ଭୁବନେଶ୍ୱର,୭।୧୧ (ବ୍ୟୁରୋ):‘ମୋ ବସ୍’ ସେବା ଯୋଗାଉଥିବା କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ଆଉଏକ ସଫଳତାର ପାହାଚ ଚଢିବା ସହିତ ପୁଣି ଜାତୀୟ ପୁରସ୍କାର ହାତେଇଛି। ସର୍ବୋତ୍ତମ ନଗର ପରିବହନ ପ୍ରକଳ୍ପ କାର୍ଯ୍ୟକାରୀ କରିବା କ୍ଷେତ୍ରରେ କ୍ରୁଟ୍ ଚତୁର୍ଥଥର ପାଇଁ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ବର୍ଗରେ ଜାତୀୟ ଉତ୍କର୍ଷ ପୁରସ୍କାର ମିଳିଛି। ଭାରତ ସରକାରଙ୍କ ଗୃହ ଓ ନଗର ବ୍ୟାପାର ମନ୍ତ୍ରଣାଳୟ ଦ୍ୱାରା କେରଳର କୋଚିଠାରେ ଆୟୋଜିତ ୧୫ତମ ଅର୍ବାନ ମୋବିଲିଟି ଇଣ୍ଡିଆନ୍ କନ୍ଫରେନ୍ସ ଆଣ୍ଡ୍ ଏକ୍ସପୋ-୨୦୨୨ରେ କ୍ରୁଟ୍ ମହାପ୍ରବନ୍ଧକ ଦିପ୍ତି ମହାପାତ୍ର ଏହି ପୁରସ୍କାର ଗ୍ରହଣ କରିଥିଲେ।
ପ୍ରତ୍ୟେକ ପଦକ୍ଷେପରେ ‘ଦି ୱେ ୱି ମୁଭ୍’ (ଆମେ ଯେଉଁ ଭାବରେ ଗତି କରୁ)କୁ ପୁନଃ ବ୍ୟାଖ୍ୟା କରି କ୍ରୁଟ୍ ଏହାର ସମସ୍ତ ଯାତ୍ରୀଙ୍କୁ ‘ରାଇଡ୍ ୱିଥ୍ ପ୍ରାଇଡ୍ ବା ଗର୍ବର ସହିତ ଯାତ୍ରା’କୁ ନିଶ୍ଚିତ କରି ଦେଶର ଗଣପରିବହନ ସେବା ପ୍ରଦାନକାରୀଙ୍କ ପାଇଁ ଏକ ମାନଦଣ୍ଡ ସ୍ଥିର କରିବାରେ ସଫଳ ହୋଇଛି। ଏନେଇ ଦିପ୍ତି କହିଛନ୍ତି, ଏହା ଅତ୍ୟନ୍ତ ସମ୍ମାନଜନକ ପୁରସ୍କାର। ଚଳିତବର୍ଷ ପୁନର୍ବାର ଏହି ପୁରସ୍କାର ମିଳିବା ଆଗକୁ କାର୍ଯ୍ୟ କରିବା ପାଇଁ ପ୍ରେରଣା ଦେଇଛି। ମୋ ଇ-ରାଇଡ୍ ଏବଂ ଇ-ବସ୍ ଯାତ୍ରୀଙ୍କ ଦ୍ୱାରା ପ୍ରଶଂସିତ ହୋଇଛି। ଏହି ଜାତୀୟ ପୁରସ୍କାର ରାଜ୍ୟ ତଥା ଆମ ଯାତ୍ରୀଙ୍କ ପାଇଁ ଉତ୍ସର୍ଗୀକୃତ ବୋଲି ସେ ମତ ଦେଇଛନ୍ତି। ସେହିପରି କ୍ରୁଟ୍ ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ କହିଛନ୍ତି, କ୍ରୁଟ ପାଇଁ ପୁନର୍ବାର ଏଭଳି ସମ୍ମାନଜନକ ପୁରସ୍କାର ପାଇବା ଅତ୍ୟନ୍ତ ଗର୍ବର ବିଷୟ। ଜନସାଧାରଣଙ୍କ ଗମନାଗମନ ସେବାକୁ ଉତ୍କୃଷ୍ଟ କରିବା ତଥା ରାଜ୍ୟ ପାଇଁ ଆହୁରି ଗୌରବ ଆଣିବା ପାଇଁ ଆମେ କ୍ରମାଗତ ଭାବେ ଉଦ୍ୟମ କରୁଛୁ।
