ନୂଆଦିଲ୍ଲୀ,୩୧।୭: କକ୍ରୋଚ୍ ଜନତା ପାର୍ଟି (ସିଜେପି) ପକ୍ଷରୁ ଗତ ଜୁଲାଇ ୨୦ରେ ଦିଲ୍ଲୀର ଯନ୍ତରମନ୍ତରଠାରୁ ସଂସଦ ଭବନ ଅଭିମୁଖେ ହୋଇଥିବା ରାଲିରେ ଭାଗନେଇଥିବା ସାଧାରଣ ନାଗରିକ ଓ ଆନ୍ଦୋଳନକାରୀଙ୍କ ବିରୋଧରେ ଦିଲ୍ଲୀ ପୋଲିସ କୌଣସି କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବ ନାହିଁ। ତେବେ ଆପରାଧିକ ପୃଷ୍ଠଭୂମି ଥିବା ବ୍ୟକ୍ତିମାନଙ୍କ ବିରୋଧରେ ନିୟମାନୁସାରେ କାର୍ଯ୍ୟାନୁଷ୍ଠାନ ହେବ ବୋଲି ଦିଲ୍ଲୀ ସରକାରଙ୍କ ଗୃହ ବିଭାଗ ପକ୍ଷରୁ ଜାରି ଏକ ନିର୍ଦ୍ଦେଶନାମାରେ ସ୍ପଷ୍ଟ କରାଯାଇଛି। ସରକାରୀ ଆଦେଶ ଅନୁଯାୟୀ, ଗିରଫ କିମ୍ବା ଅଟକ ହୋଇଥିବା ଆନ୍ଦୋଳନକାରୀଙ୍କ ମାମଲାର ଶୀଘ୍ର ସମୀକ୍ଷା କରାଯାଇ ସେମାନଙ୍କୁ ମୁକ୍ତ କରିବା ପ୍ରକ୍ରିୟା ତ୍ୱରାନ୍ବିତ କରାଯିବ। ଦିଲ୍ଲୀ ସରକାର ଏହି ପ୍ରତିବାଦରେ ସାମିଲ ସାଧାରଣ ଲୋକଙ୍କ ବିରୋଧରେ ଆଗକୁ କୌଣସି ଆଇନଗତ ପଦକ୍ଷେପ ନ ନେଇ ମାମଲାକୁ ଏହିଠାରେ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ତେବେ ସୁପ୍ରିମକୋର୍ଟଙ୍କ ଆଦେଶ ଅନୁସାରେ, ଆପରାଧିକ ପୃଷ୍ଠଭୂମି ଥିବା ବ୍ୟକ୍ତିମାନଙ୍କୁ ଏହି ଆଇନଗତ ସୁରକ୍ଷା ମିଳିବ ନାହିଁ। ପ୍ରତିବାଦ ବେଳେ ଆନ୍ଦୋଳନକାରୀମାନେ ବାରିକେଡ୍ ଭାଙ୍ଗିବାକୁ ଚେଷ୍ଟା କରିବାରୁ ପୋଲିସ ଓ ପ୍ରତିବାଦକାରୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଆନ୍ଦୋଳନକାରୀଙ୍କ ପଥରମାଡ଼ରେ ଅନେକ ସୁରକ୍ଷାକର୍ମୀ ଆହତ ହୋଇଥିବାବେଳେ ପୋଲିସର ଲାଠିଚାର୍ଜ ଓ ପେଲେଟ୍ ଗନ୍ ଦ୍ୱାରା ବହୁ ପ୍ରତିବାଦକାରୀ ମଧ୍ୟ ଆହତ ହୋଇଥିଲେ। ଏଥିସହିତ ୧୫ରୁ ଅଧିକ ଗାଡ଼ି କ୍ଷତିଗ୍ରସ୍ତ ହୋଇଥିଲା। ଏହି ଘଟଣାରେ ଦିଲ୍ଲୀ ପୋଲିସ ୧୩ଟି ଏଫ୍ଆଇଆର୍ ରୁଜୁ କରିଛି। ଏଥିସହିତ ପ୍ରଧାନମନ୍ତ୍ରୀଙ୍କ ବିରୋଧରେ ଆପତ୍ତିଜନକ ଶବ୍ଦ ବ୍ୟବହାର କରିଥିବା କିଛି ସୋସିଆଲ ମିଡିଆ ହ୍ୟାଣ୍ଡେଲ ବିରୋଧରେ ସ୍ପେଶାଲ ସେଲ୍ରେ ପୃଥକ ମାମଲା ଦାୟର କରାଯାଇଛି। ଯନ୍ତରମନ୍ତରରେ ଲଗାଯାଇଥିବା ହାଇ-ରେଜୋଲ୍ୟୁସନ ଫେସିଆଲ ରେକଗ୍ନିସନ ସିଷ୍ଟମ କ୍ୟାମେରା ସାହାଯ୍ୟରେ ପୋଲିସ ପ୍ରତିବାଦରେ ସାମିଲ ୨,୮୦୦ରୁ ଅଧିକ ଅପରାଧିକ ପୃଷ୍ଠଭୂମି ଥିବା ବ୍ୟକ୍ତିଙ୍କୁ ଚିହ୍ନଟ କରିଛି।
