ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ରେ ନେଦରଲାଣ୍ଡ୍ସର ଆଧିପତ୍ୟ ଅବ୍ୟାହତ ରହିଛି। କଳିଙ୍ଗ ଷ୍ଟାଡିୟମରେ ଶୁକ୍ରବାର ଅନୁଷ୍ଠିତ ମ୍ୟାଚରେ ଏହି ଦଳ ଅଷ୍ଟ୍ରେଲିଆକୁ ୬-୨ ଗୋଲରେ ପରାସ୍ତ କରିଛି। କଳିଙ୍ଗରେ ନେଦରଲାଣ୍ଡ୍ସର ଏହା କ୍ରମାଗତ ୪ର୍ଥ ବିଜୟ। ନେଦରଲାଣ୍ଡ୍ସ ଚଳିତ ସିଜନରେ ମୋଟ ୮ଟି (ଆଣ୍ଟ୍ବେର୍ପରେ ୪ଟି) ମ୍ୟାଚ ଖେଳି ସାରିଥିବାବେଳେ ଅଲ୍ ଓ୍ବିନ ବିଜୟ ରେକର୍ଡ ସହ ୨୪ ପଏଣ୍ଟ ପାଇ ଟେବୁଲର ଶୀର୍ଷରେ ନିଜର ସ୍ଥାନ ସୁଦୃଢ଼ କରିଛି। ଅନ୍ୟପକ୍ଷରେ ଅଷ୍ଟ୍ରେଲିଆ ୪ ମ୍ୟାଚରୁ ଦ୍ୱିତୀୟ ପରାଜୟ ବରଣ କରିଛି।
ଆକ୍ରମଣାତ୍ମକ ଖେଳ ପାଇଁ ଉଭୟ ଦଳ ବେଶ୍ ପରିଚିତ ଥିବାରୁ ମ୍ୟାଚ ସଂଘର୍ଷପୂର୍ଣ୍ଣ ହେବା ଆଶା କରାଯାଉଥିଲା। ମାତ୍ର ଅଷ୍ଟ୍ରେଲିଆ ଉପରେ ଆରମ୍ଭରୁ ଭାରି ପଡ଼ିଥିଲା ନେଦରଲାଣ୍ଡ୍ସ। ୭ମ ମିନିଟରେ ଭିନ ମାର୍ଜିନ ଓ ୯ମ ମିନିଟରେ ମାଟିଆ ଫ୍ରେଡେରିକ୍ଙ୍କ ଫିଲ୍ଡ ଗୋଲ ବଳରେ ନେଦରଲାଣ୍ଡ୍ସ ୨-୦ରେ ଅଗ୍ରଣୀ ହୋଇ ଅଷ୍ଟ୍ରେଲିଆକୁ ବ୍ୟାକ୍ଫୁଟକୁ ଠେଲି ଦେଇଥିଲା। ଦ୍ୱିତୀୟ କ୍ୱାର୍ଟର ଆରମ୍ଭରେ ଅର୍ଥାତ୍ ୨୦ତମ ମିନିଟରେ ପେନାଲ୍ଟି କର୍ନରରୁ ଜାନସେନ ୟିବି ଦଳ ପକ୍ଷରୁ ତୃତୀୟ ଗୋଲଟି ଦେଇଥିବାବେଳେ ଅଷ୍ଟ୍ରେଲିଆର ଷ୍ଟିଓ୍ବାର୍ଟ ଟାଟୁମ ୨୮ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ। ପ୍ରଥମାର୍ଦ୍ଧ ଶେଷ ବେଳକୁ ନେଦରଲାଣ୍ଡ୍ସ ୩-୧ରେ ଅଗ୍ରଣୀ ରହିଥିଲା। ତୃତୀୟ କ୍ୱାର୍ଟରରେ ମଧ୍ୟ ନେଦରଲାଣ୍ଡ୍ସର ପ୍ରାଧାନ୍ୟ ବରବତ୍ତର ରହିଥିଲା। ୩୯ତମ ମିନିଟରେ ଜାନସେନ ୟିବି ପେନାଲ୍ଟି କର୍ନରରୁ ବ୍ୟକ୍ତିଗତ ଦ୍ୱିତୀୟ ଓ ଦଳ ପକ୍ଷରୁ ୪ର୍ଥ ଗୋଲ ସ୍କୋର କରିଥିଲେ। ଅନ୍ତିମ କ୍ୱାର୍ଟରରେ କଡ଼ା ଟକ୍କର ହୋଇଥିଲେ ହେଁ ନେଦରଲାଣ୍ଡ୍ସର ଭିନ୍ ମାର୍ଜିନ ୧ ମିନିଟ ବ୍ୟବଧାନରେ ୨ଟି (୪୮ ଓ ୪୯ତମ ମିନିଟ) ଗୋଲ ଦେଇ ହ୍ୟାଟ୍ରିକ ଅର୍ଜନ କରିଥିଲେ। ୫୨ତମ ମିନିଟରେ ଅଷ୍ଟ୍ରେଲିଆର ଷ୍ଟିଓ୍ବାର୍ଟ ଗ୍ରେସ୍ ଏକ ଗୋଲ ପରିଶୋଧ କରିଥିଲେ, ମାତ୍ର ସେତେବେଳକୁ ବହୁ ବିଳମ୍ବ ହୋଇ ଯାଇଥିଲା। ବିପଜ୍ଜନକ ଖେଳ ପାଇଁ ନେଦରଲାଣ୍ଡ୍ସର ଆଲବେର୍ସ ଫେଲିସେ ଓ ମୋଇସ ଫ୍ରିକି ଗ୍ରୀନ୍ କାର୍ଡ ପାଇଥିଲେ।
