ନୂଆଦିଲ୍ଲୀ, ୧୫ା୭: ନିୟମ ଉଲ୍ଲଂଘନ ଅଭିଯୋଗରେ ରିଜର୍ଭ ବ୍ୟାଙ୍କ ମାଷ୍ଟରକାର୍ଡ ଉପରେ କଟକଣା ଲଗାଇଛି। ଫଳରେ ଏହା ନୂଆ ଗ୍ରାହକ ଯୋଡ଼ିପାରିବନି। ୨୨ ଜୁଲାଇଠାରୁ ନିଜ ନେଟ୍ଓ୍ବର୍କରେ ନୂଆ ଗ୍ରାହକ ଯୋଡିବାକୁୁ ମାଷ୍ଟରକାର୍ଡକୁ ବାରଣ କରାଯାଇଛି। ଏହା ମଧ୍ୟରେ ଡେବିଟ୍, କ୍ରେଡିଟ୍ ଏବଂ ପ୍ରିପେଡ୍ ଗ୍ରାହକ ସାମିଲ ରହିଥିବା ଜଣାପଡିଛି। ଆର୍ବିଆଇର କହିବା ଅନୁସାରେ, ମାଷ୍ଟରକାର୍ଡ ଭାରତରେ ପେମେଣ୍ଟ ସିଷ୍ଟମ ଡାଟା ଷ୍ଟୋରେଜ ସଂକ୍ରାନ୍ତ ନିୟମକୁ ଉଲ୍ଲଂଘନ କରିଛି। ଫଳରେ ଏହି ପେମେଣ୍ଟ ସିଷ୍ଟମ ଅପରେଟର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆର୍ବିଆଇ ନିର୍ଦ୍ଦେଶ ଫଳରେ କମ୍ପାନୀର ପୁରୁଣା ଗ୍ରାହକଙ୍କ ଉପରେ କୌଣସି ପ୍ରଭାବ ପଡିବନି ବୋଲି ଜଣାପଡିଛି।
କାର୍ଡ ଜାରି କରୁଥିବା ବ୍ୟାଙ୍କ ଏବଂ ଅଣ ବ୍ୟାଙ୍କ ସଂସ୍ଥାଗୁଡିକୁ ପୂର୍ବରୁ ଆର୍ବିଆଇ ନିର୍ଦ୍ଦେଶନାମା ଜାରି କରିଥିଲା। ୨୦୧୮ ଏପ୍ରିଲରେ ଜାରି ଆର୍ବିଆଇ ସର୍କୁଲାର ମୁତାବକ, ସମସ୍ତ ପେମେଣ୍ଟ ସିଷ୍ଟମ ସୁବିଧା ଯୋଗାଣକାରୀ ନିଜ ଅକ୍ତିଆରରେ ରହିଥିବା ପେମେଣ୍ଟ ସଂକ୍ରାନ୍ତ ଡାଟାକୁ ଭାରତରେ ସଂରକ୍ଷିତ କରିବେ। ଏ ନେଇ ସଂସ୍ଥାଗୁଡିକୁ ୬ ମାସର ସମୟସୀମା ପ୍ରଦାନ କରାଯାଇଥିଲା। ଏହି ମାନଦଣ୍ଡ ପାଳନରେ ମାଷ୍ଟରକାର୍ଡ ବିଫଳ ହୋଇଛି। ୨୦୨୧ରେ ଏହା ପ୍ରଥମ ଘଟଣା ନୁହେଁ।
