ନନ୍ଦପୁର,୨୭ା୨(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ୍ ବାଲଡ଼ା ପଞ୍ଚାୟତ ସରପଞ୍ଚ ବିକ୍ରମ ସୀସାଙ୍କ ବିରୋଧରେ ଆଗତ ଅନାସ୍ଥା ପ୍ରସ୍ତାବ ସମ୍ପର୍କିତ ବୈଠକ ଶୀଘ୍ର କରିବାକୁ ଓ୍ବାର୍ଡସଭ୍ୟମାନେ ଜିଲାପାଳ ମନୋଜ ସତ୍ୟବାନ ମହାଜନଙ୍କୁ ଦାବିପତ୍ର ଶୁକ୍ରବାର ପ୍ରଦାନ କରିଛନ୍ତି। ଜିଲାପାଳ ବାଲଡ଼ା ପଞ୍ଚାୟତ ଖଡାପୁଟସ୍ଥିତ କଫି ପ୍ରୋସେଶିଂ ୟୁନିଟ ପରିଦର୍ଶନ କରୁଥିବା ବେଳେ ୱାର୍ଡସଭ୍ୟମାନେ ଭେଟିଥିଲେ। ୧୫ା୧୦ା୨୦୨୫ରେ ୧୧ ୱାର୍ଡ ବିଶିଷ୍ଟ ବାଲଡ଼ା ପଞ୍ଚାୟତର ୮ ୱାର୍ଡ ସଭ୍ୟ ସରପଞ୍ଚଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିଥିଲେ। ଦୁଇ ଦୁଇ ଥର ୱାର୍ଡ ସଭ୍ୟମାନଙ୍କ ଦସ୍ତଖତ ଯାଞ୍ଚ ହୋଇଥିଲା। ଅନାସ୍ଥା ପ୍ରସ୍ତାବ ପାଇଁ ଆବଶ୍ୟକ ଭୋଟ ଗ୍ରହଣ ବୈଠକ ପାଇଁ ୨୭ା୨ା୨୦୨୬ଦିନ ନିର୍ଦ୍ଧାରିତ ହୋଇଥିଲା। କିନ୍ତୁ ପଞ୍ଚାୟତରେ ଆଇନ ଶୃଙ୍ଖଳା ପରିସ୍ଥିତି ଜଟିଳ ଦର୍ଶାଇ କୋରାପୁଟ ଉପଜିଲାପାଳ ତା.୨୫ା୨ା୨୦୨୬ରେ ବୈଠକକୁ ସ୍ଥଗିତ ରଖିବାକୁ ନିର୍ଦ୍ଦେଶନାମା ଜାରି କରିଥିଲେ। ଏହା ପଞ୍ଚାୟତିରାଜ ଧାରା ଓ ନିୟମ ବିରୋଧୀ ବୋଲି ଦାବିପତ୍ରରେ ଉଲ୍ଲେଖ କରାଯାଇଛି। ସପ୍ତାହକ ମଧ୍ୟରେ ଅନାସ୍ଥା ବୈଠକ କରିବାକୁ ଅନୁରୋଧ କରାଯାଇଛି। ନଚେତ୍ ସମସ୍ତ ୱାର୍ଡସଭ୍ୟ ମିଶି ପଞ୍ଚାୟତ କାର୍ଯ୍ୟାଳୟରେ ତାଲା ପକାଇବୁ ବୋଲି ଚେତାବନୀ ଦେଇଛନ୍ତି। ଅଭିଯୋଗ ଶୁଣି ଶୀଘ୍ର ଅନାସ୍ଥା ବୈଠକ କରାଯିବ ବୋଲି ଜିଲାପାଳ ପ୍ରତିଶ୍ରୁତି ଦେଇଛନ୍ତି। ଏହି ସମୟରେ ୱାର୍ଡସଭ୍ୟ ବଇଦେହି ଖିଲ, ପାର୍ବତୀ ଆର୍ଲାବ, ରାମା ସୀସା, ଆଦୁ ଖିଲ, ଚକ୍ରଧର ଖରା, ମୁନା ଜାନମ ଓ ରୁକ୍ମଣୀ ହନ୍ତାଳ ପ୍ରମୁଖ ଉପସ୍ଥିତ ଥିଲେ।
