କଟକ ଅଫିସ,୧୨। ୯: କଟକ ଜିଲାରେ ଜଣେ ପ୍ରାଣୀଧନ ନିରୀକ୍ଷକଙ୍କ କରୋନା ଜନିତ ମୃତ୍ୟୁ ହୋଇଥିବା ଆଶଙ୍କା କରି ଜିଲା ପ୍ରାଣୀଧନ ନିରୀକ୍ଷକ ସଂଘ କ୍ଷେତ୍ର ପରିଦର୍ଶନ କାମ ଆସନ୍ତା ୧୨ତାରିଖରୁ ବର୍ଜନ କରିବାକୁ ନିଷ୍ପତ୍ତି ନେଇଛି। ଶୁକ୍ରବାର ଜିଲା ପ୍ରାଣୀଧନ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଆୟୋଜିତ ଏକ ଖବରଦାତା ସମ୍ମିଳନୀରେ ସଂଘ ସଭାପତି ରୁଦ୍ର କୁମାର ସାହୁ କହିଛନ୍ତି, କରୋନା କଟକଣାର ଊର୍ଦ୍ଧ୍ୱରେ ରହି କାମ କରିବା ଦ୍ୱାରା ଆମର ଜଣେ ସହକର୍ମୀଙ୍କ ମୃତ୍ୟୁ ହୋଇଛି। ବିଭାଗ କ୍ଷେତ୍ରୀୟ କର୍ମଚାରୀମାନଙ୍କୁ ବିଭିନ୍ନ ସମୟରେ ସରକାରୀ ପ୍ରକଳ୍ପଗୁଡିକ ଧାର୍ଯ୍ୟ ସମୟ ମଧ୍ୟରେ ଶେଷ କରିବାକୁ କଣ୍ଟ ଦେଇଥାଏ। ବିଶେଷକରି ଏହି କରୋନା ସମୟରେ ଜାତୀୟ ପ୍ରାଣୀ ରୋଗ ନିୟନ୍ତ୍ରଣ କାର୍ଯ୍ୟକ୍ରମ, କୃତ୍ରିମ ପ୍ରଜନନ ଆଦି ଯୋଜନାକୁ ସଫଳ କରିବାକୁ ବାର୍ଷିକ ଧାର୍ଯ୍ୟ ଲକ୍ଷ୍ୟ ଛୁଇଁବା ପାଇଁ କାମ କରିବାକୁ ନିର୍ଦ୍ଦେଶ ଦେଇଥିଲା। ଏହାସହ କୋଭିଡ୍ କଟକଣା ନିୟମର ବାହାରକୁ ଯାଇ କାମ କରିବାକୁ କୁହାଯାଉଥିଲା। ଫଳରେ କାମ କରିବା ସମୟରେ ସଂଘର କର୍ମକର୍ତ୍ତାମାନେ ବାରମ୍ବାର ସଂକ୍ରମିତ ହେଉଛନ୍ତି। ତେଣୁ ଗତ ୨୬ ତାରିଖରୁ ଜଣେ କର୍ମଚାରୀ ସଂକ୍ରମିତ ହୋଇ ଦୀର୍ଘଦିନ ଜ୍ୱରରେ ପଡିବା ପରେ ଗୁରୁବାର ହସ୍ପିଟାଲରେ ତାଙ୍କ ମୃତ୍ୟୁ ଘଟିଛି।
ସଂଘର ସୂଚନା ଅନୁଯାୟୀ, ସନ୍ତୋଷ କୁମାର ଜେଠୀ କଟକ ଜିଲା ଉରାଳୀରେ ପ୍ରାଣୀଧନ ନିରୀକ୍ଷକ ଭାବେ କାର୍ଯ୍ୟରତ ଥିଲେ। ନିୟମିତ କ୍ଷେତ୍ରୀୟ କାର୍ଯ୍ୟ କରିବାବେଳେ ଗତ ୨୬ ତାରିଖ ପରଠୁ ଜ୍ୱରରେ ପଡିଥିଲେ। ପରିବାର ଲୋକେ ତାଙ୍କ ଚିକିତ୍ସା କରାଇଥିଲେ ବି ଗତ ମଙ୍ଗଳବାର ସ୍ବାସ୍ଥ୍ୟାବସ୍ଥା ଖରାପ ହେବାକୁ ଲାଗିଲା। ତେଣୁ ଅଧିକ ଚିକିତ୍ସା ପାଇଁ ତାଙ୍କୁ ଏସ୍ସିବି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କ ସ୍ବାବ ପରୀକ୍ଷା କରାଯିବା ସହ କରୋନା ସମ୍ବନ୍ଧୀୟ ଚିକିତ୍ସା କରାଯାଇଥିଲା। କିନ୍ତୁ ଗୁରୁବାର ଅପରାହ୍ନରେ ତାଙ୍କ ମୃତ୍ୟୁ ଘଟିଥିଲା। ତେଣୁ ଜେଠୀଙ୍କୁ କରୋନା ଯୋଦ୍ଧା ଘୋଷଣା କରିବାକୁ ଦାବୀ ରଖିବା ସହ ତାଙ୍କ ପରିବାର ଲୋକଙ୍କୁ ୫୦ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିବାକୁ ଦାବି ହୋଇଛି। ଏହି କ୍ରମରେ ମୃତକଙ୍କ ପରିବାରକୁ ନ୍ୟାୟ ନ ମିଳିବା ପର୍ଯ୍ୟନ୍ତ ସଂଘ କାର୍ଯ୍ୟ ଦିବସରେ କେବଳ ଅଫିସରେ ରହି କାମ କରିବେ। ଏଣିକି ଘରକୁ ଘର ବୁଲି ସଂଘର ଆଉ କେହି ସଦସ୍ୟ କାମ କରିବେ ନାହିଁ ବୋଲି ଚେତାବନୀ ଦିଆଯାଇଛି। ଏହି ଅବସରରରେ କଟକ ଜିଲାର ସମସ୍ତ ସଦସ୍ୟ ଉପସ୍ଥିତ ରହି ଜିଲା ପ୍ରାଣୀ ଚିକିତ୍ସା ଅଧିକାରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଥିଲା। ଏ ସମ୍ବନ୍ଧରେ ଜିଲା ପ୍ରାଣୀ ଚିକିତ୍ସା ଅଧିକାରୀ ଡା. କେଶବ ଚନ୍ଦ୍ର ପ୍ରଧାନ କହିଛନ୍ତି, ଜେଠୀଙ୍କ ବିୟୋଗ ଏକ ଦୁଃଖର ବିଷୟ। ବାକି ସମସ୍ତଙ୍କୁ ସମାନ କାମ ଦିଆଯାଉଛି। ସରକାରୀ ନିର୍ଦ୍ଦେଶ ସମସ୍ତଙ୍କୁ ପାଳନ କରିବାକୁ ହେବ। ସରକାରୀ ବ୍ୟବସ୍ଥା ମଧ୍ୟରେ ଯାହା ସମ୍ଭବ ହେବ ସେତିକି ଜେଠୀଙ୍କ ପରିବାର ପାଇଁ କରାଇବାକୁ ଚେଷ୍ଟା କରିବି।
