ନୟାଗଡ଼ ଅଫିସ,୮।୩: ନୟାଗଡ଼ ଅତିରିକ୍ତ ଜିଲା ଜଜଙ୍କ କୋର୍ଟରେ ନବଘନପୁର ସରପଞ୍ଚ ନିଲମ୍ବିତ ମାମଲା ଶୁଣାଣି ହୋଇଛି। ଅତିରିକ୍ତ ଜିଲା ଜଜ୍ ଲିଲି ସେନାପତି ତଳ କୋର୍ଟଙ୍କ ରାୟକୁ କାଏମ ରଖିବା ସହ ଚିତ୍ତରଞ୍ଜନ ଭଞ୍ଜଙ୍କୁ ସରପଞ୍ଚ ପଦବୀରେ କାର୍ଯ୍ୟ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।
ସୂଚା ଯୋଗ୍ୟ, ୨୦୨୨ ପଞ୍ଚାୟତ ନିର୍ବାଚନରେ କବିରାଜ ସାହୁ ମିଥ୍ୟା ତଥ୍ୟ ଦେଇ ସତ୍ୟପାଠ ଦାଖଲ କରିଥିଲେ । ନିଜ ନାଁରେ ଥିବା ମାମଲାକୁ ସତ୍ୟପାଠରେ ଉଲ୍ଲେଖ କରି ନ ଥିଲେ । ଏହାକୁ ନେଇ ପ୍ରତିଦ୍ବନ୍ଦି ଚିତ୍ତରଞ୍ଜନ ଭଞ୍ଜ ଏସ୍ଡିଜେଏମ୍ଙ୍କ କୋର୍ଟର ଆଶ୍ରୟ ନେଇଥିଲେ । କୋର୍ଟ କିଛି ଦିନ ତଳେ ନିର୍ବାଚିତ ସରପଞ୍ଚ କବିରାଜ ସାହୁଙ୍କୁ ପଦଚ୍ୟୁତ କରିଥିଲେ। ଅନ୍ୟପକ୍ଷେ କବିରାଜଙ୍କ ବିରୋଧରେ ପ୍ରତିଦ୍ବନ୍ଦିତା କରୁଥିବା ଚିତ୍ତରଞ୍ଜନ ଭଞ୍ଜଙ୍କୁ ଏସ୍ଡିଜେଏମଙ୍କ କୋର୍ଟ ସରପଞ୍ଚ ଭାବେ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶନାମା ବିରୋଧରେ କବିରାଜ ଅତିରିକ୍ତ ଜିଲା ଜଜ୍ କୋର୍ଟରେ ଅପିଲ କରିଥିଲେ । ଚିତ୍ତରଞ୍ଜନଙ୍କ ପାଇଁ ଆଇନଜୀବୀ ଅରୁଣ କୁମାର ମହାପାତ୍ର ମାମଲା ପରିଚାଳନା କରୁଥିଲେ।
