ନିଶ୍ଚିନ୍ତକୋଇଲି,୨୫ା୭(ସ୍ବ.ପ୍ର.): କଟକ ଜିଲାର ଅନ୍ୟତମ ପ୍ରମୁଖ ହାଟ ନିଶ୍ଚିନ୍ତକୋଇଲିରେ ଅବସ୍ଥିତ। ଏହି ହାଟକୁ କଟକ, କେନ୍ଦ୍ରାପଡା, ଜଗତ୍ସିଂହପୁର ଓ ଯାଜପୁର ଜିଲାର ଚାଷୀ ଓ ବ୍ୟବସାୟୀମାନେ ଆସି ବ୍ୟବସାୟ କରିଥାନ୍ତି। ଉକ୍ତ ହାଟକୁ ଅତ୍ୟାଧୁନିକ ରୂପ ଦେବା ପାଇଁ ଏବେ ୪୦ ଲକ୍ଷ ଟଙ୍କା ବ୍ୟୟବରାଦ କରାଯାଇଛି। ମାତ୍ର ଏପର୍ଯ୍ୟନ୍ତ ଏହାର ଚତୁଃପାର୍ଶ୍ୱ ପ୍ରତି କାହାର ନଜର ନାହିଁ। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ନିଶ୍ଚିନ୍ତକୋଇଲି ହାଟରେ ପଞ୍ଚାୟତ ପକ୍ଷରୁ ୩୦ ଲକ୍ଷ ଟଙ୍କା ବ୍ୟୟରେ ଦୋକାନ ଘର ନିର୍ମାଣ କରାଯାଉଥିବା ବେଳେ ପଞ୍ଚାୟତ ସମିତି ପକ୍ଷରୁ ୧୦ ଲକ୍ଷ ଟଙ୍କା ବ୍ୟୟ ବରାଦରେ ଅନ୍ୟ ଏକ ମାର୍କେଟ ଘର ନିର୍ମାଣ ଚାଲିଛି। ହାଟର ଉନ୍ନତୀକରଣ ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଉଥିବାବେଳେ ଜବରଦଖଲ ଉଚ୍ଛେଦ ପାଇଁ ଉଦ୍ୟମ କରାଯାଉନାହିଁ। ହାଟର ଦକ୍ଷିଣ ପାର୍ଶ୍ୱରେ ଥିବା ବ୍ୟବସାୟୀମାନେ ହାଟକୁ ଜବରଦଖଲ କରି ରଖିବା ସହ ହାଟ ଭିତରକୁ ଅପରିସ୍କାର ପାଣି ଛାଡ଼ୁଛନ୍ତି। ସେହିପରି ହାଟର ପୂର୍ବ ପାର୍ଶ୍ୱରେ ଥିବା ବ୍ୟବସାୟୀମାନେ ନିଜର ପିଣ୍ଡା ଓ ବାରଣ୍ଡାକୁ ହାଟ ଭିତରକୁ ମଡାଇ ରାସ୍ତା ଅବରୋଧ କରିଛନ୍ତି। ଫଳରେ ହାଟ ଭିତରେ ଗମନାଗମନ ବାଧାପ୍ରାପ୍ତ ହେଉଛି।
ଅପରପକ୍ଷେ ହାଟରେ ଶୌଚାଳୟ, ପାନୀୟ ଜଳ ଯୋଗାଣା ଓ ଉଜ୍ଜ୍ୱଳ ଆଲୋକୀକରଣ ପାଇଁ ସେଭଳି କୌଣସି ବ୍ୟବସ୍ଥା ହୋଇନାହିଁ। ସେଠାରେ ଏସବୁ ବ୍ୟବସ୍ଥା କରିବା ପାଇଁ ଚାଷୀମାନେ ଦାବି କରିଛନ୍ତି। ପୂର୍ବରୁ ହାଟ ଦାୟିତ୍ୱ କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ଉପରେ ଥିଲା। ମାତ୍ର ସେତେବେଳେ ହାଟର ଉନ୍ନତୀକରଣ ପାଇଁ କୌଣସି କାର୍ଯ୍ୟ ହୋଇ ନ ଥିଲା। ଏହାପରେ ନିଶ୍ଚିନ୍ତକୋଇଲି ପଞ୍ଚାୟତ ହାଟର ଦାୟିତ୍ୱ ନେଇଥିଲା। ଏବେ ପଞ୍ଚାୟତ ପକ୍ଷରୁ କିଭଳି କାର୍ଯ୍ୟ ହେଉଛି ତାହା ଦେଖିବାକୁ ବାକି ରହିଲା।
ଏ ସମ୍ପର୍କରେ ସରପଞ୍ଚ ରବୀନ୍ଦ୍ର ସେଠୀ କହିଛନ୍ତି, ହାଟର ଉନ୍ନତୀକରଣ ପାଇଁ ବ୍ୟୟ ବରାଦ କରାଯାଇଛି। ସ୍ଥାନୀୟ ବିଧାୟକ ତଥା ମନ୍ତ୍ରୀ ପ୍ରତାପ ଜେନା ଏଥିପାଇଁ ୧ କୋଟି ଟଙ୍କା ବ୍ୟୟ ବରାଦ କରିବାକୁ ପ୍ରତିଶ୍ରୁତି ଦେଇଛନ୍ତି। ଟଙ୍କା ଆସିଲେ ଉନ୍ନୟନ କାର୍ଯ୍ୟକୁ ତ୍ୱରାନିତ କରାଯିବ। ଏହାଛଡ଼ା ହାଟ ଚତୁଃପାର୍ଶ୍ୱରୁ ଜବରଦଖଲ ଉଚ୍ଛେଦ ପାଇଁ ତହସିଲଦାରଙ୍କୁ ନିବେଦନ କରାଯାଇଛି ବୋଲି ସେଠୀ କହିଛନ୍ତି।
