ଓ୍ବାଶିଂଟନ୍, ୩୦ା୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଓ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ସୋମବାର ହ୍ବାଇଟହାଉସରେ ପରସ୍ପରକୁ ଭେଟିଛନ୍ତି। ଟ୍ରମ୍ପ୍ ଦ୍ୱିତୀୟ ଥର ରାଷ୍ଟ୍ରପତି ହେବା ପରେ ଏହା ନେତାନ୍ୟାହୁଙ୍କ ଚତୁର୍ଥ ଆମେରିକା ଗସ୍ତ। ଏହି ଅବସରରେ ଗାଜାରେ ଯୁଦ୍ଧ ବନ୍ଦ ପାଇଁ ଆମେରିକାର ୨୦ ସୂତ୍ରୀ ଯୋଜନାରେ ନେତାନ୍ୟାହୁ ରାଜି ହୋଇଛନ୍ତି। ଏନେଇ ଟ୍ରମ୍ପ୍ ଘୋଷଣା କରିବା ସହ ନେତାନ୍ୟାହୁଙ୍କୁ ଧନ୍ୟବାଦ ଦେଇଛନ୍ତି। ଯୁଦ୍ଧ ବନ୍ଦ ପାଇଁ ଆମେରିକାର ଉକ୍ତ ପ୍ରସ୍ତାବରେ ହମାସ ମଧ୍ୟ ସହମତି ଦେଖାଇବ ବୋଲି ସେ ଆଶା ପ୍ରକାଶ କରିଛନ୍ତି। ତେବେ ଆମେରିକାର ପ୍ରସ୍ତାବକୁ ହମାସ ପ୍ରତ୍ୟାଖ୍ୟାନ କଲେ ଏହାକୁ ଧ୍ୱଂସ କରିବାରେ ଆମେରିକା ଇସ୍ରାଏଲକୁ ପୂର୍ଣ୍ଣ ସମର୍ଥନ କରିବ ବୋଲି ଟ୍ରମ୍ପ୍ ହମାସକୁ ଚେତାବନୀ ଦେଇ କହିଛନ୍ତି। ଆମେରିକାର ଗାଜା ଶାନ୍ତି ଯୋଜନାରେ ନେତାନ୍ୟାହୁ ରାଜି ହେବା ଗାଜାରେ ଶାନ୍ତି ସ୍ଥାପନ ଦିଗରେ ଏକ ଉଲ୍ଲେଖଯୋଗ୍ୟ ସଫଳତା ବୋଲି ଟ୍ରମ୍ପ୍ କହିଛନ୍ତି। ତେବେ ଏହି ଆଲୋଚନା ସମୟରେ ନେତାନ୍ୟାହୁ ହ୍ବାଇଟ ହାଉସରୁ କାତାର ପ୍ରଧାନମନ୍ତ୍ରୀ ଶେଖ୍ ମହମ୍ମଦ ବିନ୍ ଅବଦୁଲ ରହମାନ ଅଲ୍-ଥାନୀଙ୍କୁ ଫୋନ୍ କରି ଗତ ସେପ୍ଟେମ୍ବର ୯ରେ ଇସ୍ରାଏଲ ପକ୍ଷରୁ ଦୋହାରେ କରାଯାଇଥିବା ଆକ୍ରମଣ ପାଇଁ କ୍ଷମା ମାଗିଥିବା ନେଇ ରଏଟର୍ସରେ ରିପୋର୍ଟ ପ୍ରକାଶ ପାଇଛି। କାତାରର ସାର୍ବଭୌମତ୍ୱକୁ ଉଲ୍ଲଂଘନ କରିଥିବାରୁ ନେତାନ୍ୟାହୁ ଦୁଃଖ ପ୍ରକାଶ କରିବା ସହ ଭବିଷ୍ୟତରେ ଇସ୍ରାଏଲ ଏପରି ଆକ୍ରମଣ କରିବ ନାହିଁ ବୋଲି କାତାର ପ୍ରଧାନମନ୍ତ୍ରୀଙ୍କୁ ପ୍ରତିଶ୍ରୁତି ଦେଇଥିବା ରିପୋର୍ଟରେ କୁହାଯାଇଛି। ପ୍ରକାଶ ଯେ, ଗତ ୯ରେ କାତାରର ରାଜଧାନୀ ଦୋହାରେ ଇସ୍ରାଏଲ ହମାସର ବରିଷ୍ଠ ନେତାଙ୍କୁ ଟାର୍ଗେଟ କରି ଏୟାର ଷ୍ଟ୍ରାଇକ୍ କରିଥିଲା, ଯେଉଁଥିରେ ୫ ହମାସ ସଦସ୍ୟ ଏବଂ କାତାରର ଜଣେ ସୁରକ୍ଷା ଅଧିକାରୀଙ୍କର ମୃତ୍ୟୁ ଘଟିଥିଲା। ଏହି ଆକ୍ରମଣ ପରେ ଆମେରିକା ସହ ଇସ୍ରାଏଲର ସମ୍ପର୍କରେ ତୀକ୍ତତା ସୃଷ୍ଟି ହୋଇଥିଲା।
