ନୂଆଦିଲ୍ଲୀ,୧୪।୮: ଏଣିକି ଫେକ୍ ଭୋଟିଂ ଆଉ କରାଯାଇ ପାରିବ ନାହିଁ। ଖୁବ୍ ଶୀଘ୍ର ଏନେଇ କେନ୍ଦ୍ର ସରକାରଙ୍କ ପକ୍ଷରୁ ନୂଆ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ। ଏଥିପାଇଁ ସରକାରଙ୍କୁ କିଛି ଆଇନରେ ସଂଶୋଧନ କରିବାକୁ ପଡିବ। ଏହା ସହିତ, ଡାଟା ସୁରକ୍ଷା ପାଇଁ ଏକ ଫ୍ରେମ୍ଓ୍ବାର୍କ ପ୍ରସ୍ତୁତ ହେବାକୁ ପଡିବ। ଆସନ୍ତା ବର୍ଷ ପାଞ୍ଚଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଏଭଳି ପଦକ୍ଷେପ ଗ୍ରହଣ କରିବାର ସମ୍ଭାବନା ରହିଛି। ଏକରୁ ଅଧିକ ସ୍ଥାନରେ ଭୋଟ ତାଲିକାରେ ପଞ୍ଜିକରଣକୁ ରୋକିବା ପାଇଁ ଏହି ପ୍ରସ୍ତାବିତ ପଦକ୍ଷେପ ଗ୍ରହଣ କରାଯିବ। ଏହି ପ୍ରସ୍ତାବକୁ କାର୍ଯ୍ୟକାରୀ କରିବାରେ କେତେକ ଆଇନଗତ ବାଧା ମଧ୍ୟ ସୃଷ୍ଟି ହୋଇପାରେ । ଏନେଇ ବହୁ ପରିବର୍ତ୍ତନ ମଧ୍ୟ କରିବାକୁ ହେବ। ସୂଚନାନୁସାରେ, ସରକାର ଏଥିପାଇଁ ପ୍ରସ୍ତୁତ ହେଉଛନ୍ତି। ତେବେ ଭୋଟ ତାଲିକାକୁ ଆଧାର ନମ୍ବର ସହିତ ଯୋଡିବା ପାଇଁ କେନ୍ଦ୍ରକୁ ଲୋକ ପ୍ରତିନିଧି ଅଧିନିୟମ ତଥା ଆଧାର ଅଧିନିୟମରେ ସଂଶୋଧନ କରିବାକୁ ପଡିବ। ଏହାର ବଡ କାରଣ ହେଉଛି ୨୦୧୫ରେ ସୁପ୍ରିମକୋର୍ଟ ଆଧାର ଅଧିନିୟମର ବୈଧତା ଉପରେ ରାୟ ଦେଇ କହିଥିଲେ ଯେ, ଆଧାରର ୧୨ ଅଙ୍କ ବିଶିଷ୍ଟ ଆଇଡି କେବଳ ସରକାରୀ କଲ୍ୟାଣକାରୀ ଯୋଜନା ତଥା ଅନ୍ୟାନ୍ୟ ସୁବିଧା ପାଇଁ ବ୍ୟବହାର କରାଯିବ। ସେହି ସମାନ ରାୟରେ ସୁପ୍ରିମକୋର୍ଟ କହିଛନ୍ତି, ଯଦି ସରକାର ଭୋଟର ତାଲିକାକୁ ଆଧାର ସହିତ ଯୋଡିବାକୁ ଚାହାଁନ୍ତି, ତେବେ ଏଥିପାଇଁ ଆଇନଗତ ସହାୟତା ନେବାକୁ ପଡ଼ିବ। ସୂଚନାଯୋଗ୍ୟ ୨୦୧୯ରେ ଗୋପନୀୟତାକୁ ଏକ ମୌଳିକ ଅଧିକାର ଭାବରେ ଘୋଷଣା କରିବାକୁ ସୁପ୍ରିମ୍କୋର୍ଟ ସରକାରଙ୍କୁ ତଥ୍ୟ ସୁରକ୍ଷା ପାଇଁ ଏକ ଆଇନ ପ୍ରଣୟନ କରିବାକୁ କହିଥିଲେ। ଏହା ପରେ ସରକାର ଡାଟା ସୁରକ୍ଷା ବିଲ ପ୍ରସ୍ତୁତ କରିଛନ୍ତି। ସଂସଦୀୟ କମିଟି ଏହା ଉପରେ ଏବେ ବିଚାର କରୁଛନ୍ତି। ଏନେଇ ଆଇନଗତ ପ୍ରତିବନ୍ଧକକୁ ମଧ୍ୟ ଦୂର କରିବାକୁ ପଡ଼ିବ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
