ବାରିପଦା ଅଫିସ,୨୮ା୩: ବାରିପଦା ତକତପୁର ସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ଶୈକ୍ଷିକ ଓ ବୌଦ୍ଧିକ ପରିବେଶର ମୂଲ୍ୟାଙ୍କନ ଏବଂ ସ୍ବୀକୃତି ନିମନ୍ତେ ନାକ୍ର ଏକ ୫ ଜଣିଆ ଟିମ୍ ବିଶ୍ୱବିଦ୍ୟାଳୟକୁ ଆସିଛନ୍ତ। ଏହି ଟିମ୍ରେ ଆଗ୍ରାର ଡ.ବି.ଆର୍.ଆମ୍ବେଦକର ବିଶ୍ୱବିଦ୍ୟାଳୟର ପୂର୍ବତନ କୁଳପତି ଡ. ଅରବିନ୍ଦ କୁମାର ଦୀକ୍ଷିତ (ଅଧ୍ୟକ୍ଷ), ମହାରାଷ୍ଟ୍ରର କେବିସି ନର୍ଥ ମହାରାଷ୍ଟ୍ର ବିଶବିଦ୍ୟାଳୟର ପ୍ରଫେସର ଡ. ରାକେଶ ରାମଟେକେ (ସଦସ୍ୟ ସଂଯୋଜକ), ହରିୟାଣାର ଭଗତ ଫୁଲ ସିଂହ ମହିଳା ବିଶ୍ୱବିଦ୍ୟାଳୟର ଡିନ୍ ଡ. ସଙ୍କେତ ଭିଜ, କେରଳର ଶ୍ରୀ ଶଙ୍କରାଚାର୍ଯ୍ୟ ବିଶ୍ୱବିଦ୍ୟାଳୟର ପ୍ରଫେସର ଡ. ଫ୍ରାନ୍ସିସ ଏ ପି ଆରକଲ, ଗୁଜୁରାଟ ସୌରାଷ୍ଟ୍ର ବିଶ୍ୱବିଦ୍ୟାଳୟର ପ୍ରଫେସର ଡ. ଭରତ ରାମାନୁଜ ପ୍ରମୁଖ ଅଛନ୍ତି। ଟିମ୍ର ସଦସ୍ୟମାନେ ପ୍ରଥମେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବା ପରେ କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀଙ୍କ ସହ ଭାବ ବିନିମୟ କରିଥିଲେ। ପରେ ଆଇକ୍ୟୁଏସି ନିର୍ଦ୍ଦେଶିକା ପ୍ରଫେସର ଏମ. ହିମବିନ୍ଦୁ ବିଶ୍ୱବିଦ୍ୟାଳୟର ନାକ ପ୍ରସ୍ତାବିତ ୭ଟି ମାନଦଣ୍ଡ ଉପରେ ବିଶ୍ୱବିଦ୍ୟାଳୟର କାର୍ଯ୍ୟକଳାପ ସମ୍ପର୍କରେ ସବିଶେଷ ବିବରଣୀ ପ୍ରଦାନ କରିଥିଲେ। ପ୍ରଥମ ଦିନରେ ସଦସ୍ୟଗଣ ବିଶ୍ୱବିଦ୍ୟାଳୟର ଅର୍ଥନୀତି, ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ବ୍ୟବସାୟ ପ୍ରଶାସନ, ଲାଇବ୍ରେରୀ ଏବଂ ସୂଚନା ବିଜ୍ଞାନ, ସାମାଜିକ କାର୍ଯ୍ୟ, ଆର୍.ଏସ.ଜି.ଆଇ.ଏସ, ଯୋଗ, ସାନ୍ତାଳୀ, ନୃତତ୍ତ୍ୱ ଓ ଜନଜାତି ଶିକ୍ଷା, ଜୈବ ପ୍ରଯୁକ୍ତି, କମ୍ପ୍ୟୁଟର ପ୍ରୟୋଗ, ପ୍ରାଣୀ ବିଜ୍ଞାନ, ଗଣିତ ଓ କମ୍ପ୍ୟୁଟର ବିଜ୍ଞାନ ବିଭାଗ ପରିଦର୍ଶନ କରିଥିଲେ। ଏହା ସହ ଆଲୁମିନି, ଅଭିଭାବକ, ଛାତ୍ରୀଛାତ୍ର ଏବଂ ବିଶବିଦ୍ୟାଳୟ ଅଧିନରେ ଥିବା ସ୍ବୀକୃତିପ୍ରାପ୍ତ କଲେଜ ଅଧ୍ୟକ୍ଷଙ୍କ ସହିତ ଆଲୋଚନା କରିଥିଲେ। ସଦସ୍ୟମାନେ ସ୍ନାତକୋତ୍ତର ପରିଷଦ ଅଧ୍ୟକ୍ଷ ପ୍ରଫେସର ପ୍ରମୋଦ କୁମାର ଶତପଥୀ, କୁଳସଚିବ ସହଦେବ ସମାଧିଆ, ପ୍ରାଣୀ ବିଜ୍ଞାନ ବିଭାଗର ପ୍ରଫେସର ହେମନ୍ତ କୁମାର ସାହୁ, ଜୈବ ପ୍ରଯୁକ୍ତି ବିଭାଗର ପ୍ରଫେସର ହୃଦୟନାଥ ଥାଟୋଇ, ମହାବିଦ୍ୟାଳୟ ଉନ୍ନୟନ ପରିଷଦର ନିର୍ଦ୍ଦେଶିକା ପ୍ରଫେସର ସୁସ୍ମିତା କର, ଛାତ୍ର କଲ୍ୟାଣ ନିର୍ଦ୍ଦେଶାଳୟର ନିର୍ଦ୍ଦେଶକ ଡ. ଆଦିତ୍ୟ କୁମାର ପାତ୍ର, ପରୀକ୍ଷା ନିୟନ୍ତ୍ରକ ପ୍ରଫେସର ଲକ୍ଷ୍ମୀଧର ଗିରି, ବିତ୍ତ ନିୟନ୍ତ୍ରକ ଶୁକଦେବ ତରେଇ ଏବଂ ଅନ୍ୟ ବିଭାଗୀୟ ଅଧିକାରୀ ମାନଙ୍କ ସହିତ ଆଲୋଚନା କରିଥିଲେ।
