ଭୁବନେଶ୍ୱର,୫ା୧୨: ବନ୍ୟଜୀବ ପ୍ରେମୀ ଏବଂ ପର୍ଯ୍ୟଟକଙ୍କ ପାଇଁ ଖୁସି ଖବର। ଭୁବନେଶ୍ୱରସ୍ଥିତ ନନ୍ଦନକାନନ ପ୍ରାଣୀ ଉଦ୍ୟାନ ପ୍ରଥମ ଥର ପାଇଁ ଆଫ୍ରିକୀୟ ଚିତାଆଣିବାକୁ ପ୍ରସ୍ତୁତି ଚଳାଇଛି। ଏହି ବିରଳ ଓ ଦ୍ରୁତଗାମୀ ପ୍ରାଣୀଙ୍କ ଆଗମନ ନନ୍ଦନକାନନ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହେବ ଏବଂ ଏହା ପର୍ଯ୍ୟଟକଙ୍କ ଆକର୍ଷଣକୁ ବହୁଗୁଣିତ କରିବ ବୋଲି ଆଶା କରାଯାଉଛି।
କେନ୍ଦ୍ରୀୟ ଚିଡିଆଖାନା କର୍ତ୍ତୃପକ୍ଷ ନନ୍ଦନକାନନରେ ଚିତା ରଖିବା ପାଇଁ ଅନୁମତି ପ୍ରଦାନ କରିସାରିଛନ୍ତି। ବର୍ତ୍ତମାନ ନନ୍ଦନକାନନରେ କୌଣସି ଚିତା ନାହାନ୍ତି। ଚିତାମାନଙ୍କ ପାଇଁ ସ୍ୱତନ୍ତ୍ର ଖୁଆଡ଼ ଏବଂ ବାସସ୍ଥାନ ପ୍ରସ୍ତୁତି କାର୍ଯ୍ୟ ଜୋରସୋରରେ ଚାଲିଛି।
ପର୍ଯ୍ୟଟକମାନେ ସୁରକ୍ଷିତ ତଥା ନିକଟରୁ ଚିତାଙ୍କୁ ଦେଖିବା ପାଇଁ ଏକ ସ୍ୱତନ୍ତ୍ର ଭିଉଇଂ ଗ୍ୟାଲେରୀ ନିର୍ମାଣ କରାଯାଉଛି। ଉତ୍ତମ ଦୃଶ୍ୟମାନତା ନିଶ୍ଚିତ କରିବା ପାଇଁ ଥାଇଲାଣ୍ଡରୁ ଉଚ୍ଚ-ଗୁଣବତ୍ତା ବିଶିଷ୍ଟ କାଚ ପ୍ୟାନେଲ୍ ଆମଦାନୀ କରାଯିବାର ଯୋଜନା ରହିଛି। ନୂତନ ବାସସ୍ଥାନରେ ତୃଣଭୋଜୀ ପ୍ରାଣୀଙ୍କୁ ରଖାଯିବ, ଯାହା ଚିତାମାନଙ୍କୁ ସେମାନଙ୍କର ପ୍ରାକୃତିକ ଶିକାର ପ୍ରବୃତ୍ତି ପ୍ରଦର୍ଶନ କରିବାକୁ ଉତ୍ସାହିତ କରିବ।
ଘଣ୍ଟା ପ୍ରତି ୧୨୦ କିଲୋମିଟର ପର୍ଯ୍ୟନ୍ତ ଦୌଡ଼ିବାର କ୍ଷମତା ଥିବା ଏହି ପୃଥିବୀର ଦ୍ରୁତତମ ପ୍ରାଣୀମାନେ ନନ୍ଦନକାନନର ସବୁଠାରୁ ବଡ଼ ଆକର୍ଷଣ ହେବେ ବୋଲି ଆଶା କରାଯାଉଛି।
