ନୂଆଦିଲ୍ଲୀ,୯।୫: ଦେଶଦ୍ରୋହ ଆଇନ ଉଚ୍ଛେଦକୁ କେନ୍ଦ୍ର ସରକାର ବିରୋଧ କରିଛନ୍ତି। ଉକ୍ତ ଆଇନ ଆଧାରରେ ଦିଆଯାଇଥିବା ରାୟର ପୁନଃ ସମୀକ୍ଷା ଆବଶ୍ୟକ ନାହିଁ। ସର୍ବୋଚ୍ଚ ଅଦାଲତଙ୍କ ୬ ଦଶନ୍ଧି ତଳର ରାୟରେ ଧାରା ୧୨୪ଏର ବୈଧତାକୁ କାଏମ ରଖାଯାଇଥିଲା। ଏହା ଏକ ଭଲ ଆଇନ ଏବଂ ସମ୍ବିଧାନର ଅଧିକାର ଓ ରାଷ୍ଟ୍ରର ଆବଶ୍ୟକତା ମଧ୍ୟରେ ସନ୍ତୁଳନ ରକ୍ଷା କରୁଛି ବୋଲି କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ ଜଣାଇଛନ୍ତି।
ଦେଶଦ୍ରୋହ ଆଇନର ବୈଧତାକୁ ଚ୍ୟାଲେଞ୍ଜ କରି ଏକାଧିକ ପିଟିଶନ ଦାଏର ହୋଇଥିଲା। ଏହାକୁ ସାମ୍ବିଧାନିକ ବେଞ୍ଚ୍କୁ ପଠାଯିବ କି ନାହିଁ ପ୍ରସଙ୍ଗ ଉପରେ ସଲିସିଟର ଜେନେରାଲ ତୁଷାର ମେହେଟ୍ଟା ଯୁକ୍ତି ବାଢ଼ିଛନ୍ତି, ୧୯୬୨ର ରାୟ ଗୁରୁତ୍ୱପୂର୍ଣ୍ଣ ଓ ଏହାର ପୁନର୍ବିଚାର କରିବା ଆବଶ୍ୟକ ନାହିଁ। ଅପବ୍ୟବହାର ନେଇ ଆବେଦନକାରୀମାନେ ଆଣିଥିବା ଅଭିଯୋଗ ଆଧାରରେ ଉକ୍ତ ଆଇନକୁ ଉଚ୍ଛେଦ କରାଯାଇପାରିବ ନାହିଁ।
