ବୁଗୁଡ଼ା,୧୧ା୧୨(କାଳି ଚରଣ ଦାଶ): ସରକାର ସ୍ବାସ୍ଥ୍ୟ ସେବାକୁ ପ୍ରାଥମିକତା ଦେଉଥିବା କହୁଥିବା ବେଳେ ୩ ଲକ୍ଷରୁ ଉର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ବୁଗୁଡ଼ା ବ୍ଲକରେ ରୋଗୀ ସେବା ବିପର୍ଯ୍ୟସ୍ତ ହୋଇପଡିଛି। ବୁଗୁଡ଼ାରେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ସମେତ କରଚୁଲି, ବାଲିପଦର ଓ ଏ. କରଡ଼ାବାଡ଼ିଠାରେ ଥିବା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଆବଶ୍ୟକ ଡାକ୍ତର ଓ କର୍ମଚାରୀ ନଥିବାରୁ ଗର୍ଭବତୀ ଶିଶୁ ଓ ମହିଳାଙ୍କଠାରୁ ଆରମ୍ଭ କରି ସାଧାରଣ ରୋଗୀ ଚିକିତ୍ସା ସୁବିଧା ପାଇ ପାରୁନଥିବା ଅଭିଯୋଗ ହେଉଛି। ବୁଗୁଡ଼ା ଡାକ୍ତରଖାନାର ପୁରୁଣା କୋଠା ଭଙ୍ଗାଯାଇ ୧ କୋଟି ୮୬ ଲକ୍ଷ ଟଙ୍କା ବ୍ୟୟରେ ନୂତନ କୋଠା ନିର୍ମାଣ ହୋଇ ଉଦଘାଟନ ସରିଲାଣି। ହେଲେ ଆବଶ୍ୟକ ଡାକ୍ତର ଓ କର୍ମଚାରୀ ସାଙ୍ଗକୁ ଯନ୍ତ୍ରାଂଶ ନଥିବା ବେଳେ ନୂଆ ଖଟ ଓ ଆସବାବପତ୍ର ନାହିଁ। ନୂଆ କୋଠାର କେବଳ ଗୋଟିଏ ଚେମ୍ବରରେ ଜଣେ ଡାକ୍ତର ବସୁଥିବା ବେଳେ ଅନ୍ୟ ରୁମ ଗୁଡିକ ଖାଲି ପଡିଛି। ଏଠି ଜଣେ ମେଡିକାଲ ଅଫିସର ସାଙ୍ଗକୁ ଜଣେ ଲେଖାଏ ଭେଷଜ ବିଶେଷଜ୍ଞ, ଶିଶୁରୋଗ ବିଶେଷଜ୍ଞ, ସର୍ଜରୀ ବିଶେଷଜ୍ଞ ଓ ସ୍ତ୍ରୀ ରୋଗ ବିଶେଷଜ୍ଞ ସମେତ ୩ ଜଣ ଆସିଷ୍ଟାଣ୍ଟ ସର୍ଜନ ଓ ଏଲଟିଆର ଏମଓ ସ୍କିମରେ ୫ ଜଣ ଏମ୍ବିବିଏସ ଡାକ୍ତର ପଦବୀ ପାଇଁ ମଞ୍ଜୁରୀ ମିଳିଛି। ହେଲେ ଜଣେ ମାତ୍ର ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର ସୁଭାଶିଷ ପାଣିଗ୍ରାହୀ ହିଁ ଅଛନ୍ତି। ଗୋଟିଏ ଆସିଷ୍ଟାଣ୍ଟ ସର୍ଜନ ଓ ସମସ୍ତ ୫ଟି ଏମବିବିଏସ ଡାକ୍ତର ପଦବୀ ଖାଲି ପଡିଛି। ସେହିପରି ୨ ଜଣ ଫାର୍ମାସିଷ୍ଟଙ୍କ ମଧ୍ୟରୁ ଜଣଙ୍କୁ ଡେପୁଟେସନରେ ଚିକିଟି ପଠାଇ ଦିଆଯାଇଥିବାରୁ ଔଷଧ ବଣ୍ଟନ ବ୍ୟବସ୍ଥା ବାଧାପ୍ରାପ୍ତ ହେଉଛି। ୩ ଜଣ ଲେବରେଟରି ସ୍ଥାନରେ ଜଣେ ମାତ୍ର ଅଛନ୍ତି। ମ୍ୟାଲେରିଆ ଟେକିନିସିଆନ ନଥିବାରୁ ମାଲେରିଆ ଟେଷ୍ଟ ପାଇଁ ଆସୁଥିବା ରୋଗୀଙ୍କୁ ଅଯଥା ଖର୍ଚ୍ଚାନ୍ତ ହେବାକୁ ପଡୁଛି। ମେଡିକାଲରେ ଏକ୍ସରେ ମେସିନ ନାହିଁ। ସେହିପରି ଅଲଟ୍ରାସାଉଣ୍ଡ ମେସିନ ନଥିବାରୁ ଗର୍ଭବତୀଙ୍କୁ ପୋଲସରା କିମ୍ବା ଆସ୍କା ମେଡିକାଲକୁ ଯିବାକୁ ପଡୁଛି। ବୁଗୁଡ଼ା ମେଡିକାଲରେ ୬ ଜଣ ଝାଡୁଦାରଙ୍କ ସ୍ଥାନରେ ମାତ୍ର ଜଣେ ଥିବା ବେଳେ ୪ ଟି ଆଟେନଡେଣ୍ଟ ପଦବୀ ଖାଲି ପଡିଛି। ବୁଗୁଡ଼ା ସିଏଚସି ଅଧୀନରେ ଥିବା ମାଣିତରା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଏକ ଟ୍ରଷ୍ଟ ପରିଚାଳନା କରୁଥିବା ବେଳେ ବାଲିପଦର ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ କୌଣସି ଡାକ୍ତର ନାହାନ୍ତି। କେବଳ ଜଣେ ଫାର୍ମାସିଷ୍ଟ ଓ ଜଣେ ନର୍ସଙ୍କ ଭରସାରେ ଚାଲିଛି ସ୍ବାସ୍ଥ୍ୟ ସେବା। ବୁଗୁଡ଼ା ସମେତ କରଚୁଲି, ବାଲିପଦର ଓ ଏ. କରଡ଼ାବାଡ଼ିରେ ଏଲଏଚଭି କେହି ନଥିବା ଏବଂ ଗୋଲାମୁଣ୍ଡଳା, କରଚୁଲି ଓ କାନସୁକା ଠାରେ ମହିଳା ସ୍ବାସ୍ଥ୍ୟ କର୍ମୀ ନଥିବାରୁ ଟୀକା ଦାନ ବ୍ୟବସ୍ଥା ବାଧାପ୍ରାପ୍ତ ହେଉଛି। ବୁଗୁଡ଼ା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ପ୍ରଶାସନିକ କୋଠା ମଧ୍ୟ ପୁରୁଣା ହୋଇ ପାଣି ଗଳୁଛି ଏବଂ ଏଠାରେ ଆବ୍ଯଯକ ଜାଗା ନଥିବାରୁ ଫାଇଲପତ୍ର ପରିଚାଳନା କରିବା ଅସୁବିଧା ହେଉଛି। ଏଣୁ ଆବଶ୍ୟକ କୋଠା ନିର୍ମାଣ ସହ ସମସ୍ତ ଡାକ୍ତର ଓ କର୍ମଚାରୀ ପଦବୀ ପୂରଣ କରିବାକୁ ଦାବି ହେଉଛି।
