ଭୁବନେଶ୍ୱର, ୧୦।୨ (ବନ୍ଦନା ସେଠୀ): ବିରଳ ଚିକିତ୍ସା କ୍ଷେତ୍ରରେ ଏମ୍ସ ଭୁବନେଶ୍ୱରକୁ ଆଉଏକ ସଫଳତା ମିଳିଛି। ଏମ୍ସ ଶିଶୁ ବିଭାଗର ଡାକ୍ତରୀ ଟିମ୍ ବିନା ଅସ୍ତ୍ରୋପଚାରରେ ଜଣେ ୯ ବର୍ଷୀୟ ବାଳକଙ୍କ ଫୁସ୍ଫୁସ୍ରୁ ଏକ ଛୁଞ୍ଚତ୍ ବାହାର କରି ତାଙ୍କ ଜୀବନ ବଞ୍ଚାଇଛନ୍ତି। ପ୍ରଥମଥର ବ୍ରୋଙ୍କୋସ୍କୋପିକ୍ ପଦ୍ଧତିରେ ସଫଳତାର ସହ ଏହି ଜଟିଳ ଚିକିତ୍ସା କରାଯାଇଛି।
ଉକ୍ତ ନାବାଳକଙ୍କ ଘର ପଶ୍ଚିମବଙ୍ଗରେ। ସେ ଅସାବଧାନତାବଶତଃ ୪ ସେ.ମି. ଲମ୍ବର ଏକ ସିଲେଇ ମେଶିନ ଛୁଞ୍ଚତ୍ ଗିଳିଦେଇଥିଲେ। ଦୁଇଦିନ ପରେ ଉକ୍ତ ନାବାଳକଙ୍କୁ ପରିବାର ଲୋକେ ଏମ୍ସ ଭୁବନେଶ୍ୱରକୁ ଆଣିଥିଲେ। ଛୁଞ୍ଚତ୍ଟି ତାଙ୍କ ବାମପାର୍ଶ୍ୱ ଫୁସ୍ଫୁସ୍ର ନିମ୍ନଭାଗରେ ଲାଖି ରହିଥିବା ଜଣାପଡ଼ିଥିଲା। ଏ କ୍ଷେତ୍ରରେ ସାଧାରଣତଃ ଅସ୍ତ୍ରୋପଚାର କରାଯାଇଥାଏ। ମାତ୍ର ନାବାଳକର ଗୁରୁତର ସ୍ଥିତି ଦେଖି ଏହାକୁ ବିନା ଅସ୍ତ୍ରୋପଚାରରେ ବାହାର କରିବାକୁ ଡାକ୍ତରମାନେ ନିଷ୍ପତ୍ତି ନେଇଥିଲେ। ଶିଶୁ ବିଶେଷଜ୍ଞ ଡା. ରଶ୍ମିରଞ୍ଜନ ଦାସ, ଡା. କ୍ରୀଷ୍ଣା ଏମ୍ ଗୁଲ୍ଲା, ଡା. କେତନ ଏବଂ ଡା. ରାମକୃଷ୍ଣଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଏହି ବିଶେଷଜ୍ଞ ଦଳ ପ୍ରାୟ ୧ ଘଣ୍ଟା ଧରି ସତର୍କତାର ସହ ବ୍ରୋଙ୍କୋସ୍କୋପିକ୍ ପଦ୍ଧତିରେ ଛୁଞ୍ଚତ୍କୁ ବାହାର କରିବାରେ ସଫଳ ହୋଇଥିଲା। ଏମ୍ସର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡା. ଆଶୁତୋଷ ବିଶ୍ବାସ ଏମ୍ସ ଚିକିତ୍ସକଙ୍କ ଏପରି ଉତ୍ସର୍ଗୀକୃତ ମନୋଭାବକୁ ପ୍ରଶଂସା କରିଛନ୍ତି। ଏମ୍ସ ସର୍ବଦା ଜନସାଧାରଣଙ୍କ ଜୀବନ ରକ୍ଷା ନିମିତ୍ତ ପ୍ରତିବଦ୍ଧ ବୋଲି ଡା. ବିଶ୍ବାସ କହିଛନ୍ତି। ଟିମ୍ର ନେତୃତ୍ୱ ନେଇଥିବା ଶିଶୁ ବିଶେଷଜ୍ଞ ଡା. ରଶ୍ମି ରଞ୍ଜନ ଦାସ କହିଛନ୍ତି, ଏପରି ଜଟିଳ ସ୍ଥିତିରେ ଅସ୍ତ୍ରୋପଚାର କରିବା ନାବାଳକଙ୍କ ଜୀବନ ପ୍ରତି ବିପଦ ସୃଷ୍ଟି କରିଥାଆନ୍ତା। ମାତ୍ର ଅଭିନବ ଉପାୟରେ କରାଯାଇଥିବା ଏହି ପ୍ରକ୍ରିୟା ବେଶ୍ ଲାଭଦାୟୀ ହୋଇପାରିଛି। ୪ଦିନ ପରେ ଉକ୍ତ ନାବାଳକଙ୍କୁ ହସ୍ପିଟାଲରୁ ଡିସ୍ଚାର୍ଜ କରାଯାଇଥିଲା। ବର୍ତ୍ତମାନ ସେ ସୁସ୍ଥ ରହିବା ସହ ସାଧାରଣ ଜୀବନଯାପନ କରୁଥିବା ଡା. ଦାସ ସୂଚନା ଦେଇଛନ୍ତି। ଏମ୍ସ ଭୁବନେଶ୍ୱରରେ ଏକ ଉତ୍ସର୍ଗୀକୃତ ପେଡିଆଟ୍ରିକ ପଲ୍ମୋନୋଲୋଜି ଏବଂ ଆଇସିୟୁ ଦଳ କାର୍ଯ୍ୟ କରୁଛି। ୧ମାସର ଶିଶୁଙ୍କଠାରୁ ୧୫ ବର୍ଷ ବୟସର ଶିଶୁଙ୍କ ପର୍ଯ୍ୟନ୍ତ ଆବଶ୍ୟକ ସମସ୍ତ ଚିକିତ୍ସା ସେବା ମିଳିପାରୁଛି। ବିଶେଷକରି ବ୍ରୋଙ୍କୋସ୍କୋପିକ ପଦ୍ଧତି ମାଧ୍ୟମରେ ଗୋଟିଏ ସ୍ଥାନରେ ସାମଗ୍ରିକ ଶିଶୁ ଚିକିତ୍ସା ସୁବିଧା ରାଜ୍ୟରେ ଅନ୍ୟ କେଉଁଠି ଉପଲବ୍ଧ ନାହିଁ ବୋଲି ଡା. ଏମ୍. ଗୁଲ୍ଲା କହିଛନ୍ତି।
