କେନ୍ଦୁଝର,୧୬ା୬(ନରେଶ ପଟ୍ଟନାୟକ): କେନ୍ଦୁଝର ଜିଲା ଝୁମ୍ପୁରା ବ୍ଲକ୍ ମୁଖ୍ୟାଳୟରେ ସରକାରଙ୍କ ପକ୍ଷରୁ ନୂତନ ବସ୍ଷ୍ଟାଣ୍ଡ ନିର୍ମାଣ କାର୍ଯ୍ୟ ଚାଲିଛି। ଏହାକୁ ନେଇ ବ୍ଲକ୍ବାସୀ ସ୍ବାଗତ କରିଥିଲେ ହେଁ ନିମ୍ନମାନର କାର୍ଯ୍ୟକୁ ନେଇ ଅସନ୍ତୋଷ ବଢୁଛି। ଏହାକୁ ନେଇ ଝୁମ୍ପୁରା ସରପଞ୍ଚ ବାରମ୍ବାର ସ୍ଥାନୀୟ ତହସିଲକୁ ଜଣାଇଥିଲେ ହେଁ କୌଣସି ପଦକ୍ଷେପ ଗ୍ରହଣ କରାଯାଉ ନାହିଁ। ଏ ନେଇ କାମ ବନ୍ଦ କରି ମାନ ଯାଞ୍ଚ କରା ନ ଗଲେ ପୁଞ୍ଜୀଭୂତ ଅସନ୍ତୋଷ ଆନ୍ଦୋଳନର ରୂପ ନେବ ବୋଲି ସରପଞ୍ଚ ରେବତୀ ବିରୁଆ କହିଛନ୍ତି।
ଯେ, ଉକ୍ତ ବସ୍ଷ୍ଟାଣ୍ଡ ନିର୍ମାଣ ପାଇଁ କିଛି ବର୍ଷ ତଳେ ଭିତ୍ତି ପ୍ରସ୍ତର ସ୍ଥାପନ ସମୟରେ ସ୍ଥାନୀୟ ଲୋକେ ସାମିଲ ହୋଇ ସବୁ ସହଯୋଗ ଯୋଗାଇଦେଇଥିଲେ। ତେବେ ଉପଯୁକ୍ତ ତଦାରଖ ଅଭାବରୁ ନିର୍ମାଣ କାମରେ ବ୍ୟାପକ ଅନିୟମିତତା ଦେଖାଦେଇଛି। ମୁଖ୍ୟତଃ ସୂଚନା ଫଳକ ନ ଥିବାରୁ କାମର ମୂଲ୍ୟ, ସମୟ ଅବଧି ତଥା ଅନ୍ୟାନ୍ୟ ସୂଚନା ଲୋକମାନେ ଜାଣିପାରୁନାହାନ୍ତି। ସେହିପରି ମାଟି/ମୋରମ ବଦଳରେ କଳାଗୁଣ୍ଡ ଯୁକ୍ତ ବର୍ଜ୍ୟ ବ୍ୟବହାର କରାଯାଉଛି। କଂକ୍ରିଟ କାମରେ ସିମେଣ୍ଟ, ବାଲି, ଚିପ୍ସ ଭାଗମାପ ଠିକ୍ ରହୁନାହିଁ। ରାସ୍ତାକଡ଼, ସରକାରୀ ସ୍ଥାନରୁ ଠିକା ସଂସ୍ଥା ମାଟି ଆଣି କାମରେ ବ୍ୟବହାର କରୁଛି। କାମରେ ବିଳମ୍ବ ହେଉଥିବାରୁ ଲୋକମାନଙ୍କ ଯାତାୟାତରେ ନାନା ସମସ୍ୟା ସୃଷ୍ଟି ହେଉଥିବା ସରପଞ୍ଚଙ୍କ ସମେତ ସ୍ଥାନୀୟ ବାସିନ୍ଦା କହିଛନ୍ତି। ସେହିପରି ପ୍ରବଳ ଖରାରେ କାମ ହେଉଥିଲେ ହେଁ ପାଣି ସିଞ୍ଚନ ହେଉ ନ ଥିବାରୁ କଂକ୍ରିଟ୍ ଫାଟିଲାଣି। ସ୍ଥାନୀୟ ଲୋକଙ୍କୁ କର୍ମନିଯୁକ୍ତି ନ ଦେଇ ବାହାର ଲୋକଙ୍କୁ କାମରେ ଲଗାଯାଇଥିବା ଏବଂ ଶ୍ରମ ଆଇନ ମୁତାବକ ସେମାନଙ୍କୁ ସର୍ବନିମ୍ନ ମଜୁରି, ସୁବିଧା, ସୁରକ୍ଷା ଆଦି ଦିଆଯାଉ ନାହିଁ। ଶ୍ରମ ବିଭାଗ ପକ୍ଷରୁ ଯାଞ୍ଚ ସହ ବ୍ଲକ୍, ପ୍ରଶାସନ ପକ୍ଷରୁ ସରପଞ୍ଚଙ୍କ ସମେତ ସ୍ଥାନୀୟ ବାସିନ୍ଦା ସୁକରମଣୀ ମୁଣ୍ଡା, ଲଳିତା ନାଏକ, ସାହଦେବ ସଏ, ଜେମା ମୁଣ୍ଡା, ଅଞ୍ଜଳୀ କୁମାରୀ, ରାସ ନାଏକ ପ୍ରମୁଖ ଲିଖିତ ଭାବେ ସ୍ଥାନୀୟ ତହସିଲଦାରଙ୍କୁ ଜଣାଇବା ସହ କପି ଜିଲାପାଳ, ଉପଜିଲାପାଳ, ୫-ଟି ସଚିବ, ପୋଲିସ ହାଉସିଂ ବୋର୍ଡ କର୍ପୋରେଶନଙ୍କୁ ପ୍ରଦାନ କରିଥିବା କହିଛନ୍ତି। ଝୁମ୍ପୁରା ଭାରପ୍ରାପ୍ତ ତହସିଲଦାର ତଥା ଅତିରିକ୍ତ ତହସିଲଦାର ରମେଶ ଚନ୍ଦ୍ର ନାୟକ କହିଛନ୍ତି, ଅଭିଯୋଗ ମିଳିଛି। ଘଟଣାସ୍ଥଳକୁ ଯାଇ ଯାଞ୍ଚ ପରେ ଠିକା ସଂସ୍ଥାକୁ ଠିକ୍ ଭାବେ କାମ କରିବାକୁ କୁହାଯାଇଥିବା କହିଥିଲେ।
