ଭୁବନେଶ୍ବର,୨୪ା୯(ବ୍ୟୁରୋ): ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡାଙ୍କ ଓଡ଼ିଶା ଆଗମନ ନେଇ ଦଳୀୟ କାର୍ଯ୍ୟାଳୟ କିଛିଦିନ ହେଲା ଚଳଚଞ୍ଚଳ ହୋଇ ଉଠିଛି। ନଡ୍ଡାଙ୍କ ଗସ୍ତକୁ ଦୃଷ୍ଟିରେ ରଖି ଦଳର ଏବେ ଘନ ଘନ ବୈଠକ ଅନୁଷ୍ଠିତ ହେଉଛି। ତେବେ ଶୁକ୍ରବାର ଭାଜପା କ୍ଷେତ୍ର ପ୍ରଭାରୀ ସୁନୀଲ ବଂଶଲ ଦ୍ୱିପ୍ରହର ସମୟରେ ଓଡ଼ିଶା ଗସ୍ତରେ ଆସି ପହଞ୍ଚିଛନ୍ତି। ତେବେ ନଡ୍ଡାଙ୍କ ଏହା ପ୍ରଥମ ଓଡ଼ିଶା ଗସ୍ତ କାର୍ଯ୍ୟକ୍ରମ ଥିବାବେଳେ ବଂଶଲ ମଧ୍ୟ ନୂଆକରି କିଛିଦିନ ହେଲା ଦାୟିତ୍ୱ ସମ୍ଭାଳିଛନ୍ତି। ତେଣୁ ରାଷ୍ଟ୍ରୀୟ ସଭାପତିଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ କିପରି ସଫଳ ହେବ ସେନେଇ ଚାଲିଛି ମାନସମନ୍ଥନ। ଓଡ଼ିଶାର ଯେଉଁ ନେତାମାନେ ଯାହାକିଛି ଦାୟିତ୍ୱ ନେଇଛନ୍ତି ସେମାନଙ୍କ ସହ ତନ୍ନତନ୍ନ କରି ବଂଶଲ ଆଲୋଚନା ଚଲାଇଥିବା ଜଣାପଡିଛି।
ତେବେ ନଡ୍ଡା ଓଡ଼ିଶାରେ ପହଞ୍ଚିବାପରେ ୨୯ ତାରିଖରେ ହିଁ ଜନତା ମଇଦାନଠାରେ ୨୫ ହଜାର କାର୍ଯ୍ୟକର୍ତ୍ତାଙ୍କୁ ନେଇ ଏକ ବୈଠକ ଅନୁଷ୍ଠିତ ହେବ। ତେବେ କାର୍ଯ୍ୟକର୍ତ୍ତାମାନେ କିପରି ଆସି ଏଠାରେ ପହଞ୍ଚିବେ ସେନେଇ ପ୍ରସ୍ତୁତି ଚାଲିଛି। ଏହି ସଭାକୁ ଶକ୍ତି କେନ୍ଦ୍ର ବୋଲି କୁହାଯାଉଛି। ସେହି କାର୍ଯ୍ୟକ୍ରମ ଶେଷ କରିବା ପରେ ଦଳୀୟ ବିଧାୟକ ଏବଂ ଏମ୍ପିମାନଙ୍କ ସହିତ ସେ ଆଲୋଚନା କରିବେ। ଏହାପରେ ସେହିଦିନ ସାରେ ପୁରୀ ଗସ୍ତରେ ବାହାରିିବେ। ପୁରୀରେ ରାତ୍ରିଯାପନ କରିବା ପରେ ୩୦ ତାରିଖ ସକାଳୁ ଜଗନ୍ନାଥଙ୍କ ଦର୍ଶନ ସାରି ସିଧା ଓଲଟପୁର
ଠାରେ ହେବାକୁ ଥିବା ଏକ କାର୍ଯ୍ୟକ୍ରମରେ ଯୋଗଦେବାକୁ ଯିବେ। ସେଠାରୁ ଫେରିବା ପରେ କେତେଜଣ କାର୍ଯ୍ୟକର୍ତ୍ତା ଏବଂ ନେତାଙ୍କୁ ନେଇ ଆଉ ଏକ ବୈଠକ କରିବେ। ଏହାପରେ ଏକ ଖବରଦାତା ସମ୍ମିଳନୀକୁ ସମ୍ବୋଧନ କରିବେ। ଶେଷରେ ଏକ ବୁଥ୍କୁ ଯାଇ ଜଣେ କାର୍ଯ୍ୟକର୍ତ୍ତାଙ୍କ ଘରେ ଭୋଜନ କରି ସେହିଦିନ ହିଁ ନଡ୍ଡା ଦିଲ୍ଲୀ ଫେରିଯିବା କାର୍ଯ୍ୟକ୍ରମ ରହିଛି। ଏହିସବୁ କାର୍ଯ୍ୟକ୍ରମ କିପରି ସଫଳ ହେବ ତାକୁ ନେଇ ବଂଶଲ ଘନ ଘନ ବୈଠକ ଚଳାଇଛନ୍ତି। ଅନ୍ୟପଟେ ନଡ୍ଡାଙ୍କୁ ବିମାନବନ୍ଦରଠାରୁ ସ୍ବାଗତ କରିବା ଲାଗି ଏକ ବିଶାଳ ରାଲିର ଆୟୋଜନ ମଧ୍ୟ କରାଯାଉଛି।
