ମୋର୍ବି,୨ା୧୧: ଗୁଜରାଟର ମୋର୍ବି ଝୁଲାପୋଲ ଦୁର୍ଘଟଣା ପରେ ଏତେ ଦଶନ୍ଧି ମଧ୍ୟରେ ଏତେ ସଂଖ୍ୟକ ମୃତଦେହ କେବେ ଦେଖି ନାହାନ୍ତି ବୋଲି ସହରର ଶବଦାହ ଏବଂ କବରସ୍ଥାନର କର୍ମକର୍ତ୍ତାମାନେ କହିଛନ୍ତି। ରବିବାର ସନ୍ଧ୍ୟାରେ ମାଛୁ ନଦୀ ଉପରେ ବ୍ରିଟିଶ ଅମଳର ଝୁଲାପୋଲ ଭୁଶୁଡ଼ି ୧୩୫ ଜଣଙ୍କର ମୃତ୍ୟୁ ଘଟିଥିବା ବେଳେ ୧୭୦ ଜଣଙ୍କୁ ଉଦ୍ଧାର କରାଯାଇଥିଲା। ସୁନ୍ନି ମୁସଲମାନମାନଙ୍କ ପାଇଁ ମୋର୍ବିର ସର୍ବବୃହତ ସମାଧିସ୍ଥଳର ସାଜିଦ ପିଲୁଦିଆ କହିଛନ୍ତି, ଏହି ଘଟଣାରେ ମୁସଲମାନ ସମ୍ପ୍ରଦାୟର ପ୍ରାୟ ୪୦ ଜଣ ସଦସ୍ୟଙ୍କର ମୃତ୍ୟୁ ହୋଇଛି। ସୋମବାର ସେମାନଙ୍କ ମଧ୍ୟରୁ ୨୫ ଜଣଙ୍କୁ ଏବଂ ଅନ୍ୟ ଜଣେ ନିକଟସ୍ଥ ଶ୍ମଶାନରେ ସମାଧି ଦିଆଯାଇଛି। ୧୯୭୯ର ମାଛୁ ଡ୍ୟାମ୍ ଘଟଣା ପରେ ଏହା ସବୁଠାରୁ ବଡ଼ ଦୁଃଖଦ ଘଟଣା।
ପିଲୁଦିଆ କହିଛନ୍ତି, ପ୍ରଶାସନର ଅବହେଳା ଯୋଗୁ ଏସବୁ ଘଟିଛି। ସମାଧି କର୍ମୀ ୟୁସୁଫ ସମାଦା ଏବଂ ୟୁନୁସ୍ ଶେଖ୍ କହିଛନ୍ତି, ଏତେ ସଂଖ୍ୟକ ମୃତଦେହକୁ କବର ଦେବା ପାଇଁ ରବିବାର ରାତିରୁ ସୋମବାର ସନ୍ଧ୍ୟା ପର୍ଯ୍ୟନ୍ତ ୨୫ରୁ ୩୦ କବର ଖୋଳିଥିଲେ। ସେମାନଙ୍କ ମଧ୍ୟରୁ ଜଣେ କହିଛନ୍ତି, ‘ଏହା ଆମ ପାଇଁ ଅତ୍ୟନ୍ତ ଅସ୍ବାଭାବିକ। ଆମେ ସାଧାରଣତଃ ମାସରେ ପ୍ରାୟ ୨୦ଟି କବର ଖୋଳୁ’। ସେ କହିଛନ୍ତି, ସାଧାରଣତଃ ପ୍ରତି ସପ୍ତାହରେ ଏହି ଶ୍ମଶାନରେ ଦୁଇ କିମ୍ବା ତିନୋଟି ମୃତଦେହ ଦାହ କରାଯାଏ। ଗତ କିଛି ଦଶନ୍ଧି ମଧ୍ୟରେ ବି ଏତେ ସଂଖ୍ୟକ ମୃତଦେହ ଦେଖିନାହୁଁ।
‘ଏକ ବିଶେଷଜ୍ଞ ଦଳ କହିଛନ୍ତି, ସମସ୍ତ ୧୩୫ ଜଣଙ୍କର ମୃତ୍ୟୁର କାରଣ ପାଣିରେ ବୁଡ଼ିବା ଏବଂ ଆଉ କେତେକ ଆହତ ଯୋଗୁ ମୃତ୍ୟୁବରଣ କରିଛନ୍ତି। ତେଣୁ ଆଉ କିଛି ଜାଣିବାକୁ ବାକି ନ ଥିଲା। ସେହି ଆଧାରରେ ମୃତଦେହ ବ୍ୟବଚ୍ଛେଦ କରାଯାଇ ନ ଥିଲା।
ଶ୍ମଶାନର ସଂଚାଳକ ତଥା ମୃତକଙ୍କ ସମ୍ପର୍କୀୟ କହିଛନ୍ତି, ୧୯୭୯ ମସିହାରେ ମାଛୁ ଡ୍ୟାମ ଦୁର୍ଘଟଣାକୁ ମନେ ପକାଇବା ପାଇଁ ଏହି ଦୁଃଖଦ ଘଟଣା ଥିଲା। ସେତେବେଳେ ମୋର୍ବିରେ ହଜାର ହଜାର ଲୋକ ବନ୍ୟାରେ ଭାସି ଯାଇଥିଲେ। ଏହି ସମୟରେ ଜାତୀୟ ବିପର୍ଯ୍ୟୟ ମୁକାବିଲା ଫୋର୍ସ ଏବଂ ଅନ୍ୟାନ୍ୟ ଏଜେନ୍ସିମାନେ ମୃତଦେହକୁ ଘଟଣାସ୍ଥଳରୁ ଖୋଜାଖୋଜି କରିଥିଲେ। ଏହି ଘଟଣା ପରେ ଝୁଲାପୋଲ ଭୁଶୁଡ଼ିବା ସବୁଠୁ ଦୁଃଖଦାୟକ ଘଟଣା।
