ବେଙ୍ଗାଲୁରୁ,୨୮।୨ : କର୍ନାଟକରେ ରାଜ୍ୟ ପୋଲିସ ବିଭାଗ ଦୁଇ ମାସ ମଧ୍ୟରେ ୭ ହଜାରରୁ ଅଧିକ ଅପରାଧୀଙ୍କ ନାମକୁ ତାଲିକାରୁ ହଟାଇ ଦେଇଛି। ଏନେଇ ଶାସକ-ବିରୋଧୀ ମୁହାଁମୁହିଁ ହୋଇଛନ୍ତି। କଂଗ୍ରେସ ଅଭିଯୋଗ କରିଛି ଯେ ରାଜ୍ୟର ଭାଜପା ସରକାର ଏହା ଜାଣିଶୁଣି କରିଛନ୍ତି, ଯାହା ଦ୍ୱାରା ଆଗାମୀ ବିଧାନସଭା ନିର୍ବାଚନରେ ଅପରାଧ ସହିତ ସମ୍ପୃକ୍ତ ଥିବା ଲୋକଙ୍କୁ ବ୍ୟବହାର କରାଯାଇପାରିବ। ବିଧାନସଭାରେ କଂଗ୍ରେସ ପକ୍ଷରୁ ଏକ ପ୍ରଶ୍ନ ଉଠିଥିଲା ଯେ ପୋଲିସ ଏହାର ତାଲିକାରୁ ବହୁ ସଂଖ୍ୟକ ଅପରାଧୀଙ୍କ ନାମ ହଟାଇଛି। ଦଳ ଅଭିଯୋଗ କରିଛି ଯେ ଚଳିତ ବର୍ଷ ପ୍ରଥମ ଦୁଇ ମାସରେ ପୋଲିସ ୭ ହଜାର ୩୩୬ ଜଣଙ୍କ ନାମ ହଟାଇ ଦେଇଛି। ଏଭଳି ଲୋକେ ସମାଜ ତଥା ଆଇନ ଶୃଙ୍ଖଳା ପାଇଁ ଭଲ ନୁହନ୍ତି। କଂଗ୍ରେସ ଅନୁଯାୟୀ, ଆସନ୍ତା ବିଧାନସଭା ନିର୍ବାଚନରେ ଭାଜପା ଏହି ସାମାଜିକ ବିରୋଧୀ ବ୍ୟକ୍ତି ବିଶେଷଙ୍କୁ ଟିକଟ ଦେବା ସହିତ ଅନ୍ୟ କାର୍ଯ୍ୟରେ ବ୍ୟବହାର କରିବ।
କଂଗ୍ରେସ ବିଧାୟକ ତଥା ପୂର୍ବତନ ଗୃହମନ୍ତ୍ରୀ ରାମଲିଙ୍ଗା ରେଡ୍ଡୀ କହିଛନ୍ତି ଯେ ଦୁଇ ମାସ ମଧ୍ୟରେ ୭ ହଜାରରୁ ଅଧିକ ଲୋକଙ୍କ ନାମ ଅପରାଧ ତାଲିକାରୁ ହଟାଯାଇଥିବାବେଳେ ୪ ବର୍ଷ ମଧ୍ୟରେ ପ୍ରାୟ ୨୦ ହଜାର ଅପରାଧୀଙ୍କ ନାମ ଜାଣିଶୁଣି ହଟାଯାଇଛି।. ବିଧାନସଭା ନିର୍ବାଚନରେ ଏହି ଲୋକମାନଙ୍କୁ ବ୍ୟବହାର କରିବା ଭାଜପାର ଯୋଜନା ଅତ୍ୟନ୍ତ ଦୁର୍ଭାଗ୍ୟଜନକ।
ରାଜ୍ୟ ଗୃହ ମନ୍ତ୍ରଣାଳୟ ଅନୁଯାୟୀ, ୨୦୧୮ ପରଠାରୁ ପ୍ରାୟ ୨୬,୫୦୦ ଜଣଙ୍କ ନାମ ଅପରାଧ ତାଲିକାରୁ ହଟାଇ ଦିଆଯାଇଛି। ଗତ ବର୍ଷ ୩,୩୨୪ ଜଣଙ୍କ ନାମ ହଟାଯାଇଥିଲା। ବର୍ତ୍ତମାନ ସୁଦ୍ଧା ରାଜ୍ୟରେ ଅପରାଧ ତାଲିକାରେ ୪୬ ହଜାର ଲୋକଙ୍କ ନାମ ରହିଛି।
