ଆନ୍ଧ୍ରପ୍ରଦେଶ,୨।୧୧: ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲାର କାସିବୁଗାଠାରେ ଥିବା ଶ୍ରୀ ଭେଙ୍କଟେଶ୍ୱର ସ୍ୱାମୀ ମନ୍ଦିର (ମିନି ତିରୁପତି)ରେ ଗତକାଲି ଏକାଦଶୀ ଅବସରରେ ପ୍ରବଳ ଭିଡ଼ ଯୋଗୁଁ ଦଳାଚକଟା ଘଟି ୯ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୮ ଜଣ ମହିଳା ଓ ଜଣେ ଶିଶୁ ଅଛନ୍ତି। ଏହି ମର୍ମନ୍ତୁଦ ଘଟଣା ପରେ ମନ୍ଦିର କର୍ତ୍ତୃପକ୍ଷ ତଥା ପୂଜକ ହରି ମୁକୁନ୍ଦ ପଣ୍ଡାଙ୍କ ବୟାନ ଚର୍ଚ୍ଚାର ବିଷୟ ପାଲଟିଛି।
୯୪ ବର୍ଷୀୟ ହରି ମୁକୁନ୍ଦ ପଣ୍ଡା କହିଛନ୍ତି ଯେ ସେ ଏହି ମନ୍ଦିରକୁ ମାତ୍ର ଚାରି ମାସ ତଳେ ତାଙ୍କ ବ୍ୟକ୍ତିଗତ ଜମିରେ ନିର୍ମାଣ କରିଛନ୍ତି। ଏହି ଏକାଦଶୀ କାର୍ଯ୍ୟକ୍ରମ ବିଷୟରେ ସେ ସ୍ଥାନୀୟ ପ୍ରଶାସନ ବା ପୋଲିସକୁ ଜଣାଇ ନ ଥିଲେ। ସେ ପ୍ରଶ୍ନ କରିଛନ୍ତି, “ଏହା ମୋର ଜମି, ମୋର ମନ୍ଦିର। ମୁଁ କାହିଁକି ପୋଲିସ ବା ପ୍ରଶାସନକୁ ଜଣାଇବି?”
ପଣ୍ଡା କହିଛନ୍ତି ଯେ ସାଧାରଣତଃ ମନ୍ଦିରରେ କମ୍ ଭିଡ଼ ହୁଏ ଏବଂ ସେ ଏକାଦଶୀରେ ଏତେ ଭିଡ଼ ଆଶା କରି ନ ଥିଲେ। ତାଙ୍କ ନିଜ ଖର୍ଚ୍ଚରେ ରନ୍ଧା ଯାଇଥିବା ପ୍ରସାଦ ସକାଳ ୯ଟା ବେଳେ ଭିଡ଼ ହେତୁ ଶୀଘ୍ର ଶେଷ ହୋଇଯାଇଥିଲା।
ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏହି ଘଟଣା ପାଇଁ ମନ୍ଦିର କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି। ସେ କହିଛନ୍ତି ଯେ ଯଦି ପୋଲିସକୁ ପୂର୍ବରୁ ସୂଚନା ଦିଆଯାଇଥାନ୍ତା, ତେବେ ଭିଡ଼ ନିୟନ୍ତ୍ରଣ ପାଇଁ ବ୍ୟବସ୍ଥା କରାଯାଇ ପାରିଥାଆନ୍ତା। ସେ ଘଟଣାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି। ପୂଜକ ପଣ୍ଡା କିନ୍ତୁ କହିଛନ୍ତି ଯେ ମୋ ବିରୁଦ୍ଧରେ ମାମଲା ରୁଜୁ ହେଲେ ବି ତାଙ୍କର କିଛି ଯାଏ ଆସେ ନାହିଁ।
ତଦନ୍ତରୁ ଜଣାପଡ଼ିଛି ଯେ ନିର୍ମାଣାଧୀନ ଥିବା ଏହି ମନ୍ଦିରରେ ପ୍ରବେଶ ଓ ପ୍ରସ୍ଥାନ ପାଇଁ ମାତ୍ର ଗୋଟିଏ ସଂକୀର୍ଣ୍ଣ ରାସ୍ତା ଥିଲା। ଏହି ତ୍ରୁଟି ଯୋଗୁଁ ଭିଡ଼ ସମୟରେ ପରିସ୍ଥିତି ଅଧିକ ଜଟିଳ ହୋଇଥିଲା। ଦୁର୍ଘଟଣା ପରେ ମନ୍ଦିରକୁ ବନ୍ଦ କରିଦିଆଯାଇଛି ଏବଂ ମନ୍ଦିର ପରିସରରେ ପୋଲିସ ମୁତୟନ କରାଯାଇଛି।
