ବ୍ରହ୍ମପୁର,୪ା୪(ଅଶୋକ କୁମାର ସାହୁ):ଗଞ୍ଜାମ ଜିଲାର ବ୍ୟବସାୟିକ ସହର ବ୍ରହ୍ମପୁରରେ ମୋ ବସ୍ ସେବା ଆରମ୍ଭ ହେବାର ମାସେ ପୁରିବାକୁ ଯାଉଛି। ସଚେତନତା ଅଭାବରୁ ପ୍ରଥମେ ଏହି ବସ୍ ସଂକ୍ରାନ୍ତରେ ଲୋକେ ଜାଣିପାରୁ ନ ଥିଲେ। ଯାତ୍ରୀଙ୍କ ସଂଖ୍ୟା ବହୁତ କମ୍ ରହୁଥିଲା। ଏବେ ଜାଣିବା ପରେ ଲୋକେ ଉକ୍ତ ବସ୍ ଉପରେ ନିର୍ଭରଶୀଳ ହେଉଥିବା ଦେଖାଯାଇଛି।
ସିଲ୍କ ସିଟି ବ୍ରହ୍ମପୁରରେ ଗତ ମାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ମୋ ବସ୍ ସେବା ଶୁଭାରମ୍ଭ ହୋଇଥିଲା। ପ୍ରଥମ ପର୍ଯ୍ୟାୟରେ ୧୫ଟି ବସ୍ ସହରକୁ ମିଳିଛି। ୪ଟି ରୁଟରେ ଏହି ବସ୍ ଗଡୁଛି। କ୍ୟାପିଟାଲ ରିଜିଅନ ଅର୍ବାନ ଟ୍ରାନ୍ସପର୍ଟ(କ୍ରୁଟ) ଦ୍ୱାରା ପରିଚାଳିତ ଏହି ବସର ଡିପୋ ହଳଦିଆପଦର ସିଟି ବସ୍ଷ୍ଟାଣ୍ଡରେ ରହିଛି। ସକାଳ ୬ଟା ୧୫ରୁ କ୍ରମାନ୍ବୟରେ ବସ୍ଗୁଡିକ ସକାଳ ୭ଟା୧୫ ସୁଦ୍ଧା ଡିପୋ ଛାଡୁଛନ୍ତି। ୩୦୦ ନମ୍ବର ରୁଟରେ ୩ଟି ବସ୍ ହଳଦିଆପଦରରୁ ଅନ୍ଧପସରା ହୋଇ ଫାଷ୍ଟ ଗେଟ ଯା’ଆସ ଯାଉଛି। ରୁଟ ନଂ.୩୦୧ରେ ୩ଟି ବସ୍ ଗଡୁଛି, ଯାହାକି ନୂଆବସଷ୍ଟାଣ୍ଡଠାରୁ ଆମ୍ବପୁଆ ବାରାକ ଗ୍ରାଉଣ୍ଡ, ୩୦୨ନଂ. ରୁଟରେ ୩ଟି ବସ ରେଳ ଷ୍ଟେଶନରୁ ଗୁରୁଣ୍ଠି, ରୁଟ ନଂ. ୩୦୩ରେ ୫ଟି ବସ୍ ନୂଆ ବସଷ୍ଟାଣ୍ଡରୁ ବିଶ୍ୱବିଦ୍ୟାଳୟ ହୋଇ ମାଣ୍ଡିଆପଲ୍ଲୀ ପର୍ଯ୍ୟନ୍ତ ଯିବା ଆସିବା କରୁଛି। ଆଉ ଗୋଟିଏ ବସକୁ ସ୍ଥାୟୀ ଭାବେ ରଖାଯାଇଛି। ଏଥିରୁ ଜଣାପଡୁଛି ଯେ, ସମ୍ପୂର୍ଣ୍ଣ ସହରକୁ ମୋ ବସ୍ ସେବା ଉପଲବ୍ଧ ହୋଇପାରିନାହିଁ। ସମସ୍ୟା ବିଷୟରେ ପଚାରିବାରୁ କ୍ରୁଟର ଜନୈକ ଅଧିକାରୀ କହିଛନ୍ତି, ମୋ ବସ ସମ୍ପର୍କରେ ଲୋକଙ୍କୁ ସଚେତନ କରିବା ପାଇଁ ଯାହା ଭିତ୍ତିିଭୂମି ଦରକାର ତାହା ହୋଇପାରିନାହିଁ। ପ୍ରଥମେ ପ୍ରଥମେ ମୋ ବସ ପ୍ରତିରୋଧର ସମ୍ମୁଖୀନ ହୋଇଥିଲା। ଷ୍ଟେଶନରେ ଅଟୋ ଚାଳକ ସଂଘ ତରଫରୁ ବିରୋଧାଭାସ ମିଳିଥିଲା। ଏସ୍ପିଙ୍କ ହସ୍ତକ୍ଷେପ ପରେ ତାହା ସମାଧାନ ହୋଇଛି। ସହରର ସିଟି ହସ୍ପିିଟାଲ ସମ୍ମୁଖ ଭାଗ ବସ୍ ହବ ଭାବେ ପରଗଣିତ ହୋଇଥିବାବେଳେ ସେଠାରେ ମୋ ବସ ରହିବା ପାଇଁ ସ୍ଥାନ ନାହିଁ। ଅନ୍ୟାନ୍ୟ ଗାଡି ୧୦ରୁ ୧୫ ମିନିଟ ରହୁଥିବାବେଳେ ମୋ ବସ୍ ୨ରୁ ୩ ମିନିଟ ବି ରହିପାରୁନାହିଁ। ସହରରେ ଥିବା ବସଷ୍ଟପଗୁଡିକରେ ମୋ ବସ୍ର ରୁଟ ତାଲିକା ଓ ବସ୍ ନମ୍ବର ଲେଖିବାକୁ ପଡିବ। ଏଥିପାଇଁ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ ଓ ବ୍ରହ୍ମପୁର ମହାନଗର ନିଗମ କର୍ତ୍ତୃପକ୍ଷଙ୍କ ସହଯୋଗ ଦରକାର ବୋଲି ଗଞ୍ଜାମ ଜିଲା ଦାୟିତ୍ୱରେ ଥିବା କ୍ରୁଟର ଜଣେ ଅଧିକାରୀ କହିଛନ୍ତି।
କ୍ଷତିରେ ଚାଲିଛି ସିଟି ବସ୍
ବ୍ରହ୍ମପୁର ପାଇଁ ୨୦୧୪ ଫେବୃଆରୀରେ ପ୍ରାୟ ୩୦ଟି ସିଟି ବସ୍ ପଡିଥିଲା, ଯାହାକି ଓଏସ୍ଆର୍ଟିସି ଅଧିନରେ ଥିଲା। ୨୦୧୫ରେ ଆଉ ୧୮ଟି ବସ ଆସିବା ପରେ ସେଥିରୁ ୬ଟି ବସ୍କୁ ରାଉରକେଲା ପଠାଇ ଦିଆଗଲା। ପରେ ଏହି ବସ୍ଗୁଡିକର ଦାୟିତ୍ୱ ଓଏସଆରଟିସି ହାତରୁ ବିଇଡିଏ ହାତକୁ ଗଲା ବୋଲି ଓଏସଆରଟିସର ତତ୍କାଳୀନ ଅଧିକାରୀ କହିଛନ୍ତି। ତେବେ ସିଟି ବସ ଟେଣ୍ଡର ନେଇଥିବା ମା’ କନକେଶ୍ୱରୀ ବସ ଆସୋସିଏଶନର ସଭାପତି ସନ୍ତୋଷ ପତିଙ୍କ ସହ ଯୋଗାଯୋଗ କରିବାରୁ ସେ କହିଲେ ଯେ, ସିଟି ବସଗୁଡିକ ଗଞ୍ଜାମ ଅର୍ବାନ ଟ୍ରାନ୍ସପୋର୍ଟ ସର୍ଭିସ ଲିମିଟେଡ (ଗୁଟସେଲ) ହାତରେ ରହିଛି। ବିଇଡିଏ ପକ୍ଷରୁ ଏହାର ପରିଚାଳନା କରାଯାଉଛି। ଗୁଟସେଲ ନିକଟରୁ ୨୨ ସିଟି ବସକୁ ୫ ବର୍ଷିଆ ଟେଣ୍ଡର ନିଆଯାଇଛି। ଉକ୍ତ ବସଗୁଡିକ ହିିଞ୍ଜିଳିକାଟୁ, ଛତ୍ରପୁର, ଭୈରବୀ, ସୋନପୁର, ଗୋପାଳପୁର ଆଦି ଅଞ୍ଚଳକୁ ଯାଉଛି। ତେବେ ମୋ ବସ ଆରମ୍ଭ ପରେ କ୍ଷତିର ସମ୍ମୁଖୀନ ହେବାକୁ ପଡିଛି। ଏ ସଂକ୍ରାନ୍ତରେ ଏସପି ଓ ଜିଲାପାଳଙ୍କଠାରେ ଅଭିଯୋଗ କରାଯାଇଛି। ସେମାନେ ଆଲୋଚନା କରିବେ ବୋଲି କହିଛନ୍ତି। ଟେଣ୍ଡର ଅବଧି ୨ ବର୍ଷ ସରିଥିବାବେଳେ ଆହୁରି ୩ବର୍ଷ ରହିଛି। ତେଣୁ ଯଦି ଏନେଇ କିଛି ପଦକ୍ଷେପ ନିଆ ନ ଯାଏ ତେବେ ଅଦାଲତକୁ ଯିବାକୁ ବାଧ୍ୟ ହେବୁ ବୋଲି ପତି କହିଛନ୍ତି।
