ନୂଆଦିଲ୍ଲୀ,୨୯।୧୦ : ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସସି) ର ଆତଙ୍କବାଦ ବିରୋଧୀ କମିଟିର ଦୁଇ ଦିନିଆ ବୈଠକ ଅନୁଷ୍ଠିତ ହୋଇ ଯାଇଛି। ପ୍ରଥମ ଦିନ ମୁମ୍ବାଇଠାରେ ଶୁକ୍ରବାର ଏବଂ ଦ୍ୱିତୀୟ ଦିନ ଶନିବାର ନୂଆଦିଲ୍ଲୀରେ ଏହି ବୈଠକ ଅନୁଷ୍ଠିତ ହୋଇଥିଲା। ମିଳିତ ଜାତିସଂଘର କାଉଣ୍ଟର-ଆତଙ୍କବାଦ କମିଟିର କାର୍ଯ୍ୟନିର୍ବାହୀ ନିର୍ଦ୍ଦେଶାଳୟର ଶାଖା ମୁଖ୍ୟ ଡେଭିଡ ଶାରିଆ ଦିଲ୍ଲୀରେ କହିଛନ୍ତି ଯେ ଏହି ବୈଠକରେ ଉଚ୍ଚ ସ୍ତରରେ ନୂତନ ତଥା ଉଦୀୟମାନ ପ୍ରଯୁକ୍ତିବିଦ୍ୟା ବ୍ୟବହାର କରି ଆତଙ୍କବାଦ କାର୍ଯ୍ୟକଳାପ ବିପଦ ବଢୁଥିବା ବିଷୟରେ ଆଲୋଚନା କରାଯାଇଛି।
ସେ କହିଛନ୍ତି ଯେ ଭାରତର ଅଧ୍ୟକ୍ଷତାରେ ୟୁଏନଏସସି ନୂତନ ତଥା ଉଦୀୟମାନ ପ୍ରଯୁକ୍ତିବିଦ୍ୟା ପ୍ରସଙ୍ଗକୁ ଗୁରୁତ୍ୱ ଭାବରେ ଗ୍ରହଣ କରୁଛି। ଜାତିସଂଘ ସୁରକ୍ଷା ପରିଷଦ ଆସନ୍ତା କିଛି ମାସ ମଧ୍ୟରେ ନିଜର ପ୍ରତିଶ୍ରୁତି ପୂରଣ କରିବାକୁ ଚାହୁଁଛି।
ବୈଠକରେ ଆତଙ୍କବାଦ ବିରୋଧରେ ଏକ ସ୍ବଚ୍ଛ କାର୍ଯ୍ୟ ଯୋଜନା ପ୍ରସ୍ତୁତ ପାଇଁ ସହମତି ପ୍ରକାଶ ପାଇଛି। କେଉଁ କାର୍ଯ୍ୟକଳାପ ଗ୍ରହଣ କରାଯିବ, କେଉଁ ପ୍ରତିଶ୍ରୁତି ପାଳନ ହେବ ଏବଂ ସଦସ୍ୟ ରାଷ୍ଟ୍ରମାନଙ୍କ ସହିତ କିପରି ସମର୍ଥନ ଆଧାରରେ କାର୍ଯ୍ୟ କରାଯିବ ସେନେଇ ଟାର୍ଗେଟ ଧାର୍ଯ୍ୟ କରାଯାଇଛି ବୋଲି ସେ ସୂଚନା ପ୍ରଦାନ କରିଛନ୍ତି।
