ନୂଆଦିଲ୍ଲୀ,୮।୮: ଟୋକିଓ ଅଲିମ୍ପିକ୍ସରେ ଇତିହାସ ସୃଷ୍ଟି କରିଥିବା ଭାରତୀୟ ଜାଭେଲିନ ଥ୍ରୋ ଖେଳାଳି ନୀରଜ ଚୋପ୍ରା ୧୩ ଦିନ ପରେ ପ୍ରଥମ ଟୁଇଟ୍ କରିଛନ୍ତି। ଏହି ଟୁଇଟ୍ରେ ନୀରଜ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ଜୁଲାଇ ୨୬ ପରେ ଏହା ନୀରଜଙ୍କ ପ୍ରଥମ ଟୁଇଟ୍। ନୀରଜ ତାଙ୍କ ଟୁଇଟ୍ରେ ଲେଖିଛନ୍ତି, ମୁଁ ଏହି ଭାବନାକୁ ଏବେ ବି ଅନୁଭବ କରୁଛି। ଭାରତ ତଥା ବାହାରେ ଆପଣଙ୍କର ସମର୍ଥନ ଏବଂ ଆଶୀର୍ବାଦ ପାଇଁ ଆପଣଙ୍କୁ ବହୁତ ଧନ୍ୟବାଦ, ଯାହା ମୋତେ ଏଠାରେ ପହଞ୍ଚିବାରେ ସାହାଯ୍ୟ କରିଛି । ଏହି ମୁହୂର୍ତ୍ତ ସବୁବେଳେ ମୋ ସହିତ ରହିବ।
ଅଲିମ୍ପିକ୍ସରେ ସଫଳତାର ଏକ ନୂଆ ରେକର୍ଡ ଲେଖିଥିବା ନୀରଜ ତାଙ୍କ ସଫଳତା ୪ ବର୍ଷ ପୂର୍ବରୁ ଘୋଷଣା କରିସାରଥିଲେ। ୨୦୧୭ ମସିହାରେ, ସେ ଏକ ଟୁଇଟ କରିଥିଲେ, ଯେଉଁଥିରେ ସେ ଲେଖିଥିଲେ, ଯେତେବେଳେ ସଫଳତାର ଇଚ୍ଛା ଆପଣଙ୍କୁ ଶୋଇବାକୁ ଦିଏ ନାହିଁ … ଯେତେବେଳେ କଠିନ ପରିଶ୍ରମ ବ୍ୟତୀତ କିଛି ଭଲ ଲାଗେ ନାହିଁ … ଯେତେବେଳେ କ୍ରମାଗତ ଭାବରେ କାମ କରିବା ପରେ କ୍ଲାନ୍ତ ଲାଗି ନ ଥାଏ .. ସେତେବେଳେ ଜାଣନ୍ତୁ ଯେ ଆପଣ ସଫଳତାର ଏକ ନୂତନ ଇତିହାସ ସୃଷ୍ଟି କରିବାକୁ ଯାଉଛନ୍ତି । ନୀରଜ ଏହି ଟୁଇଟକୁ ଆଜି ପର୍ଯ୍ୟନ୍ତ ପିନ୍ କରି ରଖିଛନ୍ତି।
