ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ର ଚେୟାରମ୍ୟାନ୍ ତଥା ପରିଚଳନା ନିର୍ଦ୍ଦେଶକ ମୁକେଶ ଅମ୍ବାନୀଙ୍କ ସ୍ତ୍ରୀ ନୀତା ଅମ୍ବାନୀ ଇତିମଧ୍ୟରେ ୫୭ ବର୍ଷର ହୋଇସାରିଛନ୍ତି। ୧୯୬୪ ମସିହା ନଭେମ୍ବର ୧ରେ ମୁମ୍ବାଇରେ ଏକ ମଧ୍ୟବିତ ପରିବାରରେ ଜନ୍ମଗ୍ରହଣ କରିଥିଲେ ନୀତା। ଜୀବନଶୈଳୀକୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି ଅମ୍ବାନୀ ପରିବାର। ତେବେ ମୁକେଶ ଅମ୍ବାନୀ ଏବଂ ନୀତା ଅମ୍ବାନୀଙ୍କ ବିବାହ ଆରେଞ୍ଜ୍ରୁ ଲଭ୍ ହୋଇଥିଲା। ଏହି ପ୍ରେମ କାହାଣୀ ବହୁତ କୌତୁହଳମୟ ମଧ୍ୟ ଥିଲା।
ନୀତାଙ୍କର ପିଲାଦିନୁ ଶାସ୍ତ୍ରୀୟ ନୃତ୍ୟପ୍ରତି ସଉକ ଥିଲା। କିନ୍ତୁ ତାଙ୍କ ମା’ ଚାହୁଁଥିଲେ ସେ ଆକାଉଣ୍ଟାଣ୍ଟ ହୁଅନ୍ତୁ। ମାତ୍ର ନୃତ୍ୟପ୍ରତି ନୀତାଙ୍କ ସଉକ ଦେଖି ମା’ ତାଙ୍କୁ ୮ ବର୍ଷ ବୟସରେ ଭାରତ ନାଟ୍ୟମ ଶିଖାଇଥିଲେ। ସେ ଶିକ୍ଷକ ଏବଂ ଇଣ୍ଟରିୟର ଡିଜାଇନରରେ ଡିଗ୍ରୀ ମଧ୍ୟ ହାସଲ କରିଛନ୍ତି।
ନୀତା ନବରାତ୍ରି ଅବସରରେ ଏକ ସାଂସ୍କୃତିକ କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହି କାର୍ଯ୍ୟକ୍ରମକୁ ଧୁରୁଭାଇ ଅମ୍ବାନୀ ଓ କୋକିଲାବେନ ମଧ୍ୟ ଆସିଥିଲେ। ତାଙ୍କୁ ନୀତାଙ୍କ ନୃତ୍ୟ ଭଲ ଲାଗିଥିଲା। ସେମାନେ କାର୍ଯ୍ୟକ୍ରମ ଆୟୋଜକଙ୍କୁ ନୀତାଙ୍କ ସମ୍ପର୍କରେ ପଚାରି ବୁଝିଥିଲେ। ଏହାପରେ ଧୀରୁଭାଇ ନୀତାଙ୍କ ଘରକୁ ଫୋନ୍ କରିଥିଲେ। ନୀତା ଏବଂ ତାଙ୍କ ବାପାଙ୍କୁ ଅଫିସକୁ ଡାକିଥିଲେ। ଏହି ସମୟରେ ଧୀରୁଭାଇ ନିତାଙ୍କୁ ଅନେକ ପ୍ରଶ୍ନ ପଚାରିଥିଲେ। ତୁମେ ମୁକେଶଙ୍କୁ ଦେଖା କରିବାକୁ ଚାହୁଁଛ କି ମଧ୍ୟ ପ୍ରଶ୍ନ କରିଥିଲେ। ଏହା ପରେ ନୀତା ତାଙ୍କ ଘରକୁ ଗଲେ। ଏହି ସମୟରେ ମୁକେଶ ନିଜେ ଘରର ଦ୍ୱାର ଖୋଲିଥିଲେ। ଉକ୍ତ ସମୟରେ ମୁକେଶ ଧଳା ଓ କଳା ରଙ୍ଗର ଶାର୍ଟ ଏବଂ ପ୍ୟାଣ୍ଟ ପିନ୍ଧିଥିଲେ। ସେ ବହୁତ ବହୁତ ସିମ୍ପଲ ଦେଖାଯାଉଥିଲେ। ନୀତାଙ୍କ ଆଡକୁ ହାତ ବଢ଼ାଇ ହାଏ, ମୁଁ ମୁକେଶ ବୋଲି କହିଥିଲେ। ତାଙ୍କୁ ଦେଖିବା ପରେ ନୀତା ଆଦୌ ହେଲେ ବିଶ୍ୱାସ କରିପାରି ନ ଥିଲେ। ଏତେ ଧନୀ ଘରର ପୁଅ ହୋଇ ଏମିତି ସିମ୍ପଲ ତାହା ସେ କଳ୍ପନା ମଧ୍ୟ କରି ନ ଥିଲେ। ମୁକେଶଙ୍କୁ ୬, ୭ ଥାର ଦେଖାକରିବା ପରେ ନୀତା ମୁକେଶଙ୍କ ସହ ସହଜ ମନେ କରିଥିଲେ।
ମୁକେଶ ନୀତାଙ୍କୁ ବିବାହ ପାଇଁ ପ୍ରପୋଜ କରିବା ଘଟଣା ମଧ୍ୟ କୌତୁହଳ ଥିଲା। ଏକଦା ମୁକେଶ ଏବଂ ନୀତା କାରରେ ମୁମ୍ବାଇ ପେଡର ରୋଡ୍ ଦେଇ ଯାଉଥିଲେ। ଏକ ଟ୍ରାଫିକ ସିଗନାଲରେ କାର ଅଟକିଥିଲା। ଏହି ସମୟରେ ମୁକେଶ ନୀତାକୁ ପଚାରିଥିଲେ, ମୋତେ ବାହା ହେବ କି? ଏତିକିବେଳେ ସବୁଜ ସିଗ୍ନାଲ ଆସିଥିଲା। ଲୋକେ ପଛରୁ ହର୍ନମାରି ତାଙ୍କୁ ଆଗକୁ ଯିବାକୁ କହିଥିଲେ। କିନ୍ତୁ ମୁକେଶ ଜିଦ୍ ଧରିଥିଲେ ଯେ, ଜବାବ୍ ନ ମିଳିବା ଯାଏ ସେ ଗାଡି ଚଲାଇବେ ନାହିଁ। ଏହାପରେ ନୀତା ବାହାହେବା ପାଇଁ ହଁ କରିଥିଲେ। ପରେ ମୁକେଶ ଗାଡି ଚଲାଇଥିଲେ।
