ଯାଜପୁର ଅଫିସ,୧୯ା୮: ଯାଜପୁର ଜିଲାର ପ୍ରସିଦ୍ଧ ପର୍ଯ୍ୟଟନସ୍ଥଳୀ ବ୍ୟାସ ସରୋବରର ବିକାଶ ଏବଂ ସୌନ୍ଦର୍ଯ୍ୟକରଣ କାର୍ଯ୍ୟରେ ଏନ୍ଜିଟି (ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ) ମାମଲା ଉପରେ ଜିଲାପାଳ ସତ୍ୟପାଠ ଦାଖଲ କରିଛନ୍ତି। ୨୦୨ ପୃଷ୍ଠା ବିଶିଷ୍ଟ ଉକ୍ତ ସତ୍ୟପାଠରେ ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ମୁଖ୍ୟତଃ ଦର୍ଶାଇଛନ୍ତି, ପ୍ରକଳ୍ପ କାମ କୌଣସି ସନ୍ତସନ୍ତିଆ କିସମ ଜମିରେ ହେଉନାହିଁ ଏବଂ ପରିବେଶ ସୁରକ୍ଷା ପ୍ରତି କୌଣସି ବିପଦ ନାହିଁ। ଏହାସହ ପ୍ରକଳ୍ପର ନିର୍ମାଣ କାମ ୨୦ ହଜାର ବର୍ଗମିଟର ଅଞ୍ଚଳରେ ହେଉଥିବା ଅଭିଯୋଗର ସତ୍ୟତା ନାହିଁ ଏବଂ ଏହା ୨୫୦୦ ବର୍ଗ ମିଟର ପରିମିତ ଅଞ୍ଚଳରେ ହେଉଛି। ଅନ୍ୟପକ୍ଷେ କେତେକ ସୂଚନା ସ୍ପଷ୍ଟ ନ ଥିବା ଏବଂ ଆଞ୍ଚଳିକ ଓଡ଼ିଆ ଭାଷାରେ ଦିଆଯାଇଛି ବୋଲି ଏନ୍ଜିଟି ପକ୍ଷରୁ ଦର୍ଶାଯାଇଛି। ଏହିକ୍ରମରେ ଗୁରୁବାର ଏନ୍ଜିଟିର ଜଷ୍ଟିସ୍ ବି.ଅମିତ ସ୍ଥାଳେକର ଓ ଜୁଡିସିଆଲ ମେମ୍ବର ଶୈବାଳ ଦାସଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ପରବର୍ତ୍ତୀ ଶୁଣାଣି ୭ା୯ା୨୦୨୨ ପୂର୍ବରୁ ସ୍ପଷ୍ଟ ସୂଚନା ସହ ଅନୁବାଦିତ ରିପୋର୍ଟ ଏବଂ ଡିଭିଜନାଲ ଫରେଷ୍ଟ ଅଫିସର(ଡିଏଫ୍ଓ)ଙ୍କୁ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
ଏନଜିଟି ମାମଲା ସଂଖ୍ୟା ୧୦୩/୨୦୨୨/ଇଜେଡ୍ରେ ଆବେଦନକାରୀ ଦିଲୀପ କୁମାର ସାମନ୍ତରାୟ କରିଥିବା ଅଭିଯୋଗ ଅନୁଯାୟୀ, ବ୍ୟାସ ସରୋବର ପ୍ରକଳ୍ପରେ ଜଙ୍ଗଲ ଜମିର ଖାତା ଓ ପ୍ଲଟ ନମ୍ବର ୪୦, ଏରିଆ ୧୪ ଏକର, କିସମ ଝାଟି ଜଙ୍ଗଲ ଓ ପ୍ଲଟ ନମ୍ବର ୫୦ରେ ୧୬.୯୦ ଏକର ଝାଟି ଜଙ୍ଗଲ, ପ୍ଲଟ ନମ୍ବର ୬୨ରେ ୨.୨୪ ଏକର ସମୁଦାୟ ୩୩.୯୭ ଏକର ଜଙ୍ଗଲ ଜମି ରହିଛି। ସମୁଦାୟ ୧୦୫.୪୫ ଏକର ମଧ୍ୟରୁ ୩୭ ଏକର ସନ୍ତସନ୍ତିଆ ଜମି ବା ୱେଟଲାଣ୍ଡ ଜମି ରହିଛି। ଏହି ପ୍ରକଳ୍ପରେ ପାଚେରି, ପରିସ୍ରାଗାର, ମନ୍ଦିର ଉନ୍ନୟନ କାର୍ଯ୍ୟ, ପାର୍କିଂ, ଗେଟ କମ୍ଫ୍ଲେକ୍ସ, ଓଭରହେଡ ଟ୍ୟାଙ୍କ, ଶିଶୁ ଉଦ୍ୟାନ, ଜଳାଶୟ, ବ୍ରିଜ ଇତ୍ୟାଦି ନିର୍ମାଣ କରାଯାଉଛି। ନିର୍ମାଣ କାର୍ଯ୍ୟ ପ୍ରାୟ ୨୦ ହଜାର ବର୍ଗମିଟର ଅଞ୍ଚଳରେ ହେଉଛି। ଏଥିପାଇଁ ପରିବେଶ ମଞ୍ଜୁରୀର ଆବଶ୍ୟକ ରହିଥିବାବେଳେ ତାହା ପାଳନ କରାଯାଇ ନାହିଁ। ଏହି ଅଭିଯୋଗ ଉପରେ ଏନ୍ଜିଟି ଯାଜପୁର ଜିଲାପାଳ ଏବଂ କଟକ ଡିଏଫ୍ଓଙ୍କୁ ସତ୍ୟପାଠ ଦାଖଲ କରିବାକୁ ପୂର୍ବରୁ ନିର୍ଦ୍ଦେଶ ଦେଇଥିଲେ। ଏହାପରେ ଯାଜପୁର ଜିଲାପାଳ ୧୭ା୮ା୨୦୨୨ରେ ଏନଜିଟିରେ ସତ୍ୟପାଠ ଦାଖଲ କରିଥିଲେ। ଉକ୍ତ ସତ୍ୟପାଠରେ ଜିଲାପାଳ ଆହୁରି ଦର୍ଶାଇଛନ୍ତି, ପ୍ରକଳ୍ପରେ ଫୁଡ୍ କୋର୍ଟ ଏବଂ ଆଡମିନିଷ୍ଟ୍ରେଟିଭ ଜୋନ ପରିସରଭୁକ୍ତ ନୁହେଁ। ୧୦୦ ଏକରରୁ ଊର୍ଦ୍ଧ୍ୱ ଜମିରେ ଉକ୍ତ ପ୍ରକଳ୍ପ କାର୍ଯ୍ୟ ହେଉଛି। ପାଥୱେ, କମ୍ୟୁନିଟି ସେଣ୍ଟର, ରାସ୍ତା ଆଦି କାର୍ଯ୍ୟ ପାଇଁ ଡିଏଫ୍ଓଙ୍କ ଅନୁମତି ନିଆଯାଇଛି। ତେଣୁ ଜଙ୍ଗଲ ସୁରକ୍ଷା ଆଇନର କୌଣସି ଉଲ୍ଲଂଘନ ଏଥିରେ ହୋଇନାହିଁ। ଅଭିଯୋଗ ଅନୁସାରେ ଉକ୍ତ ପ୍ରକଳ୍ପ କାର୍ଯ୍ୟରେ ପ୍ରାକୃତିକ ଏବଂ ପ୍ରାକୃତିକ ଜମି ବ୍ୟବହାରରେ କୌଣସି କ୍ଷତି କରାଯାଉ ନାହିଁ। ତେଣୁ ଏଥିରେ ସରକାରୀ ଅର୍ଥ ଅପଚୟ ହେଉନାହିଁ। କେନ୍ଦ୍ର ସରକାରଙ୍କ ଗାଇଡଲାଇନ ଅନୁସାରେ ଜିଲା ଖଣିଜ ପଦାର୍ଥ ପ୍ରତିଷ୍ଠାନ(ଡିଏମ୍ଏଫ୍) ପାଣ୍ଠିରେ ଏହି ପ୍ରକଳ୍ପ ଅନୁମତିପ୍ରାପ୍ତ । ଏହି ପ୍ରକଳ୍ପ କାର୍ଯ୍ୟରେ ଗୋଟିଏ ବି ଗଛ କଟାଯାଇନାହିଁ। ଆବେଦନକାରୀଙ୍କ ଅଭିଯୋଗରେ ପ୍ରକଳ୍ପ ବାହାରର ଫଟୋ ଦର୍ଶାଯାଇଛି। ଏହାବାଦ୍ ବେଆଇନ ମୋରମ ଖାଦାନ ଅଭିଯୋଗ ସଂକ୍ରାନ୍ତରେ ଜିଲାପାଳ ତାଙ୍କ ସତ୍ୟପାଠରେ ଦର୍ଶାଇଛନ୍ତି, ଏହି ଅଭିଯୋଗ ସମ୍ପୂର୍ଣ୍ଣ ମିଥ୍ୟା ଏବଂ ପ୍ରକଳ୍ପର ପୋଖରୀ ଖନନରେ ସାଧାରଣ ମାଟି ଅପସାରଣ କରାଯାଉଛି। ପ୍ରକଳ୍ପରେ ବ୍ୟବହାର ହେଉଥିବା ଲଘୁ ଖଣିଜ ଦ୍ରବ୍ୟ ସ୍ବତନ୍ତ୍ର ଭାବେ ଠିକାଦାରଙ୍କ ଠାରୁ କିଣାଯାଉଛି। ଗଣ୍ଡନାଳାର ଦିଗ ପରିବର୍ତ୍ତନ ଅଭିଯୋଗ ମଧ୍ୟ ସତ୍ୟ ନୁହେଁ। ଏହି ପ୍ରକଳ୍ପ ଅଞ୍ଚଳର ପାଣି ଗଣ୍ଡନାଳାରେ ମିଶିଥାଏ। ବ୍ୟାସ ସରୋବର ପ୍ରକଳ୍ପ ବାରମାସୀ ଜଳଉସତ୍ରେ ନିର୍ମାଣ ହେଉଛି। ସନ୍ତସନ୍ତିଆ କିସମ ଜମିରେ ପ୍ରକଳ୍ପ କାର୍ଯ୍ୟ ଅଭିଯୋଗରେ ମଧ୍ୟ କୌଣସି ସତ୍ୟତା ନାହିଁ। ଏଭଳି ଅନେକ ଅଭିଯୋଗ ଉପରେ ପ୍ରମାଣ ସହ ଜିଲାପାଳ ସତ୍ୟପାଠ ଦାଖଲ କରିଛନ୍ତି। କିନ୍ତୁ ଉକ୍ତ ସତ୍ୟପାଠରେ କେତୋଟି ସୂଚନା ସ୍ପଷ୍ଟ ନ ଥିବା କାରଣରୁ ମାମଲାର ପରବର୍ତ୍ତୀ ଶୁଣାଣି ୭ା୯ା୨୦୨୨ରେ ଏନ୍ଜିଟି ଧାର୍ଯ୍ୟ କରିଛନ୍ତି।
ସୂଚନାଯୋଗ୍ୟ, ଏହି ପ୍ରକଳ୍ପ କାମ ଏନ୍ବିସିସି (ନ୍ୟାଶନାଲ ବିଲ୍ଡିଂ କନଷ୍ଟ୍ରକ୍ସନ କର୍ପୋରେଶନ) ଜରିଆରେ ଦିଲ୍ଲୀର କ୍ରିଷ୍ଣା ବିଲ୍ଡର ଠିକାସଂସ୍ଥା ନିୟୋଜିତ ହୋଇଛି। ଏଥିପାଇଁ ଡିଏମ୍ଏଫ୍ରୁ ୬୪ କୋଟି ଟଙ୍କା ମଞ୍ଜୁର ହୋଇଛି। ତେବେ ଏହି ନିର୍ମାଣ କାର୍ଯ୍ୟରେ ପ୍ରଥମରୁ ବ୍ୟାପକ ଅନିୟମିତତା ଏବଂ ବ୍ଲୁପ୍ରିଣ୍ଟ ଅନୁଯାୟୀ କାମ ହେଉ ନ ଥିବା ଅଭିଯୋଗ ହୋଇ ଆସୁଛି।
