ଅହମଦାବାଦ,୭।୨:କଂଗ୍ରେସ ନେତା ରାହୁଲ ଗାନ୍ଧୀଙ୍କର କନ୍ୟାକୁମାରୀରୁ କଶ୍ମୀର ଭାରତ ଯୋଡ଼ୋ ଯାତ୍ରାର ସଫଳତା ପରେ ଏବେ ଗୁଜରାଟର ପୋର୍ବନ୍ଦରରୁ ଆସାମକୁ ପଦଯାତ୍ରା କରିବା ଲାଗି ଯୋଜନା ପ୍ରସ୍ତୁତ ହେଉଛି। ଏନେଇ ଚଳିତ ମାସ ଶେଷ ଭାଗରେ ରାୟପୁରରେ ଅନୁଷ୍ଠିତ ହେବାକୁ ଥିବା ଏଆଇସିସି ଅଧିବେଶନରେ ନିଷ୍ପତ୍ତି ନିଆଯିବା ଆଶା କରାଯାଉଛି ବୋଲି ଦଳୀୟ ସୂତ୍ରରୁ ଜଣାପଡ଼ିଛି। ମହାତ୍ମା ଗାନ୍ଧୀଙ୍କ ଜନ୍ମସ୍ଥାନ ପୋର୍ବନ୍ଦରରୁ ପଦଯାତ୍ରା ଆରମ୍ଭ ହୋଇପାରେ ବୋଲି କୁହାଯାଉଛି। ଯାତ୍ରାର ତାରିଖ ଚୂଡ଼ାନ୍ତ ହୋଇ ନ ଥିବାବେଳେ ପାର୍ଲାମେଣ୍ଟର ମୌସୁମୀ ଅଧିବେଶନ ପରେ କିମ୍ବା ଚଳିତ ବର୍ଷ ଶେଷ ଭାଗରେ ପ୍ରସ୍ତାବିତ ପଦଯାତ୍ରା ଆରମ୍ଭ ହୋଇପାରେ। ରାହୁଲଙ୍କ ନେତୃତ୍ୱରେ ଭାରତ ଯୋଡ଼ୋ ଯାତ୍ରାକୁ ଅଭୂତପୂର୍ବ ସମର୍ଥନ ମିଳିଥିଲା। ଏହି ଯାତ୍ରା ବେଳେ ବେରୋଜଗାରି, ମୂଲ୍ୟବୃଦ୍ଧି ଏବଂ ଅସମାନତା ଆଦି ପ୍ରସଙ୍ଗକୁ ଦଳ ସଫଳତାର ସହ ଲୋକଙ୍କ ପାଖରେ ପହଞ୍ଚାଇଥିଲା। ପଶ୍ଚିମରୁ ପୂର୍ବକୁ ପ୍ରସ୍ତାବିତ ପଦଯାତ୍ରା ଲାଗି ଏଆଇସିସି ଅଧିବେଶନରେ ନିଷ୍ପତ୍ତି ନିଆଯିବ ବୋଲି ଜଣେ ବରିଷ୍ଠ ନେତା କହିଛନ୍ତି।
