ନୂଆଦିଲ୍ଲୀ,୧୦ ।୬: ରାଜଧାନୀ ଦିଲ୍ଲୀର ଜାମା ମସଜିଦ ବାହାରେ ମୁସଲମାନ ସମ୍ପ୍ରଦାୟର ଲୋକେ ବିରୋଧ ପ୍ରଦର୍ଶନ କରିଛନ୍ତି । ନୁପୁର ଶର୍ମାଙ୍କ ବୟାନକୁ ବିରୋଧ କରି ଏହି ପ୍ରଦର୍ଶନ କରାଯାଇଛି । ହାତରେ ପୋଷ୍ଟର ବ୍ୟାନର ଧରି ଲୋକମାନେ ନୁପୁରଙ୍କ ବିରୋଧରେ ସ୍ଲାଗାନ ଦେଇଛନ୍ତି । ଏହି ବିରୋଧ ପ୍ରଦର୍ଶନକୁ ଦେଖି ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।
ପ୍ରଦର୍ଶନକୁ ନେଇ ମସଜିଦର ଶାହି ଇମାମ କହିଛନ୍ତି ମସଜିଦ କମିଟି ପକ୍ଷରୁ ପ୍ରଦର୍ଶନକୁ ନେଇ କୌଣସି ଆହ୍ୱାନ ଦିଆଯାଇ ନାହିଁ । ଗୁରୁବାର ଯେତେବେଳେ ଲୋକେ ବିରୋଧ କରିବାକୁ ଯୋଜନା କରୁଥିଲେ ସେମାନଙ୍କୁ ସ୍ପଷ୍ଟ ଭାବେ କୁହାଯାଇଥିଲା କି ଜାମା ମସଜିଦ(କମିଟି)ର ବିରୋଧ ପାଇଁ କୌଣସି ଆହ୍ୱାନ ନାହିଁ । ବିକ୍ଷୋଭକାରୀଙ୍କ ସମ୍ପର୍କରେ ଆମେ କିଛି ଜାଣିନାହୁଁ । ଶାହି ଇମାମ କହିଛନ୍ତି ମୋତେ ଲାଗୁଛି ଏମାନେ ଏଆଇଏମ୍ଆଇଏମ୍ କିମ୍ବା ଓୱାଇସିଙ୍କର ଲୋକ ବୋଲି । ସେ ସ୍ପଷ୍ଟ କରିଛନ୍ତି ଯେ ଯଦି ସେମାନେ ବିରୋଧ କରିବାକୁ ଚାହୁଁଛନ୍ତି, ସେମାନେ କରିପାରିବେ କିନ୍ତୁ ଆମେ ଏହାକୁ ସମର୍ଥନ କରିବୁ ନାହିଁ ।
ଦିଲ୍ଲୀ ପୋଲିସ କହିଛି ଭାରତୀୟ ଜନତା ପାଟି(ଭାଜପା)ର ନିଲମ୍ବିତ ନେତା ନୁପୁର ଶର୍ମା ଓ ନବିନ କୁମାର ଜିନ୍ଦଲଙ୍କ ବୟାନକୁ ବିରୋଧ କରି ଲୋକେ ଜାମା ମସଜିଦ ବାହାରେ ବିରୋଧ ପ୍ରଦର୍ଶନ କରିଛନ୍ତି । ତେବେ ସେଠାରୁ ଲୋକଙ୍କୁ ହଟାଇ ଦିଆଯାଇଛି ଓ ପରିସ୍ଥିତି ନିୟନ୍ତ୍ରଣରେ ରହିଛି ।
