ବାଲେଶ୍ୱର ଅଫିସ, ୨।୧୦: ବାଲେଶ୍ୱର ସହର ଉପକଣ୍ଠ କୁରୁଡ଼ା ନିକଟରେ ଥିବା ଶ୍ରୀ ପିତାମ୍ବରା ସିଦ୍ଧ ମହାଶକ୍ତି ପୀଠରେ ଶାରଦୀୟ ଦୁର୍ଗୋତ୍ସବ ଅବସରରେ ମା’ ବଗଳାମୁଖୀଙ୍କ ପୂଜାର୍ଚ୍ଚନା ଚାଲିଛି। ଶତ୍ରୁର ସଂହାର ପାଇଁ ଧରାପୃଷ୍ଠକୁ ଓହ୍ଲାଇ ଆସିବେ ଦୁର୍ଗତିନାଶିନୀ। ମା’ଙ୍କ ଆବାହନ ନେଇ ସଜେଇ ହେଲାଣି ପୂଜାମଣ୍ଡପ। ମା’ଙ୍କ ଷୋଡ଼ଶ ଉପଚାର ପୂଜା ୯ଟି ବେଶ ଦର୍ଶନ କରିବା ପାଇଁ ଭକ୍ତଙ୍କ ସୁଅ ଛୁଟିଛି।
ବଗଳାମୁଖୀଙ୍କ ପୀଠର ଅନେକ ମହାତ୍ମ୍ୟ ରହିଛି। ଯେକେହି ବି ଏଠାକୁ ଆସିଲେ ଖାଲି ହାତରେ ଫେରନ୍ତି ନାହିଁ ବୋଲି ବିଶ୍ୱାସ ରହିଛି। ଶ୍ରୀ ପିତାମ୍ବରା ସିଦ୍ଧ ମହାଶକ୍ତି ପୀଠରେ ମୁଖ୍ୟ ଦେବତା ହେଲେ ମା’ ବଗଳାମୁଖୀ। ଦଶ ମହାବିଦ୍ୟା ମଧ୍ୟରୁ ମା’ ବଗଳାମୁଖୀ ହେଉଛନ୍ତି ଅଷ୍ଟମ ମହାବିଦ୍ୟା। ଗର୍ଭଗୃହରେ ମା’ଙ୍କ ଚାରିପାଖରେ ଦଶ ମହାବିଦ୍ୟା ବିରାଜିତ। ମା’ଙ୍କ ଗଣପତି ହେଉଛନ୍ତି ହରିଦ୍ରା ଗଣେଶ ଏବଂ ରୁଦ୍ର ହେଉଛନ୍ତି ମହାମୃତ୍ୟୁଞ୍ଜୟ ବାବା, ମା’ଙ୍କ ଆଗରେ ବିରାଜମାନ କରିଛନ୍ତି। ସେହିପରି ମା’ଙ୍କ ପୀଠର ଚତୁଃପାର୍ଶ୍ୱରେ ବଟୁକ, ଭୈରବ, କ୍ଷେତ୍ରପାଳ ଯୋଗିନୀ ଆଦି ଦେବାଦେବୀ ରହିଛନ୍ତି। ମା’ଙ୍କ ସମସ୍ତ ଶକ୍ତି ପୂଜା ରୀତିନୀତିରେ ଅନୁଷ୍ଠିତ ହୋଇଥାଏ। ତେବେ ଏହି ପୀଠରେ ଏକ ନିଆରା ପରମ୍ପରା ରହିଛି। ବର୍ଷକରେ ମା’ଙ୍କ ପାଖରେ ୪ ଥର ନବରାତ୍ର ପୂଜା କରାଯାଏ। ଦୁଇଟି ଗୁପ୍ତ ନବରାତ୍ର ପୂଜା ଥିବା ବେଳେ ଅନ୍ୟ ଦୁଇଟି ବାସନ୍ତୀକ ନବରାତ୍ର ଓ ଶାରଦୀୟ ନବରାତ୍ର ପୂଜା ହୋଇଥାଏ। ମାଘ ଓ ଆଷାଢ଼ ମାସରେ ପଡୁଥିବା ଦୁଇଟି ନବରାତ୍ରକୁ ଗୁପ୍ତ ନବରାତ୍ର ଭାବେ ପାଳନ କରାଯାଇଥାଏ। ସେହିପରି ଶାରଦୀୟ ଓ ବାସନ୍ତୀକ ନବରାତ୍ରରେ ମା’ଙ୍କ ଷୋଳପୂଜା ମୂଳାଷ୍ଟମୀରୁ ଆରମ୍ଭ ହୋଇଥାଏ।
ଏନେଇ ପୀଠ ଆଚାର୍ଯ୍ୟ ଆଦିତ୍ୟ ନାରାୟଣ ମିଶ୍ର କହନ୍ତି, ‘ମୂଳାଷ୍ଟମୀ ପାଖରୁ ବଗଳାମୁଖୀଙ୍କ ପ୍ରତିଦିନ ଅଭିଷେକ, ଯନ୍ତ୍ରପୂଜା ଓ ଉପଚାର ହୋଇଥାଏ। ନବରାତ୍ର ପାଖରୁ ନବପତ୍ରିକା ଘଟ ସ୍ଥାପନ କରାଯାଇ ନବଦୁର୍ଗାଙ୍କ ପୂଜାର୍ଚ୍ଚନା କରାଯାଇଥାଏ। ପ୍ରତିଦିନ ଚଣ୍ଡୀ, ଉପଚାର, ହୋମ, ଯନ୍ତ୍ରପୂଜା ଆଦି କରାଯାଇଥାଏ।’ ମହାସପ୍ତମୀଠାରୁ ଦଶମୀ ପର୍ଯ୍ୟନ୍ତ ପୀଠରେ ମା’ଙ୍କ ସ୍ବତନ୍ତ୍ର ପୂଜାର୍ଚ୍ଚନା କରାଯାଇଥାଏ। ମହାସପ୍ତମୀଠାରୁ ଦଶମୀ ଯାଏ ମା’ଙ୍କ ବିଭିନ୍ନ ବେଶ ହୋଇଥାଏ। ନୀଳ ସରସ୍ବତୀ ବେଶ, ମହାଲକ୍ଷ୍ମୀ ବେଶ ଓ ବଗଳାମୁଖୀ ବେଶରେ ଦର୍ଶନ ଦିଅନ୍ତି। ଅଷ୍ଟମୀ ପୂଜା ସରିବା ପରେ ମା’ ବଗଳାମୁଖୀଙ୍କର ଆହୁତି ଯଜ୍ଞମଣ୍ଡପରେ ହୋଇଥାଏ। ସେହିଠାରେ ସ୍ବତନ୍ତ୍ର ଆହୂତି ଦିଆଯାଇଥାଏ। ନବମୀ ଦିନ ପରମ୍ପରା ଅନୁଯାୟୀ ଭକ୍ତମାନେ ଗୁରୁପୂଜା କରିଥାନ୍ତି। ସନ୍ଧ୍ୟାରେ ପୁଣି ମା’ ଯଜ୍ଞମଣ୍ଡପକୁ ଯାଇଥାନ୍ତି ଓ ଆହୂତି ପ୍ରଦାନ କରାଯାଇଥାଏ। ଦଶହରା ଦିନ ଅପରାଜିତା ବେଶରେ ଦର୍ଶନ ଦିଅନ୍ତି ବଗଳାମୁଖୀ। ଏହିଦିନ ମା’ଙ୍କ ପୂଜାର୍ଚ୍ଚନା ଶେଷ ହୋଇଥାଏ। ମା’ଙ୍କ ବାର୍ଷିକ ଉତ୍ସବରେ ୧୦୦୮ ପ୍ରକାର ଭୋଗ ଲାଗି ହୋଇଥାଏ। ବଗଳାମୁଖୀଙ୍କ ଷୋଡ଼ଶ ଉପଚାର ପୂଜାରେ ଭକ୍ତଙ୍କ ସୁଅ ଛୁଟେ। କୁହାଯାଏ ମା’ଙ୍କ ମହିମା ପାଇ ଭକ୍ତ ସବୁ ବିପଦରୁ ମୁକ୍ତି ପାଇଥାଏ। ଦୀର୍ଘ ଦୁଇବର୍ଷ ପରେ ପୁଣି ଭକ୍ତ ଓ ମା’ ଏକାଠି ହୋଇଛନ୍ତି।
