ଭୁବନେଶ୍ୱର,୧୧।୧(ବ୍ୟୁରୋ): ତମାଖୁ ସେବନ କ୍ୟାନ୍ସରର କାରଣ। ସିଗାରେଟ ଓ ଅନ୍ୟ ତମାଖୁ ବ୍ୟବହାରକାରୀଙ୍କ ପାଇଁ ଏପରି ସତର୍କତା ସତ୍ତ୍ୱେ ଲୋକେ ଏହାଠାରୁ ଦୂରେଇ ଯାଇପାରୁନାହାନ୍ତି। ନିଜେ ବିପଦକୁ ଆମନ୍ତ୍ରଣ କରିବା ସହ ସର୍ବସାଧାରଣ ସ୍ଥାନରେ ଧୂମପାନ କରି ସିଗାରେଟ ଆଣ୍ଡ୍ ଅଦର ଟବାକୋ ପ୍ରଡକ୍ଟ ଆକ୍ଟ (କୋଟ୍ପା) ୨୦୦୩ ଆଇନକୁ ଖୋଲାଖୋଲି ଉଲ୍ଲଂଘନ କରୁଛନ୍ତି। ରାଜଧାନୀର ହାଟବଜାରଠୁ ଗଳିକନ୍ଦି, ଡାକ୍ତରଖାନା, ସ୍କୁଲ୍, କଲେଜ, ଛକ, ବଜାର ସବୁଠି ସିଗାରେଟ ଧୂଆଁ ଅସହ୍ୟ ହେଉଛି। କମିଶନରେଟ ପୋଲିସ ସେପରି ପଦକ୍ଷେପ ନେଉ ନ ଥିବାରୁ ସହରବାସୀ ଅଜାଣତରେ କ୍ୟାନ୍ସର ଓ ଫୁସ୍ଫୁସ୍ଜନିତ ରୋଗର ଶିକାର ହେଉଛନ୍ତି। ଦିନକୁ ଦିନ ସହରୀ ଜୀବନ ମଧ୍ୟ ବିପଦ ମୁହଁକୁ ଠେଲି ହୋଇଯାଉଛି।
ଆକ୍ଟ ଅନୁସାରେ, ସର୍ବସାଧାରଣ ସ୍ଥାନରେ ଧୂମପାନ ବେଆଇନ। ଉଲ୍ଲଂଘନ କଲେ ଦଣ୍ଡ ରହିଛି। କିନ୍ତୁ ଦଣ୍ଡ ମିଳୁ ନ ଥିବାରୁ ଉଲ୍ଲଂଘନକାରୀମାନେ ଯେଉଁଠି ପାରିଲେ ସେଠି ସିଗାରେଟ ଧୂଆଁଛାଡି ପରିବେଶକୁ ପୂରା ବିଗାଡ଼ି ଦେଉଛନ୍ତି। କୋଟପାକୁ କଡ଼ାକଡ଼ି କରିବା ପାଇଁ ୨୦୧୩ରେ ରାଜ୍ୟ ସରକାର ତମାଖୁ ସେବନ ଉପରେ କଡ଼ା କଟକଣା ଲଗାଇଥିଲେ। ପୋଲିସ ପକ୍ଷରୁ ଏନ୍ଫୋର୍ସମେଣ୍ଟ ଟିମ୍ ଗଠନ କରାଯାଇ ଚଢ଼ାଉ ଆରମ୍ଭ ହୋଇଥିଲା। ୨୦୧୪ରେ ସର୍ବାଧିକ ୬୧୩୬ଜଣଙ୍କଠାରୁ ୫ଲକ୍ଷ ୯୦୦ଟଙ୍କା ଜରିମାନା ଆଦାୟ କରାଯାଇଥିଲା। ୨୦୧୫ରେ ୩୭୫୭ ଜଣଙ୍କଠାରୁ ୩ଲକ୍ଷ ୯୦୦ଟଙ୍କା, ୨୦୧୬ରେ ୧୮୧୦ଜଣଙ୍କ ଠାରୁ ୧ଲକ୍ଷ ୮୨ହଜାର ୭୦୦ଟଙ୍କା, ୨୦୧୭ରେ ୧୪୯୩ ଜଣଙ୍କ ଠାରୁ ୧ଲକ୍ଷ ୬୧ହଜାର ୫୦୦ଟଙ୍କା, ୨୦୧୮ରେ ୯୧୪ଜଣଙ୍କ ନିକଟରୁ ୯୨ହଜାର ୮୫୦ଟଙ୍କା, ୨୦୧୯ରେ ୪୬୩ ଜଣଙ୍କ ଠାରୁ ୫୨ହଜାର ୧୫୦ଟଙ୍କା ଓ ୨୦୨୦ରେ ମାତ୍ର ୫୦ଜଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ ମାତ୍ର ୫ହଜାର ୧୫୦ଟଙ୍କା ଜରିମାନା ଆଦାୟ କରାଯାଇଥିଲା। ହେଲେ ଏବେ ପୋଲିସ ପୂରା ନିଷ୍କ୍ରିୟ ହୋଇଯାଇଛି।
