ପାଟନା, ୩୦ା୫ : ସଂଯୁକ୍ତ ଜନତା ଦଳ (ଜେଡିୟୁ) ନେତା ତଥା କେନ୍ଦ୍ରମନ୍ତ୍ରୀ ରାମଚନ୍ଦ୍ର ପ୍ରସାଦ ସିଂଙ୍କୁ ମୋଦିପ୍ରେମ ମହଙ୍ଗା ପଡ଼ିଛି। ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଦଳୀୟ ଟିକେଟରେ ଆର୍. ସି. ପିଙ୍କୁ ରାଜ୍ୟ ସଭାକୁ ପଠାଇ ଥିଲେ। ଜେଡିୟୁ କୋଟାରୁ ତାଙ୍କୁ କେନ୍ଦ୍ରରେ ମନ୍ତ୍ରୀପଦ ଦେବା ପାଇଁ ବ୍ୟବସ୍ଥା କରାଇଥିଲେ। ହେଲେ ଆର୍. ସି. ପି. କେନ୍ଦ୍ର ଇସ୍ପାତ ମନ୍ତ୍ରୀ ହେବା ପରେ ନୀତୀଶଙ୍କ କଥା ନ ଶୁଣି ମୋଦିଙ୍କ କୋଳରେ ବସିପଡ଼ିଥିଲେ। କିଛି ଦିନ ହେଲା ସେ ପ୍ରଧାନମନ୍ତ୍ରୀଙ୍କ ବିଭିନ୍ନ କାର୍ଯ୍ୟକ୍ରମର ଫଟୋ ଏବଂ ଭିଡିଓ ଟୁଇଟରରେ ଶେୟାର କରିବା ସହ ଭାଜପା ନେତାମାନଙ୍କୁ ଜନ୍ମଦିନର ଅଭିନନ୍ଦନ ଜଣାଉଥିଲେ।
ଇତିମଧ୍ୟରେ ଜେଡିୟୁରେ ଦୁଇଟି କ୍ଷମତା କେନ୍ଦ୍ର ସୃଷ୍ଟି ହେଉଥିବା ଦଳର ଅନେକ ନେତା ଆଶଙ୍କା କରିଥିଲେ। ଫଳରେ ନୀତୀଶ କୁମାର ଏବଂ ତାଙ୍କ କ୍ୟାବିନେଟର ପୂର୍ବତନ ସହଯୋଗୀ ଆର୍. ସି. ପି. ସିଂଙ୍କ ମଧ୍ୟରେ ତିକ୍ତତା ବଢ଼ିଥିଲା। ଶେଷରେ ସମ୍ପର୍କ ଏତେ ଖରାପ ହୋଇଗଲା ଯେ, ଆର୍. ସି. ପି. ନିଜ ଟୁଇଟର ହ୍ୟାଣ୍ଡେଲରୁ ଜେଡିୟୁ ଫଟୋ ହଟାଇ ଦେଇ ପ୍ରଧାନମନ୍ତ୍ରୀଙ୍କ ଫଟୋ ରଖିଥିଲେ। ଜେଡିୟୁ ଅଧ୍ୟକ୍ଷ ଲଲନ ସିଂ ମଧ୍ୟ ଏସବୁକୁ ନେଇ ଆର୍. ସି. ପି.ଙ୍କ ଉପରେ କ୍ରୋଧିତ ହୋଇଥିଲେ।
ଟିକେଟ କଟିବା ଏକପ୍ରକାର ନିଶ୍ଚିତ ବୋଲି ଆର୍. ସି. ପି. ଜାଣିଥିଲେ ସୁଦ୍ଧା ଶେଷ ମୁହୂର୍ତ୍ତରେ ମୁଖ୍ୟମନ୍ତ୍ରୀ ଓ ଅଧ୍ୟକ୍ଷଙ୍କ ନିକଟତର ହେବାକୁ ଚେଷ୍ଟା କରିଥିଲେ। କିନ୍ତୁ କେନ୍ଦ୍ରମନ୍ତ୍ରୀଙ୍କୁ ଭାଜପା ସପକ୍ଷବାଦୀ ଧରିନେଇ ଜେଡିୟୁ ତାଙ୍କୁ ଟିକେଟ ଦେଇନାହିଁ। ତାଙ୍କ ବଦଳରେ ଜେଡିୟୁର ଝାଡ଼ଖଣ୍ଡ ସଭାପତି କ୍ଷୀରୋ ମହତୋଙ୍କୁ ରାଜ୍ୟ ସଭା ପ୍ରାର୍ଥୀ କରାଯାଇଛି। ଫଳରେ ଆର୍. ସି. ପି. ସିଂଙ୍କ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି ହୋଇଛି। ଏବେ ଭାଜପା ରାଜ୍ୟ ସଭାକୁ ନ ପଠାଇଲେ ତାଙ୍କୁ ମନ୍ତ୍ରୀପଦରୁ ଇସ୍ତଫା ଦେବାକୁ ପଡ଼ିବ।
ଭାଜପା ରବିବାର ବିହାରରୁ ୨ ପ୍ରାର୍ଥୀଙ୍କ ନାଁ ଘୋଷଣା କରିସାରିଥିବାରୁ ଆର୍.ସି.ପିଙ୍କ ଆଶା ମଉଳିଯାଇଛି। ଜେଡିୟୁର ଏଭଳି ନିଷ୍ପତ୍ତି ପରେ ବିହାର ରାଜନୀତି ସରଗରମ ହୋଇଛି। ଏଥିସହ ପଛୁଆ ଜାତି ଜନଗଣନା ବାହାନାରେ ଭାଜପା ସହ ସମ୍ପର୍କ ତୁଟାଇ ଲାଲୁ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ସହ ଜେଡିୟୁ ବିହାରରେ ପୁନର୍ବାର ମେଣ୍ଟ ସରକାର ଗଢ଼ିବା ନେଇ ଆଲୋଚନା ଜୋର୍ ଧରିଛି।
