ଶଙ୍ଖା, ସିନ୍ଦୂର ଭଳି ମଙ୍ଗଳସୂତ୍ରକୁ ମଧ୍ୟ ବିବାହିତା ନାରୀର ଗୋଟିଏ ଲକ୍ଷଣ ଭାବେ ବିବେଚନା କରାଯାଇଥାଏ। କଳାମାଳିରେ ଗୁନ୍ଥା ଏହି ମଙ୍ଗଳସୂତ୍ରଟି ବିବାହିତାଙ୍କ ପାଇଁ ସବୁଠୁ ଖାସ୍ ଆଉ ପବିତ୍ର ହୋଇଥାଏ। ଏହାକୁ ମୁଖ୍ୟତଃ ବେକରେ ପିନ୍ଧିବାର ବିଧି ଥିଲା, କିନ୍ତୁ ଏବେର ଏହି ଫ୍ୟାଶନେବଲ୍ ଦୁନିଆରେ ମହିଳାମାନେ ସିମ୍ପଲ୍ ଡିଜାଇନ୍ ମଙ୍ଗଳସୂତ୍ର ପରିବର୍ତ୍ତେ ନୂଆ ନୂଆ ଷ୍ଟାଇଲିଶ୍ ଡିଜାଇନ୍ର ମଙ୍ଗଳସୂତ୍ର ପିନ୍ଧିବାକୁ ପସନ୍ଦ କରୁଥିବା ଦେଖିବାକୁ ମିଳୁଛି। ସେହି ଦୃଷ୍ଟିରୁ ଦେଖିଲେ ବର୍ତ୍ତମାନ ମଙ୍ଗଳସୂତ୍ର ବ୍ରେସ୍ଲେଟ୍ ଏକ ନୂଆ ଟ୍ରେଣ୍ଡ ଭାବେ ଉଭା ହୋଇଛି। ଶୁଣିବାକୁ ମିଳୁଛି ବଲିଉଡ୍ ଅଭିନେତ୍ରୀ ଶିଳ୍ପା ଶେଟ୍ଟୀ କୁନ୍ଦ୍ରା କୁଆଡ଼େ ପ୍ରଥମେ ଏହି ମଙ୍ଗଳସୂତ୍ର ବ୍ରେସ୍ଲେଟ୍ ପିନ୍ଧିଥିବାର ନଜରକୁ ଆସିଥିଲେ। ବାସ୍ ତା’ପରଠୁ ଏହି ଟ୍ରେଣ୍ଡର ଧୀରେ ଧୀରେ ପ୍ରଚଳନ ହେବାକୁ ଲାଗିଥିଲା…
ଅକ୍ଷରବାଲା ମଙ୍ଗଳସୂତ୍ର ବ୍ରେସ୍ଲେଟ୍: ନିଜ ଜୀବନସାଥୀଙ୍କ ନାମର ପ୍ରଥମ ଅକ୍ଷରକୁ ନେଇ ଡିଜାଇନ୍ ହୋଇଥିବା ମଙ୍ଗଳସୂତ୍ର ବ୍ରେସ୍ଲେଟ୍ ବି ପିନ୍ଧିବାକୁ ବେଶ୍ ଟ୍ରେଣ୍ଡି ଲାଗିଥାଏ। ଏହାକୁ ଆପଣ ଶାଢ଼ି ହେଉ କିମ୍ବା ଅନ୍ୟ ଯେ କୌଣସି ଆଉଟ୍ଫିଟ୍ ସହ ମଧ୍ୟ ଆରାମରେ କ୍ୟାରି କରିପାରିବେ।
ହାର୍ଟ ସେପ୍ ଡିଜାଇନ୍: ଆଜିକାଲି ଦେଖିବାକୁ ମିଳୁଛି ବାହାଘର ପରେ ନବ ବିବାହିତାମାନେ ଆଉ ବେଶିଦିନ ପର୍ଯ୍ୟନ୍ତ ବେକରେ ମଙ୍ଗଳସୂତ୍ର ପିନ୍ଧିବାକୁ ପସନ୍ଦ କରୁନାହାନ୍ତି। ସେମାନେ ଚାହିଁଲେ ହାର୍ଟ ସେପ୍ର ପେଣ୍ଡେଣ୍ଟ ଲାଗିଥିବା ବ୍ରେସ୍ଲେଟ୍ ଡିଜାଇନ୍ର ମଙ୍ଗଳସୂତ୍ରକୁ ବି ଟ୍ରାଏ କରି ଡିଫରେଣ୍ଟ ଲୁକ୍ ପାଇପାରିବେ।
ଲେୟାର୍ ଡିଜାଇନ୍: ମାର୍କେଟ୍ରେ ଏବେ ସିଙ୍ଗିଲ୍ ହେଉ ଅବା ଡବଲ୍ ଅଥବା ମଲ୍ଟି ଲେୟାର୍ ଡିଜାଇନ୍ର ମଙ୍ଗଳସୂତ୍ର ବ୍ରେସ୍ଲେଟ୍ ବି ମିଳିଲାଣି। ମହିଳାମାନେ ନିଜ ପସନ୍ଦ ମୁତାବକ ଯେ କୌଣସି ଡିଜାଇନ୍ର ମଙ୍ଗଳସୂତ୍ର ବ୍ରେସ୍ଲେଟ୍ ପିନ୍ଧି ଷ୍ଟାଇଲିଶ୍ ଲୁକ୍ ପାଇପାରିବେ।
ପିନ୍ଧିବାକୁ କମ୍ଫଟେବଲ୍: ଏହି ମଙ୍ଗଳସୂତ୍ର ବ୍ରେସ୍ଲେଟ୍କୁ ମହିଳାମାନେ ଯେ କୌଣସି ଆଉଟ୍ଫିଟ୍ ଏବଂ ଯେ କୌଣସି ଅକେଜନ୍ରେ ଆରାମରେ ପିନ୍ଧିପାରିବେ। କାରଣ ଏହା ପିନ୍ଧିବାକୁ ଯେମିତି କମ୍ଫଟେବଲ୍ ହୋଇଥାଏ ଦେଖିବାକୁ ବି ସେମିତି ଟ୍ରେଣ୍ଡି ଲାଗିଥାଏ।
ଅଭିନେତ୍ରୀଙ୍କ ପସନ୍ଦ: କେବଳ ଶିଳ୍ପା ଶେଟ୍ଟୀ ନୁହନ୍ତି, ଅଭିନେତ୍ରୀ ସୋନମ କପୁର ଓ ବିପାଶା ବସୁଙ୍କୁ ବି ଅନେକ ସମୟରେ ଏହି ମଙ୍ଗଳସୂତ୍ର ବ୍ରେସ୍ଲେଟ୍ ପିନ୍ଧିଥିବାର ଦେଖିବାକୁ ମିଳିଥାଏ।
