ନୂଆଦିଲ୍ଲୀ,୮।୩: ଶିଳ୍ପପତି ମୁକେଶ ଅମ୍ବାନୀଙ୍କ ବାସଭବନ ନିକଟରୁ ବିସ୍ଫୋରକ ଭର୍ତ୍ତି ଗାଡ଼ି ମିଳିବା ଘଟଣାର ତଦନ୍ତ କରିବ ଜାତୀୟ ତଦନ୍ତକାରୀ ସଂସ୍ଥା(ଏନ୍ଆଇଏ)। ଘଟଣାର ତଦନ୍ତ ଏନ୍ଆଇଏ କରିବାକୁ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଜାରି କରାଯାଇଥିଲା। ନିର୍ଦ୍ଦେଶ ଅନୁସାରେ ଏନ୍ଆଇଏ ସୋମବାର ତଦନ୍ତ ଆରମ୍ଭ କରିଛି। ଫେବୃୟାରୀ ୨୫ରେ ମୁକେଶଙ୍କ ବାସଭବନ ନିକଟରୁ ସନ୍ଦେହ ଜନକ ଭାବେ ଏକ ଗାଡ଼ି ମିଳିଥିଲା। ପୋଲିସ ଗାଡି ଭିତରୁ ୨୦ଟି ଜିଲେଟିନ ସହ ଅନ୍ୟାନ୍ୟ ବିସ୍ଫୋରକ ସାମଗ୍ରୀ ଜବତ କରିଥିଲା। ପୋଲିସ ତଦନ୍ତ ପରେ ଫେବୃୟାରୀ ୧୮ରେ ଅଇରୋଲି-ମୁଲୁନ୍ଦ ବ୍ରିଜ ନିକଟରୁ ଉକ୍ତ ଗାଡି ଚୋରି କରି ଅଣାଯାଇଥିବା ଜଣାପଡିଥିଲା। ପୋଲିସ ମାଳିକଙ୍କୁ ଠାବ କରିଥିଲା। ହେଲେ ପୋଲିସ ତାଙ୍କୁ ଧରିବା ପୂର୍ବରୁ ଗାଡି ମାଲିକଙ୍କ ମୃତଦେହ ମୁମ୍ବାଇର ଏକ ନାଳରୁ ଜବତ କରିଥିଲା। ଗାଡି ମାଳିକଙ୍କ ମୃତ୍ୟୁକୁ ନେଇ ବର୍ତ୍ତମାନ ସନ୍ଦେହ ସୃଷ୍ଟି ହୋଇଛି। ଘଟଣାର ଉଚ୍ଚସ୍ତରୀୟ ତଦନ୍ତ ନେଇ ଏନ୍ଆଇଏକୁ ଦିଆଯାଇଛି। ଅମ୍ବାନୀଙ୍କ ଘର ପାଖରୁ ବିସ୍ଫୋରକ ଗାଡି ମିଳିବା ଘଟଣାର ତଦନ୍ତ ଏନ୍ଆଇଏ ହାତକୁ ଯିବାପରେ ଘଟଣା ପଛରେ ଆତଙ୍କବାଦୀଙ୍କ କାର୍ଯ୍ୟକଳାପ ସନ୍ଦେହ ସୃଷ୍ଟି ହୋଇଛି।
