ଭୁବନେଶ୍ୱର, ୭ା୧(ବ୍ୟୁରୋ): ଓମିକ୍ରନ୍ର ୨ଟି ଷ୍ଟ୍ରେନ୍ ‘ବିଏଫ୍ ୭’ ଓ ‘ଏକ୍ସବିବି ୧.୫’ ଚାଇନା, ଜାପାନ, ହଂକଂ, ଥାଇଲାଣ୍ଡ, ଦକ୍ଷିଣ କୋରିଆ, ସିଙ୍ଗାପୁର, ଆମେରିକା, ୟୁରୋପ, ଜର୍ମାନୀ, ଫ୍ରାନ୍ସ, ଅଷ୍ଟ୍ରେଲିଆରେ ବ୍ୟାପିବାରେ ଲାଗିଛି। ଏହାକୁ ନେଇ ଓଡ଼ିଶାବାସୀ ଭୟଭୀତ ହେଉଛନ୍ତି। କିନ୍ତୁ ରାଜ୍ୟରେ ଏହାର ଅଧିକ ପ୍ରଭାବ ପଡ଼ିବ ନାହିଁ ବୋଲି ସ୍ବାସ୍ଥ୍ୟ ବିଭାଗ କହିଛି। ଏ ସମ୍ପର୍କରେ କଟକ ଏସ୍ସିବିର ମେଡିସିନ ବିଭାଗ ମୁଖ୍ୟ ପ୍ରଫେସର ଡା. ଜୟନ୍ତ ପଣ୍ଡା କହିଛନ୍ତି, ରାଜ୍ୟରେ ୬ ହଜାରରୁ ଊଦ୍ଧର୍ବ କୋଭିଡ୍ ଟେଷ୍ଟ କଲେ ମାତ୍ର ଗୋଟିଏ ଦୁଇଟି ସଂକ୍ରମିତ ବାହାରୁଛନ୍ତି। ଏସ୍ସିବି ମେଡିକାଲରେ ୨ ମାସ ହେଲା କୌଣସି କୋଭିଡ୍ ରୋଗୀ ନାହାନ୍ତି କି ପଜିଟିଭ୍ ଚିହ୍ନଟ ହେଉନାହାନ୍ତି। ଓଡ଼ିଶାରେ କୋଭିଡ୍ର ଦୈନିକ ପଜିଟିଭ୍ ହାର ୦.୦୧ ପ୍ରତିଶତ ରହିଛି। ସେହିଭଳି ସାପ୍ତାହିକ ୦.୧୨ ପ୍ରତିଶତ ରହୁଛି। ତେଣୁ ଓଡ଼ିଶା ପାଇଁ କୋଭିଡ୍ ବିପଦ ନାହିଁ ବୋଲି କୁହାଯାଇପାରିବ। ସେ କହିଛନ୍ତି, ଆମର କୋଭିଡ୍ ପରିଚାଳନା ବହୁତ ଭଲ ହୋଇଛି। ତେଣୁ ବର୍ତ୍ତମାନ ସ୍ଥିତିରେ କୋଭିଡ୍କୁ ନେଇ ଭୟଭୀତ ହେବାର ନାହିଁ। ପ୍ରତି ୧୦୦ ବର୍ଷରେ କିଛିନା କିଛି ମହାମାରୀ ଆସିଛି। ପ୍ରଥମ ଲହର, ଦ୍ବିତୀୟ, ତୃତୀୟ ଲହର ଆଦି ରହିଛି। କୋଟି କୋଟି ଲୋକଙ୍କର ମୃତ୍ୟୁ ହୋଇଛି। କିନ୍ତୁ କୋଭିଡ୍ରେ ଏପର୍ଯ୍ୟନ୍ତ ବିଶ୍ବରେ ମାତ୍ର ୫ ଲକ୍ଷ ୩୦ ହଜାର ଲୋକଙ୍କ ମୃତ୍ୟୁ ହୋଇଛି। ଇତିମଧ୍ୟରେ ଭାରତର ଲୋକେ କୋଭିଡ୍ର ଆଲ୍ଫା, ଡେଲ୍ଟା ଓ ଓମିକ୍ରନ ଭାରିଆଣ୍ଟକୁ ସାମ୍ନା କରିଛନ୍ତି। ଆମର କୋଭିସିଲ୍ଡ ଓ କୋଭାସ୍କିନ୍ ଲୋକଙ୍କୁ ସୁରକ୍ଷା ଦେଇଛି। ଭାରତରେ ୨୨୦ କୋଟି ଡୋଜ୍ ଟିକା ଦିଆସରିଛି। ୧୦୦ କୋଟିରୁ ଊଦ୍ଧର୍ବ ଲୋକ ପ୍ରଥମ ଓ ପାଖାପାଖି ୯୫ କୋଟି ଲୋକ ଦ୍ବିତୀୟ ଡୋଜ୍ ନେଇଛନ୍ତି। ୨୦ କୋଟି ଲୋକ ବୁଷ୍ଟର ଡୋଜ୍ ନେଇସାରିଛନ୍ତି। ଓଡ଼ିଶାରେ ୧୦୦ ଭାଗ ଲୋକ ଉଭୟ ପ୍ରଥମ ଓ ଦ୍ବିତୀୟ ଡୋଜ୍ ନେଇଛନ୍ତି। ସେହିପରି ୪୦ ପ୍ରତିଶତ ବୁଷ୍ଟର ଡୋଜ୍ ଟିକା ନେଇଛନ୍ତି। ତେଣୁ ଏମାନଙ୍କଠାରେ ରୋଗ ପ୍ରତିରୋଧକ ଶକ୍ତି ବଢ଼ିଯାଇଛି। ଓଡ଼ିଶାରେ ଗୋଷ୍ଠୀ ରୋଗ ପ୍ରତିଷେଧକ ଆସିଯାଇଛି। ତଥାପି ଆମକୁ ସତର୍କ ରହିବାର ଅଛି ବୋଲି ଡା. ପଣ୍ଡା ପରାମର୍ଶ ଦେଇଛନ୍ତି।
