ନୂଆଦିଲ୍ଲୀ,୧୫।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ବିହାରର ଜାମୁଇ ଗସ୍ତ କରିଥିଲେ। ଯେଉଁଠାରେ ସେ ଜନଜାତି ଗୌରବ ଦିବସ ଅବସରରେ ଆଦିବାସୀ ସମାଜର ଭଗବାନ କୁହାଯାଉଥିବା ବିର୍ସା ମୁଣ୍ଡାଙ୍କ ୧୫୦ତମ ଜୟନ୍ତୀରେ ଯୋଗ ଦେଇଥିଲେ। ଏଥିସହ ସେ ସ୍ମାରକ ମୁଦ୍ରା ସହ ଏକ ଡାକ ଟିକଟ ପ୍ରଚଳନ କରିଥିଲେ। ପାଖାପାଖି ୬୬୪୦ କୋଟି ଟଙ୍କାର ବିଭିନ୍ନ ଯୋଜନାର ମଧ୍ୟ ସେଠାରେ ଶିଳାନ୍ୟାସ କରିଥିଲେ। ତେବେ ଏଠାରେ ପ୍ରଶ୍ନ ଉଠୁଛି ଯେ, ଝାଡଖଣ୍ଡରେ ନିର୍ବାଚନ ଥିବାବେଳେ ମୋଦି ବିହାରରେ କିପରି ଏତେକୋଟି ଟଙ୍କାର ଶିଳାନ୍ୟାସ କରିଛନ୍ତି। ଏନେଇ ରାଜନୈତିକ ମହଲରେ ମଧ୍ୟ ବିଭିନ୍ନ ଚର୍ଚ୍ଚା ଲାଗି ରହିଛି। କୁହାଯାଉଛି କି, ମୋଦିଙ୍କ ଗସ୍ତକୁ ନେଇ ଭାଜପା ଫାଇଦା ଉଠାଇବାକୁ ଚାହୁଁଛି। ବିହାରର ଏହି କାର୍ଯ୍ୟକ୍ରମ ପରେ ପଡୋଶୀ ରାଜ୍ୟ ଝାଡଖଣ୍ଡରେ ଏହି ପ୍ରଭାବ କିପରି ପଡିବ ଏନେଇ ଦଳ ମାଷ୍ଟରପ୍ଲାନ ପ୍ରସ୍ତୁତ କରୁଛି।
ଝାଡ଼ଖଣ୍ଡ ବିଧାନସଭା ନିର୍ବାଚନରେ ଆଦିବାସୀଙ୍କ ହାତରେ କ୍ଷମତାର ଚାବି ରହିଛି । ତେବେ ଏହି ନିର୍ବାଚନ ମାହୋଲରେ ଜନଜାତି ଗୌରବ ଦିବସ ଅବସରରେ ଆଦିବାସୀ ଭୋଟ ଟାଣିବାକୁ ଭାଜପା ଭରପୂର ଉଦ୍ୟମ କରୁଛି। ପୂର୍ବରୁ ଦେଖାଯାଇଛି କି, ମଧ୍ୟପ୍ରଦେଶ, ଛତିଶଗଡ଼ ଓ ରାଜସ୍ଥାନ ବିଧାନସଭା ନିର୍ବାଚନବେଳେ ସମାନ ଫମୂର୍ଲା ଆପଣାଇଥିଲେ ମୋଦି। ବିର୍ସା ମୁଣ୍ଡାଙ୍କ ଜୟନ୍ତୀରେ ଉଲିହାତୁରେ ପହଞ୍ଚିଥିଲେ । ସେତେବେଳେ ମୋଦିଙ୍କ ଗସ୍ତ ଭାଜପା ପାଇଁ ବୁଷ୍ଟରଡୋଜ ସାବ୍ୟସ୍ତ ହୋଇଥିଲା। ଫଳସ୍ବରପ ତନୋଟିି ଯାକ ରାଜ୍ୟରେ ବିଜୟୀ ହୋଇଥିଲା ଭାଜପା। ଏବେ ଦଳ ଝାଡ଼ଖଣ୍ଡ ପାଇଁ ସମାନ ଫର୍ମୁଲା ଲଗାଇବାକୁ ଯାଉଛି। ପଡୋଶୀ ରାଜ୍ୟର ମାଟିରୁ ଝାଡଖଣ୍ଡ ଆଦିବାସୀଙ୍କୁ ମନାଇବାକୁ ଉଦ୍ୟମ କରୁଛି।
ହେମନ୍ତ ସୋରେନଙ୍କ ନେତୃତ୍ୱରରେ ଜେଏମଏମ ଝାଡ଼ଖଣ୍ଡରେ ଆଦିବାସୀଙ୍କ ସ୍ବର ପାଲଟିଛି । ତେବେ ଏଥର ବିଧାନସଭା ନିର୍ବାଚନରେ ଜେଏମଏମର ଆଦିବାସୀ ଭୋଟବ୍ୟାଙ୍କ ଭାଙ୍ଗିବାକୁ ସ୍ବତନ୍ତ୍ର ରଣନୀତି କରିଛି ଭାଜପା। ଜମୁଇ ମାଟିରୁ ବିର୍ସା ମୁଣ୍ଡାଙ୍କ ନାଁ ନେଇ ଝାଡଖଣ୍ଡ ଆଦିବାସୀଙ୍କୁ ସମର୍ଥନ ହାସଲ କରିବାକୁ ବଡ ଗୋଟି ଚଳାଇଛନ୍ତି ମୋଦି। ସାନ୍ଥାଳ ପ୍ରାଗଣ କ୍ଷେତ୍ରରେ ନିର୍ବାଚନ ହେବା ସହ ଭାଜପା ପାଇଁ ଏଠି ଜିତିବାର ସମ୍ମାନ ବାଜିରେ ଲାଗିଛି। କାରଣ ୨୦୧୯ରେ ୧୮ରୁ ଦଳ ମାତ୍ର ୪ଟି ଜିତି ପାରିଥିଲା।
୨୦୧୧ ଜନଗଣନା ଅନୁସାରେ ଝାଡ଼ଖଣ୍ଡର ମୋଟ ଜନସଂଖ୍ୟାର ୨୬ପ୍ରତିଶତ ଆଦିବାସୀ। ଝାଡ଼ଖଣ୍ଡ ବିଧାନସଭାର ମୋଟ ୮୧ ସିଟ ମଧ୍ୟରୁ ୨୮ଟି ଓ ଲୋକ ସଭାରେ ୧୪ରୁ ୫ଟି ଆଦିବାସୀଙ୍କ ପାଇଁ ସଂରକ୍ଷିତ । ତେଣୁ ଝାଡ଼ଖଣ୍ଡରେ କ୍ଷମତାର ଚାବି ଆଦିବାସୀଙ୍କ ପାଖରେ ହିଁ ରହିଛି। ତେଣୁ ୨୦୦୫ରୁ ଏପର୍ଯ୍ୟନ୍ତ ସମସ୍ତ ନିର୍ବାଚନରେ ଆଦିବାସୀ ହିଁ ପ୍ରମୁଖ ପ୍ରସଙ୍ଗ ରହିଛି ।
