ଶ୍ରୀନଗର, ୨ା୩: ଅଲ୍ ଉମର ମୁଜାହିଦ୍ଦିନ୍ ମୁଖ୍ୟ ମୁସ୍ତାକ୍ ଜର୍ଗାରଙ୍କ ସମ୍ପତ୍ତିକୁ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ବାଜ୍ୟାପ୍ତ କରିଛି। ୧୯୯୯ରେ ଇଣ୍ଡିଆନ୍ ଏୟାରଲାଇନ୍ସ ବିମାନ ଅପହରଣ ଘଟଣାରେ ଯାତ୍ରୀମାନଙ୍କ ମୁଣ୍ଡ ଜାମିନ ବଦଳରେ ଜର୍ଗାରଙ୍କ ଏବଂ ଅନ୍ୟ ଦୁଇଜଣ ଆତଙ୍କବାଦୀଙ୍କୁ ମୁକୁଳାଇ ନିଆଯାଇଥିଲା। ଜର୍ଗାର ଓରଫ ଲତରାମ ୧୯୮୯ରେ ତତ୍କାଳୀନ ସ୍ବରାଷ୍ଟ୍ର ମନ୍ତ୍ରୀ ମୁଫ୍ତି ମହମ୍ମଦ ସୟିଦଙ୍କ ଝିଅ ଅପହରଣ ସମେତ ବହୁ ଆତଙ୍କବାଦ ମାମଲାରେ ସମ୍ପୃକ୍ତ। ବିମାନ ଅପହରଣ ମାମଲା ପାକିସ୍ତାନ ମାଟିରୁ ଆତଙ୍କବାଦୀଙ୍କ ସବୁଠୁ ବଡ଼ ଅପରାଧ ବୋଲି ଏନ୍ଆଇଏ ମୁଖପାତ୍ର କହିବା ସହ ବେଆଇନ କାର୍ଯ୍ୟକଳାପ (ପ୍ରତିକାର) ଆଇଡ (ୟୁଏପିଏ) ବଳରେ ଜର୍ଗାରଙ୍କର ଶ୍ରୀନଗର ଗନାଇ ମୋହଲ୍ଲାରେ ୫୪୪ ବର୍ଗଫୁଟ୍ ଜମିରେ ଥିବା ଘରକୁ ବାଜ୍ୟାପ୍ତ କରାଯାଇଛି। ଏନ୍ଆଇଏ ଟିମ୍ ସହ ଜିଲା ପ୍ରଶାସନ ଏବଂ ସ୍ଥାନୀୟ ପୋଲିସ ପକ୍ଷରୁ ଗୁରୁବାର ଉପରୋକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସେ ମୁକ୍ତ ହେବା ପରଠାରୁ ପାକିସ୍ତାନରେ ଥାଇ ଭାରତ ବିରୋଧରେ ଆତଙ୍କବାଦୀ କାର୍ଯ୍ୟ ପରିଚାଳନା କରିବା ସହ କଶ୍ମୀର ଉପତ୍ୟକାରେ ଏହି କାର୍ଯ୍ୟ ପାଇଁ ପାଣ୍ଠି ଯୋଗାଇ ଆସୁଥିଲେ।
