ନୂଆଦିଲ୍ଲୀ,୧୮ା୨: ସିଙ୍ଗାପୁର ପ୍ରଧାନମନ୍ତ୍ରୀ ଲି ସିଏନ୍ ଲୁଙ୍ଗ୍ ପାର୍ଲାମେଣ୍ଟରେ ଉଦ୍ବୋଧନ ଦେବାବେଳେ ‘ନେହେରୁ ଇଣ୍ଡିଆରେ ଏମ୍ପିମାନଙ୍କ ଅପରାଧ ରେକର୍ଡ’ ସମ୍ପର୍କରେ ବିବାଦୀୟ ମନ୍ତବ୍ୟ ଦେଇଥିବାରୁ ଏହାକୁ ଭାରତ ପକ୍ଷରୁ ନିନ୍ଦା କରାଯାଇଛି। ଲୁଙ୍ଗ୍ଙ୍କ ଏଭଳି ଅବାଞ୍ଛିତ ମନ୍ତବ୍ୟ ପାଇଁ ନୂଆଦିଲ୍ଲୀ ପକ୍ଷରୁ ସିଙ୍ଗାପୁର ରାଷ୍ଟ୍ରଦୂତ ସାଇମନ ଓ୍ବଙ୍ଗ୍ଙ୍କୁ ସମନ ଜାରି କରାଯାଇଛି।
ଲୁଙ୍ଗ୍ ବୁଧବାର ସିଙ୍ଗାପୁର ପାର୍ଲାମେଣ୍ଟରେ ଉଦ୍ବୋଧନ ଦେବା ବେଳେ ଗଣତନ୍ତ୍ର କିପରି କାର୍ଯ୍ୟ କରିବା ଉଚିତ କହିବାକୁ ଯାଇ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ କଥା ଉଠାଇଥିଲେ। ସେ କହିଥିଲେ, ଉଚ୍ଚ ଚିନ୍ତାଧାରା ଓ ମହାନ୍ ମୂଲ୍ୟବୋଧ ଆଧାରରେ ଅଧିକାଂଶ ଦେଶ ପ୍ରତିଷ୍ଠା ହୋଇଥିଲା। ତେବେ ଧୀରେ ଧୀରେ ରାଜନୈତିକ ପରିବର୍ତ୍ତନ ଯୋଗୁ ସେହିି ଚିନ୍ତାଧାରା ବଦଳିଗଲା। ଏବେ ଅଧିକାଂଶ ରାଜନୈତକ ବ୍ୟବସ୍ଥା ପ୍ରତିଷ୍ଠାତା ନେତାମାନଙ୍କ ସ୍ବୀକୃତି ପାଇବା ଯୋଗ୍ୟ ହେବ ନାହିଁ ବୋଲି ଲୁଙ୍ଗ୍ କହିଛନ୍ତି। ସେତେବେଳର ନେତାମାନେ ଦୃଢ଼ ଆତ୍ମବିଶ୍ୱାସର ସହ ଲଢ଼ି ଦେଶକୁ ସ୍ବାଧୀନତା ଆଣିଥିଲେ। ସେମାନେ ଅସାଧାରଣ ବ୍ୟକ୍ତିତ୍ୱ ଥିଲେ, ଯାହାଙ୍କଠାରେ ଅଦମ୍ୟ ସାହସ ତଥା ସାମର୍ଥ୍ୟ ରହିଥିଲା। ସେମାନେ ଦେଶର ସ୍ବାଧୀନତା ଆନ୍ଦୋଳନର ନେତୃତ୍ୱ ନେଇ ଜନନେତା ତଥା ରାଷ୍ଟ୍ରନେତାରେ ପରିଣତ ହୋଇଥିଲେ। ଡାଭିଡ୍ ବେନ୍-ଗୁରିଅନ୍ସ, ଜବାହରଲାଲ ନେହେରୁ ସେମାନଙ୍କ ମଧ୍ୟରୁ ଅନ୍ୟତମ ବୋଲି ଲୁଙ୍ଗ୍ କହିଥିଲେ। ତେବେ ଗଣମାଧ୍ୟମ ରିପୋର୍ଟ ଅନୁଯାୟୀ ନେହେରୁଙ୍କ ଭାରତରେ ଲୋକ ସଭାରେ ସେମାନଙ୍କ ବିରୋଧରେ ବଳାତ୍କାର, ହତ୍ୟା ଆଦି ଆପରାଧିକ ମାମଲା ବିଚାରାଧୀନ ଥିଲା। ଯଦିଓ ସେଥିରୁ ଅଧିକାଂଶ ଅଭିଯୋଗ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କୁହାଯାଇଥିବା ସିଙ୍ଗାପୁର ପ୍ରଧାନମନ୍ତ୍ରୀ ବୁଧବାର ପାର୍ଲାମେଣ୍ଟକୁ କହିଥିଲେ। ସେ କହିଛନ୍ତି, ସରକାରରେ ଥିବା ବ୍ୟକ୍ତିମାନେ ଯଦି ସାଧୁତା ବଜାୟ ରଖନ୍ତି ଏବଂ ଆଇନ ଓ ନିୟମାବଳୀକୁ ସମସ୍ତଙ୍କ ପାଇଁ ସମାନ ଭାବେ କାର୍ଯ୍ୟକାରୀ କରନ୍ତି, ତେବେ ସିଙ୍ଗାପୁର ଜନସାଧାରଣ ସେମାନଙ୍କ ନେତା, ବ୍ୟବସ୍ଥା ଓ ଅନୁଷ୍ଠାନଗୁଡ଼ିକ ଉପରେ ବିଶ୍ୱାସ ରଖିପାରିବେ।
