ଗୋପ,୨୬।୨(ଡି.ଏନ୍.ଏ.): ସରକାର ଗ୍ରାମାଞ୍ଚଳର ବିକାଶ ଉପରେ ବିଶେଷ ଗୁରୁତ୍ୱ ଦେଉଥିବା ବେଳେ ବ୍ଲକ ପ୍ରଶାସନ ଓ ପଞ୍ଚାୟତରେ ଲୋକ ପ୍ରତିନିଧିମାନଙ୍କ ମଧ୍ୟରେ ସମନ୍ବୟ ଅଭାବରୁ ଅଧିକାଂଶ ପଞ୍ଚାୟତରେ ସରକାରୀ କାର୍ଯ୍ୟ ଠିକ ଭାବେ ହୋଇପାରୁ ନାହିଁ। ଏହାର ନିଚ୍ଛକ ଉଦାହରଣ ପୁରୀ ଜିଲା ଗୋପ ବ୍ଲକରେ ଦେଖିବାକୁ ମିଳୁଛି। ପ୍ରଶାସନ ଓ ଲୋକ ପ୍ରତିନିଧିଙ୍କ ମଧ୍ୟରେ ବୁଝାମଣା ଅଭାବରୁ ବ୍ଲକର ପ୍ରତି ପଞ୍ଚାୟତରେ ହେବାକୁ ଥିବା ପାର୍କ ଓ ପାଠାଗାର ପାଇଁ ସ୍ଥାନ ମିଳିପାରୁ ନାହିଁ। ଏଭଳି ଅଭିଯୋଗ ଗୁରୁବାର ଗୋପ ବ୍ଲକ ବୈଠକ ଗୃହରେ ଅନୁଷ୍ଠିତ ସମୀକ୍ଷା ବୈଠକରେ ହୋଇଥିଲା। ବୈଠକରେ ଜିଲା ପ୍ରକଳ୍ପ ନିର୍ଦ୍ଦେଶକ ରବିନାରାୟଣ ତ୍ରିପାଠୀ (ପ୍ରଶାସକ), ଅତିରିକ୍ତ ଜିଲା ନିର୍ଦ୍ଦେଶକ ରୋଜାଲିନ ପଣ୍ଡା (ରୁରାଲ ହାଉସିଂ), ବିଡିଓ ଦୀପ୍ତିରାଣୀ ଦାସ, ବ୍ଲକ ସହକାରୀ ଯନ୍ତ୍ରୀ ଅଜୟ କୁମାର ପ୍ରଧାନ, ଅଶୋକ ପୁଷ୍ଟି, ବ୍ଲକ କନିଷ୍ଠ ଯନ୍ତ୍ରୀ ପଙ୍କଜ ରାଜ ମିଞ୍ଜି, ପ୍ୟାରୀମୋହନ ବିଶ୍ୱାଳ ପ୍ରମୁଖ ଯୋଗ ଦେଇଥିଲେ। ପାର୍କ ଲାଗି ଗୋପ, ରାହାଙ୍ଗଗୋରଡା, ଡଭାର, ଛଇତନା, ଇସାଣପୁର, ସମେତ ୨୫ଟି ପଞ୍ଚାୟତରେ ସ୍ଥାନର ଅଭାବ ଥିବା ବେଳେ ପାଠାଗାର ନିର୍ମାଣ ପାଇଁ ମଧ୍ୟ ସମସ୍ୟା ରହିଛି। ପଞ୍ଚାୟତର ଲୋକ ପ୍ରତିନିଧି ଓ ଜମିର ଅଭାବ ଥିବାରୁ ବିଡିଓ ଦାସ ସମସ୍ତ ପଞ୍ଚାୟତ ପ୍ରତିନିଧିଙ୍କୁ ନେଇ ଏକ ବୈଠକ ପୂର୍ବରୁ କରିଥିଲେ ମଧ୍ୟ ଲୋକ ପ୍ରତିନିଧିମାନେ ଏପର୍ଯ୍ୟନ୍ତ କୌଣସି ଠିକ ନିଷ୍ପତ୍ତି ନେଇପାରି ନାହାନ୍ତି। ଏହାକୁ ନେଇ ଜିଲାପାଳ ସମର୍ଥ ବର୍ମା ଜାନୁୟାରୀ ୩୦ ରେ ଗୋପ ବ୍ଲକର ସମସ୍ତ ସରପଞ୍ଚ, ବ୍ଲକ ଅଧିକାରୀଙ୍କୁ ନେଇ ପୁରୀ ଭକ୍ତ ନିବାସ ପରିସରରେ ଏକ ସମୀକ୍ଷା ବୈଠକ କରିବା ସହ ତୁରନ୍ତ ଏହି କାର୍ଯ୍ୟର ନିର୍ମାଣ କରିବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ଗୁରୁବାର ଅନୁଷ୍ଠିତ ବୈଠକରେ କିପରି କାର୍ଯ୍ୟ ସବୁ ତୁରନ୍ତ ଆରମ୍ଭ କରାଯିବ ସେଥିପ୍ରତି ଗୁରୁତ୍ୱାରୋପ ଦିଆଯାଇଛି। ଏ ନେଇ ବିଡିଓ ଦାସ କହିଛନ୍ତି, ଏବେ କେବଳ ପାର୍କ ପାଇଁ ଜମି ସମସ୍ୟା ରହିଛି। ପାଠାଗାର ଲାଗି ପ୍ରତି ପଞ୍ଚାୟତର କାର୍ଯ୍ୟାଳୟ ଉପରେ ଗୃହ ନିର୍ମାଣ କରାଯିବକୁ ଥିବାବେଳେ ଖେଳପଡ଼ିଆ ଲାଗି ସମସ୍ୟା ନାହିଁ ବୋଲି କହିଛନ୍ତି।
