କଟକ ଅଫିସ୍, ୩।୨: କଟକ ଖାନ୍ନଗରଠାରେ ନିର୍ମାଣ ହେବାକୁ ଥିବା ଆନ୍ତଃରାଜ୍ୟ ବସ୍ ଟର୍ମିନାଲ୍ ପ୍ରକଳ୍ପ ନିର୍ମାଣରେ ଲାଗିଛି ରୋକ୍। ପ୍ରସ୍ତାବିତ ୧୨ଏକର ପରିମିତ ବସ୍ ଟର୍ମିନାଲ ପ୍ରକଳ୍ପ ମଧ୍ୟରେ ଥିବା କାଳୀ ମନ୍ଦିରକୁ ନ ଭାଙ୍ଗିବା ପାଇଁ ମଙ୍ଗଳବାର ହାଇକୋର୍ଟ ସ୍ଥଗିତାଦେଶ ଦେଇଛନ୍ତି। ସ୍ଥାନୀୟ କେତେଜଣ ବାସିନ୍ଦାଙ୍କ ଦ୍ୱାରା କରାଯାଇଥିବା ଏକ ଜନସ୍ବାର୍ଥ ମାମଲାର ଶୁଣାଣି କରି ଅଦାଲତ ସ୍ଥାନୀୟ ପ୍ରଶାସନକୁ ଉକ୍ତ ପ୍ରକଳ୍ପ ସ୍ଥାନ ଉପରେ ଥିବା ମନ୍ଦିରର ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତି ଉପରେ ସ୍ଥିତାବସ୍ଥା ଜାରି କରିବାକୁ ନିର୍ଦ୍ଦେଶ ଦେଇଛନ୍ତି।
ଗତ ୨୩ତାରିଖ ନେତାଜୀ ସୁଭାଷ ଚନ୍ଦ୍ର ବୋଷ ଜୟନ୍ତୀ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖାନ୍ନଗରଠାରେ ଆନ୍ତଃରାଜ୍ୟ ବସ୍ ଟର୍ମିନାଲର ଶିଳାନ୍ୟାସ କରିଥିଲେ। ୬୫କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ନିର୍ମାଣ କରାଯିବା ପାଇଁ ବ୍ୟୟ ଅଟକଳ କରାଯାଇଛି। ଏଥିରେ ଯାତ୍ରୀମାନଙ୍କ ପାଇଁ ବିଭିନ୍ନ ଅତ୍ୟାଧୁନିକ ସୁବିଧା ବ୍ୟବସ୍ଥା ରହିବା ସହ ୩ମହଲା ବିଶିଷ୍ଟ ଟର୍ମିନାଲ ରହିବ। ଏକକାଳୀନ ୧୮୦ ବସ୍, ୨୪୭ ଗାଡ଼ି ପାର୍କିଂ, ଗାଡ଼ି ମରାମତି ଏବଂ ରକ୍ଷଣାବେକ୍ଷଣ ସୁବିଧା ମଧ୍ୟ ଉପଲବ୍ଧ ହୋଇପାରିବ। ଏବେ ହାଇକୋର୍ଟ ବସ୍ ଟର୍ମିନାଲ୍ ଉପରେ ସ୍ଥଗିତାଦେଶ ଜାରି କରିବା ପରେ ଏହାର ଭବିଷ୍ୟତ ନିର୍ମାଣ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରକାଶ ଯେ, ଗତ ସପ୍ତାହରେ କଟକ ଏମ୍ପି ଭର୍ତ୍ତୃହରି ମହତାବ ବସ୍ ଟର୍ମିନାଲ ପ୍ରକଳ୍ପକୁ ନେଇ ପ୍ରଶ୍ନ ଉଠାଇଥିଲେ। ଖାନ୍ନଗରରେ ବସ୍ ଟର୍ମିନାଲ ପ୍ରକଳ୍ପ ନିର୍ମାଣ କରିବା ନେଇ ନିଷ୍ପତ୍ତି ରାଜ୍ୟ ସଚିବାଳୟରେ ନିଆଯାଇଛି। ଏହି ନିଷ୍ପତ୍ତି ନେବା ସମୟରେ ସ୍ଥାନୀୟ ଏମ୍ପି ଭାବରେ ତାଙ୍କର ମତାମତ ନିଆଯାଇ ନ ଥିଲା। ପ୍ରସ୍ତାବିତ ସ୍ଥାନରେ ବସ୍ ଟର୍ମିନାଲ୍ ନିର୍ମାଣ କରାଗଲେ ମନ୍ଦିର ସହ ଏକ ବୃହତ୍ ଗ୍ରନ୍ଥାଗାର ଏବଂ ପଡ଼ିଆ ଉଚ୍ଛେଦ ହେବ। ଏପରି କି ଏହି ପ୍ରକଳ୍ପ ନିମନ୍ତେ ସ୍ଥାନୀୟ ଲୋକଙ୍କ ମତାମତ ମଧ୍ୟ ନିଆଯାଇ ନ ଥିବା ଭର୍ତ୍ତୃହରି କହିଥିଲେ।
