କେନ୍ଦୁଝର,୨।୭ (ସ୍ବ.ପ୍ର.)-କେନ୍ଦୁଝର ଜିଲାରେ ଚାଷୀଙ୍କୁ ମିଳୁନି ସରକାରୀ ବିହନ। ଚାଷ ପାଇଁ ଚାଷୀ ଅଣ୍ଟା ଭିଡ଼ି କ୍ଷେତ ପ୍ରସ୍ତୁତ କରି ସାରିଥିବା ବେଳେ ବିହନ ମିଳୁ ନ ଥିବାରୁ ଚିନ୍ତାରେ ରହିଛନ୍ତି। ବିକ୍ରୟ କେନ୍ଦ୍ର ତଥା ଲ୍ୟାମ୍ପ୍ସରୁ ବିହନ ନ ପାଇ ଚାଷୀମାନେ ଖାଲି ହାତରେ ଫେରୁଛନ୍ତି। ଚାଷ ସମୟ ଗଡ଼ି ଯାଉଥିବାରୁ ଅନେକ ଚାଷୀ ବାଧ୍ୟ ହୋଇ ବାହାରୁ ଚଢା ଦରରେ ବିହନ କିଣୁଛନ୍ତି।
ପାଗ ଅନୁକୂଳ ହୋଇଥିବାରୁ ଚାଷୀମାନେ ହଳ ଓ ତଳିପକା କାମ ଆରମ୍ଭ କଲେଣି। ଧାନ ବିହନ ମିଳିଲେ ତଳି ପଡ଼ିବ ଓ ପରେ ଧାନ ରୁଆ ହେବ। ତେବେ ବିହନ ପାଇଁ ଲ୍ୟାମ୍ପ୍ସଠାରୁ ଆରମ୍ଭ କରି କୃଷି ବିଭାଗ ଅଫିସ ଯାଉଥିଲେ ହେଁ ବିହନ ମିଳୁନାହିଁ। ଏଣୁ ବାଧ୍ୟ ହୋଇ ଅଧିକ ମୂଲ୍ୟରେ ବିହନ କିଣିବାକୁ ପଡୁଛି। ସରକାର କୃଷିକୁ ପ୍ରାଧାନ୍ୟ ଦେଇ ବହୁ ଯୋଜନା ପ୍ରଚାର ପ୍ରସାର କରୁଥିବା ବେଳେ ଚାଷୀଙ୍କ ପାଖରେ ବିହନ ନ ପହଞ୍ଚତ୍ବା କୃଷକମାନଙ୍କ ପ୍ରତି ସରକାରଙ୍କ ଆଭିମୁଖ୍ୟକୁ ନେଇ ସ୍ଥାନୀୟବାସୀ ପ୍ରଶ୍ନ ଉଠାଇଛନ୍ତି। ବିଭିନ୍ନ ଲ୍ୟାମ୍ପ ଓ ବିହନ ବିକ୍ରୟ କେନ୍ଦ୍ର ଜରିଆରେ ବିହନ ବିକ୍ରି ହେଉଥିବା ନେଇ କୃଷି ବିଭାଗ ସ୍ପଷ୍ଟ କରୁଛି। ତେବେ ଚାଷୀଙ୍କୁ ସାର୍ଟିଫାଏଡ୍ ବା ସ୍ବୀକୃତିପ୍ରାପ୍ତ ବିହନ ମିଳି ନାହିଁ। ଯେଉଁମାନେ ପାଇଛନ୍ତି ସେମାନଙ୍କ ମଧ୍ୟରୁ କେତେକ ତଳି ପାଇଁ ଧାନ ବୁଣିଥିଲେ ହେଁ ସେଥିରୁ ଗଜା ବାହାରୁ ନ ଥିବା ଘଷିପୁରା ଅଞ୍ଚଳର ବହୁ ଚାଷୀ ଅଭିଯୋଗ କରିଛନ୍ତି। ଏ ସମ୍ପର୍କରେ କୃଷି ଉପନିର୍ଦ୍ଦେଶକ ଶରତ ଦାସ କହିଛନ୍ତି ଯେ, ବିଭିନ୍ନ ଲ୍ୟାମ୍ପ୍ସ ଓ ପ୍ୟାକ୍ସକୁ ବିକ୍ରୟ ପାଇଁ ୭,୪୦୦ କୁଇଣ୍ଟାଲ ବିହନ ଦିଆଯାଇଛି। ବିହନ ନିଗମ ପାଖରେ ଆଉ ୭୦୦ କୁଇଣ୍ଟାଲ ଧାନ ବିହନ ଅଛି। ଚାଷୀଙ୍କ ଆବଶ୍ୟକତାକୁ ଦେଖି ବିଭିନ୍ନ ଲ୍ୟାମ୍ପ୍ସକୁ ଦିଆଯିବ। ତେବେ କୃଷି ବିଭାଗ କହିବା ପରେ ମଧ୍ୟ ଲ୍ୟାମ୍ପ୍ସକୁ ବିହନ ଆସୁ ନ ଥିବାରୁ ଚାଷୀମାନେ ଚିନ୍ତାରେ ରହି ପ୍ୟାକେଟ ପିଛା ୧୦୦ ଟଙ୍କାରୁ ଅଧିକ ମୂଲ୍ୟରେ କିଣିବାକୁ ବାଧ୍ୟ ହେଉଛନ୍ତି। ସରକାରୀ ବିହନ ଚାଷୀଙ୍କ ପାଖରେ ପହଞ୍ଚତ୍ ପାରୁ ନ ଥିବାରୁ କଳାବଜାର ହେଉଥିବା ଆଶଙ୍କା କରାଯାଉଛି ା ଏଣୁ ଏନେଇ ପଦକ୍ଷେପ ନେବା ସହ ଧରପଗଡ଼ କରି ବିହନ ଦେବା ବ୍ୟବସ୍ଥା କରିବାକୁ ଚାଷୀମାନେ ଦାବି କରିଛନ୍ତି।
