ନୂଆଦିଲ୍ଲୀ,୩୦।୮: ପଡୋଶୀ ଦେଶ ପାକିସ୍ତାନ ଉପରେ ବର୍ଷିଛନ୍ତି ଜମ୍ମୁ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାଶନାଲ କନଫରେନସର ନେତା ଫାରୁକ ଅବଦୁଲ୍ଲା। ସେ କହିଛନ୍ତି ସେମାନେ କାହାର ହାତରେ ଚାଲୁଥିବା କଣ୍ଢେଇ ନୁହେଁଁ। ପାକିସ୍ତାନ ସବୁବେଳେ ଜମ୍ମୁ କଶ୍ମୀରର ରାଜନୀତିକ ଦଳମାନଙ୍କୁ ସର୍ବଦା ଅପମାନିତ କରିଛି କିନ୍ତୁ ବର୍ତ୍ତମାନ ହଠାତ୍ ସେମାନେ ଆମକୁ ପସନ୍ଦ କରୁଛନ୍ତି। କଶ୍ମୀରକୁ ଆତଙ୍କବାଦ ନପଠାଇବାକୁ ନେଇ ମୁଁ ପାକିସ୍ତାନକୁ ଅନୁରୋଧ କରୁଛି। ଜମ୍ମୁ କଶ୍ମୀରରେ ହେଉଥିବା ରକ୍ତପାତ ଶେଷ ହେବା ଦରକାର। ଜମ୍ମୁ କଶ୍ମୀରରେ ଶାନ୍ତିପୂର୍ଣ୍ଣ ଲଢ଼େଇ ପାଇଁ ସମସ୍ତ ଦଳ ପ୍ରତିଶ୍ରୁତିବଦ୍ଧ ବୋଲି ଅବଦୁଲ୍ଲା କହିଛନ୍ତି। ଜମ୍ମୁ କଶ୍ମୀରରୁ ଧାରା ୩୭୦ ଉଚ୍ଛେଦକୁ ବିରୋଧ କରି ଜମ୍ମୁ କଶ୍ମୀରରେ ନ୍ୟାଶନାଲ କନଫରେନସ, ପିଡିପି, କଂଗ୍ରେସ ସମେତ ମୋଟ ୬ଟି ଦଳ ଏକାଠି ହୋଇଛନ୍ତି। ଏହି ୬ ଦଳର ନିଷ୍ପତ୍ତିକୁ ପ୍ରଶଂସା କରିଛନ୍ତି ପାକିସ୍ତାନର ବୈଦେଶିକ ମନ୍ତ୍ରୀ ମହମୁଦ କୁରେଶୀ। ପାକିସ୍ତାନର ଏହି ପ୍ରଶଂସା ପରେ ଅବଦୁଲ୍ଲା ତାଙ୍କୁ କଡା ଜବାବ ଦେଇଛନ୍ତି।
