ଭୁବନେଶ୍ୱର,୫।୧୨ (ବ୍ୟୁରୋ): ରାଜ୍ୟ ସରକାରଙ୍କ ପକ୍ଷରୁ ୨୦୧୯ ମସିହା ପାଇଁ ୩୧ତମ ‘ରାଜ୍ୟ ଓଡ଼ିଆ ଚଳଚ୍ଚିତ୍ର’ ଓ ୮ମ ‘ରାଜ୍ୟ ଓଡ଼ିଆ ଟେଲି ଚଳଚ୍ଚିତ୍ର ପୁରସ୍କାର’ ଘୋଷଣା ହେବା ପରେ ଏହାକୁ ନେଇ ବିବାଦ ଲାଗି ରହିଥିଲା। ପୁରସ୍କାର ପ୍ରଦାନ କ୍ଷେତ୍ରରେ ଚୟନ ପ୍ରକ୍ରିୟା କେତେଦୂର ନିରପେକ୍ଷ ତାହାକୁ ନେଇ ପ୍ରଶ୍ନ ଉଠିଥିଲା। ଏପରିକି କମିଟିରେ ଥିବା ଜୁରି ସଦସ୍ୟମାନଙ୍କୁ ନେଇ ମଧ୍ୟ ଅସନ୍ତୋଷ ପ୍ରକାଶ ପାଇଥିଲା। ତେବେ ସଂସ୍କୃତି ବିଭାଗ ସହିତ ଓଡ଼ିଶା ଟେଲି ଆକ୍ଟର୍ସ ଆସୋସିଏଶନ (ଓଟା)ର ଆଲୋଚନା ପରେ ଏହି ବିବାଦର ଏବେ ଏକ ପ୍ରକାର ଅନ୍ତ ହେବାକୁ ଯାଉଛି। ହୋଇଥିବା ନିଷ୍ପତ୍ତି ଅନୁସାରେ, ଟେଲି ପୁରସ୍କାର ବର୍ଗରେ ଶ୍ରେଷ୍ଠ ସ୍କ୍ରିନ୍ ପ୍ଲେ ପୁରସ୍କାର ପାଇବା ପାଇଁ ମନୋନୀତ ହୋଇଥିବା ‘ନିମ୍କି’ ଚଳଚ୍ଚିତ୍ରକୁ ପୁରସ୍କାର ତାଲିକାରୁ ବାଦ୍ ଦିଆଯାଇଛି। ଏହା ସମ୍ପୂର୍ଣ୍ଣ ଭାବେ କମର୍ସିଆଲ ଚଳଚ୍ଚିତ୍ର ହୋଇଥିବାରୁ ଏବଂ ହଲ୍ରେ ରିଲିଜ୍ ହୋଇଥିବାରୁ ଏପରି ନିଷ୍ପତ୍ତି ନିଆଯାଇଛି। ତେବେ ବିବାଦରେ ଥିଲେ ମଧ୍ୟ ପୁରସ୍କାର ପାଇଁ ନାମ ଘୋଷଣା ହୋଇ ସାରିଥିବାରୁ ଚଳଚ୍ଚିତ୍ର ‘ଖୁସି’ ‘କାଳିଆ କରୁଛି ଲୀଳା’ ଓ ‘ରଙ୍ଗିଲା ବୋହୂ’ ଆଦିକୁ ପୁରସ୍କାର ପ୍ରଦାନ କରାଯିବ ବୋଲି ସୂଚନା ଦିଆଯାଇଛି।
ଆଉ କେତେକ ନିଷ୍ପତ୍ତି ହୋଇଛି। ପ୍ରଯୋଜକମାନେ ନିଜ ନିଜ ଚଳଚ୍ଚିତ୍ର ଦାଖଲ କଲାବେଳେ ଏକ ସତ୍ୟପାଠ ଦାଖଲ କରିଥାନ୍ତି। ଯେଉଁଥିରେ କି କାହାଣୀ କାହାଠାରୁ କପି ହୋଇ ନାହିଁ ବୋଲି ଉଲ୍ଲେଖ ଥାଏ। ମାତ୍ର ସବୁ ପ୍ରଯୋଜକମାନେ ଏହାକୁ ମାନୁ ନାହାନ୍ତି। ତେଣୁ ଭବିଷ୍ୟତରେ ଯେପରି ଏଭଳି କପି ହୋଇଥିବା ଚଳଚ୍ଚିତ୍ର ପୁରସ୍କାର ପାଇଁ ଆବେଦନ କରି ନ ପାରିବେ ସେଥିପ୍ରତି ଦୃଷ୍ଟି ଦିଆଯିବ। ସର୍ବାଧିକ ୪୫ ମିନିଟ୍ ଅବଧି ମଧ୍ୟରେ ଥିବା ଫିଲ୍ମକୁ ହିଁ ଟେଲିଫିଲ୍ମରେ ଗଣାଯିବ। ସେହିପରି ଜୁରୀ କର୍ତ୍ତାଙ୍କୁ ଚୟନ ସମୟରେ ଯେପରି କାହା ପ୍ରତି ପକ୍ଷପାତିତା ନ ହୁଏ ତାହାକୁ ଧ୍ୟାନ ଦିଆଯିବ। ଏଥିସହ ଖୁବ୍ଶୀଘ୍ର ଏକ ନୂଆ ସଂଶୋଧନ ପ୍ରସ୍ତୁତ କରାଯିବ, ଯାହାକି ୨୦୨୦ ମସିହାର ପୁରସ୍କାର ଚୟନ ସମୟରୁ ଲାଗୁ ହେବ। ସେହିଭଳି ଶ୍ରେଷ୍ଠ ଧାରାବାହିକକୁ ‘କବିଚନ୍ଦ୍ର କାଳୀଚରଣ ପଟ୍ଟନାୟକ’ଙ୍କ ନାମରେ ନାମିତ କରିବା, ଜୟଦେବ ପୁରସ୍କାର ଢାଞ୍ଚାରେ ଜୀବନ ବ୍ୟାପୀ (ଟେଲିଭିଜନ) ସାଧନା ପାଇଁ ‘ଦୁଃଖୀରାମ ସ୍ବାଇଁ ପୁରସ୍କାର’ ପ୍ରଦାନ କରିବା ଏହି ସଂଶୋଧନରେ ସାମିଲ କରାଯିବାକୁ ଆଲୋଚନାରେ ନିଷ୍ପତ୍ତି ହୋଇଛି।
ସଂସ୍କୃତି ବିଭାଗ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ, ନିର୍ଦ୍ଦେଶକ ରଞ୍ଜନ କୁମାର ଦାଶ, ଓଡ଼ିଶା ସଙ୍ଗୀତ ନାଟକ ଏକାଡେମୀ ସଚିବ ପ୍ରବୋଧ ରଥ, ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ଅଧ୍ୟକ୍ଷ କୁନା ତ୍ରିପାଠୀ, ଓଟାର ସଭାପତି ଉତ୍ତମ ମହାନ୍ତି, ସମ୍ପାଦକ ନରେନ୍ଦ୍ର ପାତ୍ର ପ୍ରମୁଖ ଯୋଗ ଦେଇଥିଲେ। ଜୁରୀ ଚୟନ ଏବଂ ଅନ୍ୟାନ୍ୟ ଦାବି ନେଇ ଓଟା ପକ୍ଷରୁ ସଂସ୍କୃତି ବିଭାଗ ନିର୍ଦ୍ଦେଶକଙ୍କୁ ବିଭାଗୀୟ ମନ୍ତ୍ରୀଙ୍କ ଉଦ୍ଦେଶ୍ୟରେ ସୋମବାର ଏକ ଲିଖିତ ଦାବି ପ୍ରଦାନ କରିବେ ବୋଲି ସମ୍ପାଦକ ନରେନ୍ଦ୍ର ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଟେଲି ଚଳଚ୍ଚିତ୍ର ପୁରସ୍କାରକୁ ନେଇ ସନ୍ତୋଷ ବ୍ୟକ୍ତ କରିଥିଲା ଓଟା। ଏହାକୁ ନେଇ ଆଇନର ଆଶ୍ରୟ ନେବାକୁ ପ୍ରସ୍ତୁତ ହେଉଥିଲା। ସେହିପରି ନିର୍ଦ୍ଦେଶକ ବବି ଇସଲାମ୍, ଅଭିନେତା ମିଟୁ ମିଥୁନ ନବୀନ ନିବାସ ସମ୍ମୁଖରେ ଆତ୍ମାହୁତି ଉଦ୍ୟମ କରିଥିଲେ।
