ପାଟନା,୧୧।୧୧: ବିହାର ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇଛି। ବିଜୟ ସହିତ ନୀତୀଶ କୁମାର ଆଉ ଏକ ଇତିହାସ ସୃଷ୍ଟି କରିବାକୁ ଯାଉଛନ୍ତି। ସେ ୭ ଥର ପାଇଁ ବିହାରର ମୁଖ୍ୟମନ୍ତ୍ରୀ ଭାବେ ଶପଥ ନେବେ। ବିହାରରେ ଆରଜେଡି ହଟାଇ ମୁଖ୍ୟମନ୍ତ୍ରୀ ଚେୟାରରେ ବସିଥିବା ନୀତୀଶ କୁମାର ତାଙ୍କ ହାତରୁ କ୍ଷମତା ଖସିଯିବାକୁ ଦେଇନାହାନ୍ତି। ୨୦୦୦ ମସିହାରେ ସେ ପ୍ରଥମଥର ପାଇଁ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ତେବେ କିଛି ଦିନ ପରେ ସଂଖ୍ୟାଗରିଷ୍ଠତା ଅଭାବରୁ ତାଙ୍କ ସରକାର ଭାଙ୍ଗିଯାଇଥିଲା। ତା’ପରେ ୨୦୦୫ ରେ ନୀତୀଶ କୁମାର ଭାଜପା ଏବଂ ଜେଡିୟୁର ନିର୍ବାଚନ ପ୍ରଚାରର ମୁଖ୍ୟ ହୋଇଥିଲେ। ୨୦୦୫ ନଭେମ୍ବର ୨୪ ସେ ପୁଣି ଥରେ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ଏଥର ସେ ପାଞ୍ଚ ବର୍ଷ ପାଇଁ ସରକାର ଚଳାଇଲେ। ୨୦୧୦ ବିଧାନସଭା ନିର୍ବାଚନରେ ପୁଣି ଥରେ ଭାଜପା-ଜେଡିୟୁ ମିଳିତ ମେଣ୍ଟ ଉପରେ ରାଜ୍ୟବାସୀ ଆସ୍ଥା ପ୍ରକଟ କରିଥିଲେ। ଏହା ପରେ ନୀତୀଶ ନଭେମ୍ବର ୨୬, ୨୦୧୦ ରେ ତୃତୀୟ ଥର ପାଇଁ ଶପଥ ଗ୍ରହଣ କରିଥିଲେ। ୨୦୧୪ରେ ଲୋକସଭା ନିର୍ବାଚନରେ ଖରାପ ପରାଜୟ ପରେ ନୀତୀଶ କୁମାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ତା’ପରେ ଏହା ତାଙ୍କର ନୈତିକ ନିଷ୍ପତ୍ତି ଭାବରେ ବିବେଚନା କରାଯାଉଥିଲା। ସେ ତାଙ୍କର ପୁରୁଣା ସାଥୀ ଭାଜପାଠାରୁ ଅଲଗା ହୋଇଥିଲେ ଏବଂ ଲୋକସଭା ନିର୍ବାଚନରେ ଭାଜପା ଜବରଦସ୍ତ ପ୍ରଦର୍ଶନ କରିଥିଲା। ନୀତୀଶ ଜିତାନ ରାମ ମାନଝୀଙ୍କୁ ବିହାରର ମୁଖ୍ୟମନ୍ତ୍ରୀ କରିଥିଲେ। କିନ୍ତୁ ତା’ପରେ ୨୦୧୫, ଫେବୃୟାରୀ ୨୨ରେ ସେ ଚତୁର୍ଥ ଥର ପାଇଁ ନୀତିଶ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କଲେ। ସେହି ବର୍ଷ ଶେଷରେ ବିହାରରେ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା। ଦଶନ୍ଧି ଧରି ପରସ୍ପରର ପ୍ରତିଦ୍ୱନ୍ଦ୍ୱୀ ନୀତୀଶ କୁମାର ଏବଂ ଲାଲୁ ପ୍ରସାଦ ଯାଦବ ଏକାଠି ହୋଇଥିଲେ। ମହାମେଣ୍ଟ ଅଧୀନରେ ଉଭୟ ଏନଡିଏ ସାମ୍ନାରେ ପ୍ରତିଦ୍ୱନ୍ଦ୍ୱିତା କରିଥିଲେ। ଉଭୟ ପକ୍ଷର ଏକ ଐତିହାସିକ ବିଜୟ ହୋଇଥିଲା ଏବଂ ନୀତୀଶ କୁମାର ୨୦୧୫, ନଭେମ୍ବର ୨୦ରେ ୫ଥର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ତା’ପରେ ପ୍ରାୟ ଦୁଇ ବର୍ଷ ପରେ ନୀତୀଶ କୁମାର ଆରଜେଡିଠାରୁ ଅଲଗା ହୋଇଥିଲେ। ଫଳରେ ସରକାର ଭାଙ୍ଗିଯାଇଥିଲା। ସେ ପୁଣିଥର ଭାଜପା ସହ ମେଣ୍ଟ କରିଥିଲେ। ୨୦୧୭, ଜୁଲାଇ ୨୭ରେ ଷଷ୍ଠ ଥର ପାଇଁ ସେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ୨୦୨୦ ଏନଡିଏ ପୁଣି ଥରେ ନିର୍ବାଚନ ଜିତିଛି। ନୀତୀଶ କୁମାର ସପ୍ତମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇ ଇତିହାସ ରଚିବେ।
