍ଶନ କରିବା ସହ ନଦୀବନ୍ଧକୁ ସୁରକ୍ଷା ଦେବାକୁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିଲେ। ପରଦିନ ଜଳ ସମ୍ପଦ ବିଭାଗର ମୁଖ୍ୟଯନ୍ତ୍ରୀ ରୋହିତ କୁମାର ସେଠୀ ଘଟଣାସ୍ଥଳକୁ ଆସି ଫେରିବା ପରେ ଶାଗୁଣାଘାଇଠାରେ ତୁରନ୍ତ ପଥର ଡମ୍ପିଂ ପାଇଁ ପ୍ରତିଶ୍ରୁତି ଦେଇଥିଲେ। ଇତିମଧ୍ୟରେ ୨ ମାସ ବିତିଯାଇଥିଲେ ମଧ୍ୟ କାମ ଆରମ୍ଭ ହୋଇନାହିଁ। ଏ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ଭୟଭୀତ ଅବସ୍ଥାରେ ଲୋକେ ରହିଛନ୍ତି।
ଏ ସମ୍ପର୍କରେ ଘଣ୍ଟପଦା ଗାଁର ସାମାଜିକ କର୍ମୀ ପ୍ରଫୁଲ୍ଲ କୁମାର ସିଂ କହିଛନ୍ତି, ବିରୂପା ନଦୀ ପଠାରେ ଫାଟ ସୃଷ୍ଟି ପାଇଁ ଏବେ ବି ସାଧାରଣ ଲୋକେ ଭୟଭୀତ ଅବସ୍ଥାରେ ରହିଛନ୍ତି। ତୁରନ୍ତ ଏହି ଫାଟକୁ ବନ୍ଦ କରିବାକୁ ପଦକ୍ଷେପ ନେବାକୁ ସେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ବାରମ୍ବାର ଦାବିକରି ଆସୁଛନ୍ତି। ଏଥିସହ ନଦୀବନ୍ଧର ଉନ୍ନତୀକରଣ ସମୟରେ ଶାଗୁଣାଘାଇଠାରେ ଚନ୍ଦ୍ରକାର ଆକୃତି ଥିବା ପୁରୁଣା ରାସ୍ତାଟି ଖାଲୁଆ ହୋଇଥିବାରୁ ସେଠାରେ ନଦୀରେ ଝର ସୃଷ୍ଟି ହୋଇ ବନ୍ଧ ପ୍ରତି ବିପଦ ସୃଷ୍ଟି କରିଛି। ନଦୀବନ୍ଧରେ ବହୁ ପରିମାଣରେ ଭାରିଯାନ ଚଳାଚଳ ଯୋଗୁ କମ୍ପନ ସୃଷ୍ଟି ହୋଇ ବନ୍ଧଟି ଦୁର୍ବଳ ହେବାରେ ଲାଗିଛି। ସେହି ସ୍ଥାନଟିକୁ ମାଟି ଓ ବାଲି ପକାଯାଇ ବନ୍ଧର ଉଚ୍ଚା ସହ ସମାନ କରି ନଦୀ ମଧ୍ୟରେ ଅଧିକ ପରିମାଣର ସ୍ପର ନିର୍ମାଣ କରାଗଲେ ଏହି ବିପଦ ଟଳିପାରନ୍ତା। ଏ ସମ୍ପର୍କରେ ବିଭାଗୀୟ ଅଧୀକ୍ଷଣ ଯନ୍ତ୍ରୀ ସେଠୀଙ୍କୁ ପଚାରିବାରେ ବିରୂପା ନଦୀପଠାରେ ସୃଷ୍ଟି ହୋଇଥିବା ଫାଟକୁ ବନ୍ଦ କରିବାକୁ ନଦୀ ମଧ୍ୟରେ ପଥର ଡମ୍ପିଂ କରାଯିବା ପାଇଁ ୮୩ ଲକ୍ଷ ଟଙ୍କା ବ୍ୟୟରେ ଟେଣ୍ଡର କରାଯାଇଛି। ଏଥିସହ ଶାଗୁଣାଘାଇର ପୁରୁଣା ନଦୀବନ୍ଧ ରାସ୍ତାରେ ଥିବା ଖାଲୁଆ ସ୍ଥାନକୁ ବନ୍ଦ କରିବାକୁ ୧୫.୬୬ ଲକ୍ଷ ଟଙ୍କା ବ୍ୟୟରେ ମଧ୍ୟ ଟେଣ୍ଡର ହୋଇଛି। ସେଠାରେ ନଦୀ ଗଭୀର ଥିବାବେଳେ ବର୍ତ୍ତମାନ ଜଳସ୍ତର କମିବାରେ ଲାଗିଛି। ତେବେ ଏହି କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ କରାଯାଇ ଜୁନ୍ ମାସ ମଧ୍ୟରେ ଶେଷ କରାଯିବ ବୋଲି ସେ କହିଛନ୍ତି।
