କଟକ,୫ା୧୧(କାର୍ତ୍ତିକ ସାହୁ): ଚଳିତ ବର୍ଷ ଦୀପାବଳି ସମୟରେ ମାତ୍ର ୨ଘଣ୍ଟା ସବୁଜ ବାଣ ଫୁଟାଇବା ଲାଗି ନିର୍ଦ୍ଦେଶ ରହିଥିଲା। ଦୁଇ ଦିନ ଧରି ବାଣ ଫୁଟାଯିବା ଫଳରେ ବାୟୁ ପ୍ରଦୂଷଣ ମାତ୍ରା ହଠାତ ବହୁଗୁଣିତ ହୋଇଥିଲା। କାହିଁକି ନିୟମ ଉଲ୍ଲଂଘନ କରି ବହୁ ମାତ୍ରାରେ ବାଣ ଫୁଟାଗଲା ସେ ସଂକ୍ରାନ୍ତରେ ୬ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ ଜାତୀୟ ସବୁଜ ପ୍ରାଧିକରଣ (ଏନ୍ଜିଟି) ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି। ପର୍ବପର୍ବାଣି ସମୟରେ ପୁରୀ ଶ୍ରୀମନ୍ଦିରରେ ବାଣ ନ ଫୁଟାଇବାକୁ ନେଇ ଏନ୍ଜିଟିରେ ରୁଜୁ ମାମଲାର ଶୁଣାଣିରେ ଏପରି ନିର୍ଦ୍ଦେଶ ହୋଇଛି। ଏଥିସହ ମାମଲାର ପରବର୍ତ୍ତୀ ଶୁଣାଣି ୨୦୨୫ ଜାନୁଆରୀ ୯ ତାରିଖକୁ ଧାର୍ଯ୍ୟ କରାଯାଇଛି।
ପ୍ରକାଶ ଯେ, ଗତବର୍ଷ ଚନ୍ଦନ ଯାତ୍ରା ସମୟରେ ପୁରୀରେ ବାଣ ଫୁଟାଯିବା ଦ୍ବାରା ୧୫ ଜଣଙ୍କ ମୃତ୍ୟୁ ଘଟିଥିବା ବେଳେ ୨୨ ଜଣ ଆହତ ହୋଇଥିଲେ। ଏହି ସମୟରେ ସବୁଜ ବାଣ ପରିବର୍ତ୍ତେ ଶବ୍ଦ ଓ ବାୟୁ ପ୍ରଦୂଷଣକାରୀ ବାଣ ଫୁଟାଯାଇଥିଲା। ପୁରୀ ବାୟୁ ପ୍ରଦୂଷଣ ଯୁକ୍ତ ସହର ମଧ୍ୟରେ ପରିଗଣିତ ହେଉଥିବାରୁ ଏଠାରେ ବାଣ ଫୁଟାଯିବା ଉପରେ କଟକଣା ରହିଛି। ମାତ୍ର ଅନେକ ସମୟରେ ନିୟମକୁ ପାଳନ କରାଯାଉନାହିଁ। ଫଳରେ ପର୍ବପର୍ବାଣି ସମୟରେ ବାଣ ନ ଫୁଟାଇବାକୁ ନିର୍ଦ୍ଦେଶ ଦେବା ନିମନ୍ତେ ଆବେଦନକାରୀ ସଞ୍ଜୟ କୁମାର ନାୟକ ଏନ୍ଜିଟିଙ୍କ ଦ୍ବାରସ୍ଥ ହୋଇଛନ୍ତି। ସେହିପରି ଭୁବନେଶ୍ବର, କଟକ, ଅନୁଗୋଳ, ତାଳଚେର,
ବାଲେଶ୍ବର, କଳିଙ୍ଗନଗର, ରାଉରକେଲା ଭଳି ୭ଟି ସହର ବାୟୁ ପ୍ରଦୂଷଣ ତାଲିକାରେ ରହିଛି। ଏହି ସହରଗୁଡ଼ିକରେ ବାଣଫୁଟା ଉପରେ ଏନ୍ଜିଟିଙ୍କ କଟକଣା ରହିଛି। ୨୦୨୩ରେ ଦୀପାବଳିରେ ବାଣ ଫୁଟାଯିବା ପରେ ଭୁବନେଶ୍ବରର ବାୟୁ ପ୍ରଦୂଷଣ ମାତ୍ର ୯୦୦ ପିପିଏମରୁ ଅଧିକ ବୃଦ୍ଧି ପାଇଥିଲା। ଚଳିତ ବର୍ଷ ମଧ୍ୟ ଏହାଠାରୁ ଯଥେଷ୍ଟ ଅଧିକ ଶବ୍ଦ ଓ ବାୟୁ ପ୍ରଦୂଷଣକାରୀ ବାଣ ଫୁଟାଯାଇଛି। ନ୍ୟାୟାଳୟ ଓ ପ୍ରଶାସନର କଟକଣା ପରେ ମଧ୍ୟ କାହିଁକି ଏଥିପ୍ରତି ଧ୍ୟାନ ଦିଆ ନ ଗଲା ସରକାରଙ୍କୁ ଜବାବ ତଲବ ଲାଗି ଆବେଦନକାରୀ ଏନ୍ଜିଟି ନିକଟରେ ପ୍ରାର୍ଥନା କରିଛନ୍ତି। ଏହି ମାମଲାରେ ମୁଖ୍ୟ ଶାସନ ସଚିବ, ପୋଲିସ ଡିଜି, ସଦସ୍ୟ ସଚିବ, ବିସ୍ଫୋରକ ସାମଗ୍ରୀ ଅତିରିକ୍ତ ମୁଖ୍ୟ ମୁଖ୍ୟ ନିୟନ୍ତ୍ରକ, ଶ୍ରୀମନ୍ଦିର ପ୍ରଶାସନକୁ ପକ୍ଷଭୁକ୍ତ କରାଯାଇଛି।
