ନ୍ୟୁୟର୍କ/ନୂଆଦିଲ୍ଲୀ,୨୮ା୫:କରୋନା ମହାମାରୀ ଯୋଗୁ ଭାରତରେ ଘଟୁଥିବା ମୃତ୍ୟୁସଂଖ୍ୟାକୁ ନେଇ ଲଗାତର ପ୍ରଶ୍ନ ଉଠିବାରେ ଲାଗିଛି। ସରକାର ବତାଉଥିବା ସଂଖ୍ୟାକୁ ଭୁଲ୍ ବୋଲି କୁହାଯାଉଛି। ଶ୍ମଶାନ ଘାଟ ଓ ନଦୀକୂଳର ଚିତ୍ର ଦେଖିଲେ ସରକାରଙ୍କ ଡାଟା ତ୍ରୁଟିଯୁକ୍ତ ମନେହେଉଛି। ଏଭଳି ସମୟରେ ଆମେରିକାର ‘ନ୍ୟୁୟର୍କ ଟାଇମ୍ସ’ କରୋନା ମୃତ୍ୟୁକୁ ନେଇ ସରକାରୀ ତଥ୍ୟକୁ ଭୁଲ୍ ବୋଲି ଦର୍ଶାଇବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାରିବାପଣିଆ ଉପରେ ଅନ୍ଲାଇନ୍ରେ ପ୍ରଶ୍ନ ଉଠିଛି।
ଭାରତ ସରକାରଙ୍କ ଆକଳନ କହୁଛି ଯେ, ଦେଶରେ ପ୍ରାୟ ୩.୭ ଲକ୍ଷ ଲୋକ କରୋନାରେ ପ୍ରାଣ ହରାଇଛନ୍ତି। କିନ୍ତୁ ବାସ୍ତବରେ ମହାମାରୀରେ ୪୨ ଲକ୍ଷରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଥିବା ନ୍ୟୁୟର୍କ ଟାଇମ୍ସ ଦାବି କରିଛି। ଆମେରିକାର ଏହି ପ୍ରତିଷ୍ଠିତ ଖବରକାଗଜରେ ମେ’ ୨୫ରେ ପ୍ରକାଶିତ ‘ଜଷ୍ଟ ହାଓ ବିଗ୍ କୁଡ୍ ଇଣ୍ଡିଆଜ୍ ଟ୍ରୁ କୋଭିଡ୍ ଟୋଲ୍ ବି?’ ଶୀର୍ଷକ ରିପୋର୍ଟ ଅନୁସାରେ କେନ୍ଦ୍ର ସରକାର ମିଛ କହୁଛନ୍ତି। ସରକାରୀ ରିପୋର୍ଟ ତୁଳନାରେ ପ୍ରକୃତ ମୃତ୍ୟୁସଂଖ୍ୟା ୧୪ ଗୁଣ ଅଧିକ ଅର୍ଥାତ୍ ୪୨ ଲକ୍ଷ ଲୋକ କୋଭିଡ୍-୧୯ରେ ସଂକ୍ରମିତ ହୋଇ ପ୍ରାଣ ହରାଇଲେଣି। ତିନୋଟି ନ୍ୟାଶନାଲ ସେରୋ ସର୍ଭେର ଅଧ୍ୟୟନ ଏବଂ ଅନେକ ବିଶେଷଜ୍ଞଙ୍କ ରାୟ ଉପରେ ଏହି ରିପୋର୍ଟ ପ୍ରସ୍ତୁତ କରାଯାଇଥିବା ନ୍ୟୁୟର୍କ ଟାଇମ୍ସ ପକ୍ଷରୁ କୁହାଯାଇଛି। ଖବରକାଗଜ ରିପୋର୍ଟରେ ଆହୁରି ଦର୍ଶାଯାଇଛି ଯେ, ଭାରତରେ ଠିକ୍ ଭାବେ ଟେଷ୍ଟିଂ କରାଯାଉ ନାହିଁ କି ରୋଗୀଙ୍କ ମୃତ୍ୟୁର ରେକର୍ଡ ମଧ୍ୟ ଉପଯୁକ୍ତ ରୂପେ କରାଯାଉ ନାହିଁ। ଏମିତିରେ ପ୍ରକୃତ ମୃତ୍ୟୁସଂଖ୍ୟା ଆକଳନ କରିବା କଷ୍ଟକର। ହସ୍ପିଟାଲଗୁଡ଼ିକ ଭର୍ତ୍ତି ହୋଇଯାଇଥିବାବେଳେ ଶ୍ମଶାନରେ ଚିତା ଲିଭୁନାହିଁ। ଏପରି କି ବହୁ ସଂଖ୍ୟକ କରୋନା ରୋଗୀ ନିଜ ଘରେ ଆଖି ବୁଜି ଦେଉଛନ୍ତି। ଗାଁଗୁଡ଼ିକରେ ହେଉଥିବା ମୃତ୍ୟୁକୁ ମଧ୍ୟ ସରକାରୀ ରିପୋର୍ଟରେ ସାମିଲ କରାଯାଉ ନାହିଁ। ଭାରତରେ ସ୍ବାଭାବିକ ଦିନଗୁଡ଼ିକରେ ମଧ୍ୟ ପ୍ରତି ୫ ମୃତ୍ୟୁ ମଧ୍ୟରୁ ୪ଟିର ତଦନ୍ତ କରାଯାଇ ନ ଥାଏ। ନ୍ୟୁୟର୍କ ଟାଇମ୍ସର କହିବା ହେଲା ଅଧା ଭାରତ କରୋନା କବଳରେ ରହିଥିବା ସାମ୍ପ୍ରତିକ ସ୍ଥିତିରେ ଅଧ୍ୟୟନରୁ ଜଣାପଡ଼ିଛି। କିନ୍ତୁ ସରକାର ଅସଲ ତଥ୍ୟରୁ ମୁହଁ ଫେରାଇ ନେଉଛନ୍ତି। ଏଥିଯୋଗୁ ସ୍ଥିତି ଆହୁରି ବିଗିଡ଼ିବାରେ ଲାଗିଛି। ଗତବର୍ଷ ମେ’ ୧୧ରୁ ଜୁନ୍ ୪ ମଧ୍ୟରେ ପ୍ରଥମ ସେରୋ ସର୍ଭେ କରାଯାଇଥିଲା। ଭାରତରେ ସେତେବେଳେ ୬୪.୬୦ ଲକ୍ଷ ଲୋକଙ୍କଠାରେ ଆଣ୍ଟିବଡି ବିକଶିତ ହୋଇଥିଲା। ଦ୍ୱିତୀୟ ସର୍ଭେ ଅଗଷ୍ଟ ୧୮ରୁ ଡିସେମ୍ବର ୨୦ ମଧ୍ୟରେ କରାଯାଇଥିବାବେଳେ ତୃତୀୟ ସର୍ବେକ୍ଷଣ ଡିସେମ୍ବର ୧୮ରୁ ଜାନୁୟାରୀ ୬ ମଧ୍ୟରେ କରାଯାଇଥିଲା।
