ଡେରାବିଶ,୨୬ା୧୧(ବେବର୍ତ୍ତା ଅଜୟ ଦାସ)ଦିନେ ଯେଉଁ ପଡ଼ିଆରେ ଆୟୋଜିତ ବିଶାଳ ସମାବେଶରେ ଜାତିର ପିତା ମହାତ୍ମା ଗାନ୍ଧୀ ସ୍ବାଧୀନତାର ମନ୍ତ୍ର ଫୁଙ୍କିଥିଲେ ସେହି ସ୍ଥାନ ଇତିହାସ ପାଲଟିଛି। ହେଲେ ପ୍ରଶାସନିକ ଅବହେଳା ଯୋଗୁ ସେହି ପଡ଼ିଆ ଆଜି ବିପର୍ଯ୍ୟସ୍ତ ଅବସ୍ଥାରେ ରହିଛି। କେନ୍ଦ୍ରାପଡ଼ା ଜିଲା ଡେରାବିଶ ବ୍ଲ୍ଳକ ବାରିମୂଳ ପଞ୍ଚାୟତ ବାରିମୂଳଠାରେ ୧୯୩୪ ମେ ୩୦ରେ ଗାନ୍ଧିଜୀ ଏକ ବିଶାଳ ସମାବେଶରେ ଉଦ୍ବୋଧନ ଦେଇଥିଲେ। ସେହିଦିନଠାରୁ ସ୍ବାଧୀନତା ଆନ୍ଦୋଳନର ସ୍ମାରକୀ ଭାବେ ପରିଚିତ ବାରିମୂଳ ଗାନ୍ଧିସ୍ମୃତି ପୀଠ ସ୍ବତନ୍ତ୍ର ପରିଚୟ ପାଇଥିଲା। ଗୋବରୀ ନଦୀ କୂଳରେ ଏହି ପଡ଼ିଆରେ ଥିବା ଏକ ବରଗଛ ମୂଳରେ କେବଳ ଗାନ୍ଧୀଙ୍କ ପ୍ରତିମୂର୍ତ୍ତି ସ୍ଥାପନ କରି ପ୍ରଶାସନ ନିଜର ଦାୟିତ୍ୱ ଶେଷ କରିଛି। ଦୀର୍ଘ ବର୍ଷ ହେବ ଅବହେଳିତ ହୋଇ ପଡ଼ିଥିବା ଏହି ପୀଠର ଉନ୍ନତି ପାଇଁ ଜିଲା ସ୍ବାଧୀନତା ସଂଗ୍ରାମୀ ସଂଘ, ବିଭିନ୍ନ ସାମାଜିକ ସଙ୍ଗଠନ ଓ ବ୍ୟକ୍ତି ବିଶେଷ ପକ୍ଷରୁ ବାରମ୍ବାର ଦାବି ହୋଇଆସୁଥିଲେ ମଧ୍ୟ ଏ ଦିଗରେ ପ୍ରଶାସନିକସ୍ତରରେ କୌଣସି ପଦକ୍ଷେପ ନିଆ ନ ଯିବା ଅତ୍ୟନ୍ତ ଦୁଃଖର କଥା ବୋଲି ଜିଲା ସ୍ବାଧୀନତା ସଂଗ୍ରାମୀ ସଂଘ ସଭାପତି ବିମ୍ବାଧର ମୁଦୁଲି କହିଛନ୍ତି। ଜିଲାରେ ବିଭିନ୍ନ ସରକାରୀ ଯୋଜନା କାର୍ଯ୍ୟକାରୀ ହେଉଥିବାବେଳେ ଗାନ୍ଧୀସ୍ମୃତି ପୀଠକୁ ସମ୍ପୂର୍ଣ୍ଣ ଅଣଦେଖା କରାଯାଇଛି ବୋଲି ମୁଦୁଲି କହିଛନ୍ତି। ବିଭିନ୍ନ ପ୍ରାନ୍ତରୁ ବହୁ ସଂଗ୍ରାମୀ ଓ ତାଙ୍କ ଦାୟାଦମାନେ ସ୍ମୃତିପୀଠକୁ ଦେଖିବା ଆସୁଛନ୍ତି। ହେଲେ ଅବହେଳିତ ହୋଇ ପୀଠଟି ପଡ଼ିଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଏହାକୁ ସରକାର ଏକ ପର୍ଯ୍ୟଟନସ୍ଥଳୀର ମାନ୍ୟତା ଦେବା ପାଇଁ ଜିଲାପାଳ ତୁରନ୍ତ ପଦକ୍ଷେପ ନେବାକୁ ବାରିମୂଳ ମହାତ୍ମା ଗାନ୍ଧୀ ଫାଉଣ୍ଡେଶନ ଅଧ୍ୟକ୍ଷ ଆଇନଜୀବୀ ପ୍ରତାପ ମହାପାତ୍ର କହିଛନ୍ତି। ଅପରପକ୍ଷେ ବାରିମୂଳ ପଞ୍ଚାୟତ ପକ୍ଷରୁ ଏହି ସ୍ମୃତିପୀଠରେ ଏକ ପାର୍କ ନିର୍ମାଣ ମଧ୍ୟ କରାଯାଇଛି। ଉକ୍ତ ପାର୍କ ପାଇଁ ୪୦ ଲକ୍ଷ ଟଙ୍କା ଖର୍ଚ୍ଚ ହୋଇ ସାରିଥିଲେ ମଧ୍ୟ ଆବଶ୍ୟକ ଅର୍ଥ ଅଭାରୁ ତାହା ଅଧାପନ୍ତରିଆ ହୋଇ ପଡ଼ିରହିଛି ବୋଲି ପଞ୍ଚାୟତର ପୂର୍ବତନ ସରପଞ୍ଚ ଶୁଦ୍ଧଦେବ ବେହେରା କହିଛନ୍ତି। କେନ୍ଦ୍ରାପଡ଼ା-ଇନ୍ଦୁପୁର ରାସ୍ତାରୁ ପାର୍କ ପର୍ଯ୍ୟନ୍ତ ପଡ଼ିଥିବା ରାସ୍ତା ଦୀର୍ଘବର୍ଷ ତଳେ ବ୍ଲକ ପକ୍ଷରୁ ନିର୍ମାଣ କରାଯାଇଥିଲା। ତାହା ମଧ୍ୟ ଅବହେଳିତ ହୋଇରହିଛି। ଏହି ରାସ୍ତାର ଉଭୟପାର୍ଶ୍ୱରେ ଉଜ୍ଜ୍ୱଳ ଆଲୋକ ବ୍ୟବସ୍ଥା କରାଯିବା ସହ ଉନ୍ନତମାନର ରାସ୍ତା ନିର୍ମାଣ କରାଯିବା ପାଇଁ ବାରିମୂଳ ପଞ୍ଚାୟତର ବରିଷ୍ଠ କଂଗ୍ରେସ ନେତା ଜୟନ୍ତ ମୁଖାର୍ଜୀ ଜିଲାପାଳଙ୍କ ନିକଟରେ ଦାବି କରିଛନ୍ତି। ଏ ସମ୍ପର୍କରେ ବିଡିଓ ଦାଶରଥି ଜେନାଙ୍କୁ ପଚାରିବାରେ ଉକ୍ତ ପୀଠର ଉନ୍ନତି ପାଇଁ ସମ୍ପୃକ୍ତ ପଞ୍ଚାୟତର ସରପଞ୍ଚଙ୍କ ସହ ଆଲୋଚନା କରିବା ପରେ ଯାହା କିଛି ପଦକ୍ଷେପ ନେବେ ବୋଲି ସେ କହିଛନ୍ତି।
