ପୁରୀ ଅଫିସ, ୭ା୧୦:କରୋନା ମହାମାରୀ ସମୟରେ ପୁରୀର ଯୁବଶିଳ୍ପୀ ନୀଳମଣି ଜେନା ଘରେ ରହି ପେଣ୍ଟିଂ କ୍ଷେତ୍ରରେ ସାଉଣ୍ଟିଛନ୍ତି ଅନେକ ସଫଳତା। ଅନ୍ଲାଇନ ମାଧ୍ୟମରେ କୋଭିଡ୍ ସଚେତନତା ସଂକ୍ରାନ୍ତ ବିଭିନ୍ନ ପ୍ରତିଯୋଗିତାରେ ଭାଗନେଇ ପୁରସ୍କୃତ ହୋଇଛନ୍ତି। କୋଭିଡ୍-୧୯ ପ୍ରଦର୍ଶନୀ ବିଶ୍ୱସ୍ତରୀୟ ପ୍ରତିଯୋଗିତା ପାଇଁ ମଧ୍ୟ ମନୋନୀତ ହୋଇଛନ୍ତି। ଇଣ୍ଟରନ୍ୟାଶନାଲ ଆର୍ଟ ଆଣ୍ଡ ଇମାନିଜେସନ ଫୋରମ ପକ୍ଷରୁ ନଭେମ୍ବର ୭ ଓ ୮ରେ ଏହି ପ୍ରଦର୍ଶନୀ ଅନ୍ଲାଇନ ମାଧ୍ୟମରେ ହେବ। ତେବେ କୋଭିଡ୍ ସମୟରେ ସେ ଯେତେ ସମ୍ମାନ ଓ ପୁରସ୍କାର ପାଇଛନ୍ତି ସେଥିଲାଗି ତାଙ୍କୁ ଇଣ୍ଟରନ୍ୟାଶନାଲ ଆଚିଭମେଣ୍ଟ ଇଣ୍ଡିଆ ଆୱାର୍ଡ ମିଳିଛି। କରୋନା ସମୟରେ ନୀଳମଣି ଅନ୍ଲାଇନ, ୱେବିନାର ଓ ଭର୍ଚୁଆଲ ମାଧ୍ୟମରେ ରାଜ୍ୟ ଏବଂ ରାଜ୍ୟ ବାହାରେ ଅନୁଷ୍ଠିତ ବିଭିନ୍ନ ପ୍ରତିଯୋଗିତାରେ ଭାଗ ନେଇଥିଲେ। ରାଜ୍ୟ ଲଳିତ କଳା ଏକାଡେମୀ ପକ୍ଷରୁ କୋଭିଡ୍-୧୯ ପରିଚାଳନାକୁ ନେଇ କଳାକୃତି ପ୍ରସ୍ତୁତ କରି ପୁରସ୍କାର ପାଇଥିଲେ। ଏହାପରେ ଝାଡ଼ଖଣ୍ଡ କଳାକୃତି ଆର୍ଟ ଆଣ୍ଡ ଫାଉଣ୍ଡେଶନ ପକ୍ଷରୁ ସ୍ବର୍ଣ୍ଣପଦକ ହାସଲ ସହ ପୁନେ ଲଳିତକଳା ପ୍ରବୋଧିନୀ ଦ୍ୱାରା ପୁରସ୍କୃତ ହୋଇଛନ୍ତି। କରୋନା ସମ୍ପର୍କିତ ଏକାଧିକ ପେଣ୍ଟିଂ ପ୍ରତିଯୋଗିତାରେ ସଫଳତା ପାଇଥିବାରୁ ତାଙ୍କୁ ଇଣ୍ଟରନ୍ୟାଶନାଲ ଆଚିଭମେଣ୍ଟ ଇଣ୍ଡିଆ ଆୱାର୍ଡ ମିଳିଥିବା ନୀଳମଣି କହିଛନ୍ତି।
